အာဆင်နယ်က ကန့်သတ်ချက်တစ်ခုတည်းကြောင့်သာ အသင်းခေါင်းဆောင်အိုဒီဂတ်ကို ရောင်းထုတ်သွားဖို့အတွက် ဆန္ဒရှိနေလိမ့်မယ်လို့ သတင်းတွေမှာ ဖော်ပြပါတယ်။

အသက် ၂၇ နှစ်အရွယ်ကစားသမားက ၂၀၂၅-၂၀၂၆ ဘောလုံးရာသီမှာ ဒဏ်ရာပြဿနာတွေနဲ့အတူ ရုန်းကန်ခဲ့ရပေမဲ့ အခုတော့ အာတီတာရဲ့အသင်းအတွက် သူ့ရဲ့အကောင်းဆုံးပုံစံကို ပြန်လည်သယ်ဆောင်လာဖို့ နီးစပ်နေပါပြီ။

အာဆင်နယ်က ပရီးမီးယားလိဂ်အမှတ်ပေးဇယားထိပ်ဆုံးနေရာမှာ ပူးတွဲရပ်တည်နေပြီး အိုဒီဂတ်ကိုယ်တိုင်လည်း ပြိုင်ပွဲစုံ ၁၄ ပွဲမှာ လေးဂိုးသွင်း၊ ဂိုးဖန်တီးမှုတစ်ကြိမ် ပြုလုပ်ထားပါတယ်။

ဒါပေမဲ့ Sky Germany ရဲ့ဖော်ပြချက်အရ စာချုပ်သစ်ဆွေးနွေးမှုတွေ ရှေ့မတိုးနိုင်ခဲ့ဘူးဆိုရင် ဒီနော်ဝေလက်ရွေးစင်ကစားသမားနဲ့ လမ်းခွဲသွားဖို့ အာဆင်နယ်ဘက်မှာ ဆန္ဒရှိနေတယ်လို့ သိရပါတယ်။

ကလပ်အသင်းနဲ့ အိုဒီဂတ်တို့အကြား စာချုပ်သက်တမ်းက ၂၀၂၈ ခုနှစ်၊ နွေရာသီမှာ သက်တမ်းကုန်ဆုံးဖို့ ရှိနေပြီး သူသာ စာချုပ်သစ်ကို လက်မှတ်မရေးထိုးဘူးဆိုရင် အာဆင်နယ်က သူ့ကို ၂၀၂၇ ခုနှစ်မှာ ရောင်းထုတ်သွားဖို့ စဉ်းစားသွားပါလိမ့်မယ်။

ဒီကွင်းလယ်လူကို ဘိုင်ယန်မြူးနစ်ရဲ့ကာလရှည်စိတ်ဝင်စားမှု ရှိထားသလို အခွင့်အရေးသာရှိလာရင် အခြားဥရောပထိပ်သီးကလပ်အသင်းတွေလည်း အပြောင်းအရွှေ့လှုပ်ရှားမှုဆီ ဝင်ရောက်လာမယ်လို့ မျှော်လင့်ရပါတယ်။