ရော်နယ်အရူဂျိုက ၂၀၂၇ ခုနှစ်မှာ ဘာစီလိုနာကနေ လီဗာပူးဆီ အပြီးသတ် ပြောင်းရွှေ့ဖို့ ကိစ္စနဲ့ ပတ်သက်ပြီး ဆုံးဖြတ်ချက်ချဖို့ စောလွန်းနေသေးကြောင်း ပြောပြလာခဲ့ပါတယ်။

ဘာစီလိုနာမှာ ပွဲထွက်ခွင့်ဆုံးရှုံးလာတဲ့ ဥရုဂွေးကစားသမားက ၂၀၂၆-၂၇ ရာသီ မတိုင်ခင် အီရာအိုလာရဲ့အသင်းဆီ တစ်ရာသီ အငှားစာချုပ်နဲ့ ပြောင်းရွှေ့ခဲ့တာ ဖြစ်ပါတယ်။

မာဆေးဆိုဒ်ဆီ ပြောင်းရွှေ့လာမှုက ဒဏ်ရာတွေကြောင့် ထိခိုက်ခဲ့ရတဲ့ အာရူဟိုရဲ့ ကစားသမားဘဝကို ပြန်လည်အသက်ဝင်လာစေခဲ့ပြီး၊ ဂျရမီဂျာကွက်နဲ့ အသင်းခေါင်းဆောင် ဗာဂျီလ်ဗန်ဒိုက်တို့ ဗဟိုခံစစ်မှာ တွဲကစားနေချိန် အရူဂျိုကတော့ အီရာအိုလာရဲ့လက်အောက် ညာနောက်ခံလူအဖြစ် နေရာသစ်တစ်ခုကို ရှာဖွေတွေ့ရှိခဲ့ပါတယ်။

မူလ သဘောတူညီချက်ထဲမှာ ယူရို ၅၅ သန်းနဲ့ အပြီးသတ် ဝယ်ယူခွင့် ပါဝင်ပေမဲ့ အရူဂျိုကတော့ အနာဂတ်အကြောင်း ဆုံးဖြတ်ဖို့ စောလွန်းနေသေးကြောင်း ဖွင့်ဟခဲ့ပါတယ်။

အရူဂျိုက "ကျွန်တော် လိုအပ်နေတဲ့ ကစားခွင့်ရဖို့၊ အသင်းအတွက် အရေးပါသူတစ်ဦးအဖြစ် ခံစားရဖို့နဲ့ ကိုယ်ပိုင် ခြေစွမ်းကို ပြသခွင့်ရဖို့တွေကို ဒီနေရာမှာ ရှာဖွေတွေ့ရှိနေပြီလို့ ထင်ပါတယ်။ တခြားကိစ္စတွေကို ပြောဆိုဖို့ကတော့ စောလွန်းပါသေးတယ်။

ကျွန်တော် လိုချင်တဲ့ ပွဲထွက်ခွင့်တွေ ရနေပါပြီ၊ အနာဂတ်မှာ ဘာတွေဖြစ်လာမလဲဆိုတာကိုတော့ စောင့်ကြည့်သွားရပါလိမ့်မယ်" လို့ ဆိုပါတယ်။

အသက် ၂၇ နှစ်အရွယ် ကစားသမားက ဒီရာသီ လီဗာပူးရဲ့ ပရီးမီးယားလိဂ် ခုနစ်ပွဲစလုံးမှာ ပါဝင်ကစားထားပြီးပွဲထွက်ကစားခွင့် ငါးပွဲအထိ ရရှိထားသလို ချန်ပီယံလိဂ် သုံးပွဲစလုံးမှာလည်း ပွဲထွက်ကစားသမားအဖြစ် ပါဝင်ထားပါတယ်။