နယ်သာလန်နည်းပြသစ်ဇာဗီက ဒီည၊ ယာဂန်ကလော့ပ်ရဲ့ ဂျာမနီအသင်းနဲ့ ရင်ဆိုင်ရမယ့် စိန်ခေါ်မှုကြီးကို စိတ်အားထက်သန်မှုအပြည့် စောင့်မျှော်နေပါတယ်။ ဒါက ဒီနည်းပြနှစ်ဦးလုံးအတွက် နိုင်ငံတကာအဆင့်ပွဲဦးထွက်ပွဲစဉ် ဖြစ်လာပါလိမ့်မယ်။

အသက် ၄၆ နှစ်အရွယ်နည်းပြက နယ်သာလန်အသင်းရဲ့ စိတ်ပျက်ဖွယ်ကမ္ဘာ့ဖလားပြိုင်ပွဲခရီးစဉ်အပြီး ဩဂုတ်လအတွင်း ရော်နယ်ကိုးမန်းရဲ့နေရာကို ဆက်ခံခဲ့ပါတယ်။

အလားတူအခြေအနေမျိုးနဲ့ပဲ ကလော့ပ်က ဂျာမနီလက်ရွေးစင်အသင်းနည်းပြရာထူးကို ရယူခဲ့ပြီး အခုတော့ သူတို့နှစ်ဦးလုံး ဂျိုဟန်ခရိုက်ဖ်ကွင်းကြီးမှာ နေးရှင်းလိဂ်ပွဲစဉ်အဖြစ် ထိပ်တိုက်ယှဉ်ပြိုင်သွားရပါတော့မယ်။
 
ဇာဗီက ၁၉၇၇-၁၉၇၈ ခုနှစ်၊ အန့်ဟပ်ပဲလ် (Ernst Happel) နောက်ပိုင်း နယ်သာလန်အသင်းအတွက် ပထမဆုံးနိုင်ငံခြားသားနည်းပြ ဖြစ်လာခဲ့ပြီး လီဗာပူးနည်းပြဟောင်းကလော့ပ်နဲ့ ထိပ်တိုက်ရင်ဆိုင်ဖို့ စိတ်အားထက်သန်နေပါတယ်။
 
သတင်းထောက်တွေနဲ့တွေ့ဆုံချိန် ဇာဗီက "ဂျာမနီဆိုတာ တကယ့်အသင်းကြီးတစ်ခုဖြစ်လို့ မနက်ဖြန်ပွဲစဉ်အတွက် ကျွန်တော်တို့ရဲ့အကောင်းဆုံးကစားပုံကို ပြသသွားရပါမယ်" လို့ ပြောပါတယ်။
 
"ဒီပြိုင်ဆိုင်မှုရဲ့အငွေ့အသက်ကို ကျွန်တော် ခံစားမိပါတယ်။ ကျွန်တော်တို့အသင်းမှာရှိနေသူတိုင်းလည်း ဒီပွဲစဉ်ကို စောင့်မျှော်နေကြပြီး ဒါက ကျွန်တော်တို့ရဲ့ခရီးစဉ်သစ်ကို စတင်ဖို့အတွက် အကောင်းဆုံးနည်းလမ်းတစ်ခု ဖြစ်ပါတယ်။

ကလော့ပ်ဆိုတာလည်း မကြာသေးမီနှစ်တွေအတွင်း ကမ္ဘာ့အကောင်းဆုံးနည်းပြစာရင်းဝင်တစ်ဦး ဖြစ်လာခဲ့ပါတယ်။ ဒါက အသင်းတစ်ခုလုံးအတွက်ရော၊ ကျွန်တော့်အတွက်ပါ ကြီးမားတဲ့စိန်ခေါ်မှုတစ်ခု ဖြစ်လာပါလိမ့်မယ်။

အမြဲတမ်းအနိုင်ရရှိနေဖို့ဆိုတာ ပန်းတိုင်ဖြစ်ပေမဲ့ လက်တွေ့ယှဉ်ပြိုင်ကစားပြမှုနဲ့အတူ အထင်ကြီးစရာကောင်းတဲ့ကစားဟန်တစ်ခု ချန်ထားရစ်နိုင်ဖို့ ပိုအရေးကြီးပါတယ်။ ကျွန်တော့်အသင်းက စိတ်အားထက်သန်မှု၊ ရည်မှန်းချက်၊ အနိုင်ယူလိုတဲ့ဆန္ဒ၊ ကျွန်တော်တို့ရဲ့ကစားဟန်ဒဿနတွေကို ပြသသွားစေချင်ပါတယ်" လို့ ဆိုပါတယ်။