လီဗာပူးကစားသမားသစ်ဗစ်တာမူနော့ဇ်က အသင်းအတွက် ဘယ်အချိန်မှာ ပွဲဦးထွက် ကစားနိုင်မလဲဆိုတာကို ပြောပြလာပါတယ်။

လီဗာပူးက အမေရိကန်ရာသီကြိုခရီးစဉ်မှာ ဝရက်ဇ်ဟမ်းနဲ့ ဆန်းဒါးလန်းတို့ကို အနိုင်ယူခဲ့ပေမဲ့ လိဒ်ယူနိုက်တက်ကိုတော့ ရှုံးနိမ့်ခဲ့ပါတယ်။ လာမယ့်တနင်္ဂနွေနေ့မှာတော့ လီဗာပူးက မိုနာကိုနဲ့ ရင်ဆိုင်ကစားပြီး ဒီရှုံးနိမ့်မှုကို ပြန်လည်အဖတ်ဆယ်သွားဖို့ ရှိသလို ဗစ်တာမူနော့ဇ်အတွက် အသင်းသစ်မှာ ပထမဆုံးအကြိမ် ပွဲထွက်ကစားနိုင်မယ့် အခွင့်အရေးလည်း ရှိနေပြန်ပါတယ်။

အသက် ၂၃ နှစ်အရွယ် စပိန်တောင်ပံကစားသမားက နိုင်ငံ့လက်ရွေးစင်အသင်းနဲ့အတူ ကမ္ဘာ့ဖလားချန်ပီယံဆု ရယူပြီးနောက် အားလပ်ရက်ရရှိခဲ့ပြီး အခုတော့ ကလပ်အသင်းသစ်နဲ့ လာရောက်ပူးပေါင်းလိုက်ပါပြီ။ သူက လီဗာပူးအသင်းရဲ့ကျောနံပါတ် ၂၃ ဂျာစီကို ဝတ်ဆင်သွားမယ်လို့ သိရပါတယ်။

ကလပ်အသင်းနဲ့ပြုလုပ်တဲ့ ပထမဆုံးအင်တာဗျူးမှာ ရီးရဲလ်မက်ဒရစ်ကစားသမားဟောင်း မူနော့ဇ်က အခုသီတင်းပတ်ပိတ်ရက်ခြေစမ်းပွဲစဉ်မှာ အသင်းအတွက် တစ်ခုခုလုပ်ပြဖို့ အဆင်သင့်ဖြစ်နေပြီလို့ ဆိုပါတယ်။ ဒါက သူ့ရဲ့ခြေစွမ်းကို မြင်တွေ့ချင်နေတဲ့ လီဗာပူးပရိသတ်တွေအတွက် စိတ်လှုပ်ရှားစရာ သတင်းစကားတစ်ခု ဖြစ်ပါတယ်။

"အသင်းသစ်၊ နိုင်ငံသစ်ဆီ ပြောင်းလာတယ်ဆိုတာ အသားကျဖို့အတွက် အချိန်လိုအပ်တာတော့ အမှန်ပါပဲ။ ဒါကြောင့် ကျွန်တော့်အတွက်တော့ စောစောစတင်နိုင်လေ ပိုကောင်းလေပါပဲ" လို့ မူနော့ဇ်က ဆိုပါတယ်။

"ကျွန်တော် အဆင်ပြေပါတယ်။ လေ့ကျင့်ရေးမှာရော၊ ပွဲကစားချိန်မှာပါ ကိုယ့်ကိုယ်ကိုယ် သက်သေပြဖို့ တကယ်ကို စိတ်အားထက်သန်နေပါတယ်။ ဒီကိုရောက်လာဖို့အတွက် ကျွန်တော် တကယ် မျှော်လင့်ခဲ့ပါတယ်။ လေ့ကျင့်ခန်းတွေဆင်းရင်း အသင်းဖော်သစ်တွေနဲ့အတူ ပျော်ပျော်ပါးပါးဖြတ်သန်းသွားဖို့ ရှိသလို သူတို့တွေကလည်း ကျွန်တော့်ရဲ့အကောင်းဆုံးပုံစံပြန်ရလာအောင် ကူညီပေးကြလိမ့်မယ်လို့ ယုံကြည်ပါတယ်"

"အသင်းဖော်တွေက ကွင်းတွင်းမှာရော၊ ကွင်းပြင်ပမှာပါ ကျွန်တော့်ကို နွေးနွေးထွေးထွေး ကြိုဆိုကြပါတယ်။ အားလုံးက တကယ်ကို ဖော်ရွေပြီး ကူညီပေးကြပါတယ်။ ဒီနေ့ လေ့ကျင့်ခန်းအပြင်းအထန်လုပ်ခဲ့ရပေမဲ့ အကြောင်းအရာတွေ အများကြီးပါဝင်လို့ အသင်းနဲ့ ပထမဆုံးစတင်ထိတွေ့မှုက အနာဂတ်အတွက် အလားအလာကောင်းတယ်လို့ ပြောရပါမယ်"

"ကျွန်တော် ပွဲကစားဖို့ အသင့်ဖြစ်နေပြီလို့ ထင်ပါတယ်။ လေ့ကျင့်ခန်းဆင်းပြီးတဲ့နောက် နည်းပြက ပွဲထွက်လူစာရင်းမှာ ပါဝင်ဖို့ ပြောမယ်ဆိုရင်တော့ ကျွန်တော် အဆင်သင့်ပါပဲ။ အလုပ်စလုပ်ဖို့ တကယ်ကို မစောင့်နိုင်တော့ပါဘူး။ မိုနာကိုနဲ့ပွဲစဉ်အတွက်လည်း ဘာလို့ မဖြစ်နိုင်ရမှာလဲ" လို့ သူက ပြောကြားခဲ့ပါတယ်။

လက်ရှိမှာ တောင်ပံကစားသမားတွေ ထပ်မံရှာဖွေနေတဲ့ နည်းပြအီရာအိုလာကတော့ မူနော့ဇ်ရဲ့ခြေစွမ်းပိုင်းကို အသေအချာ စောင့်ကြည့်သွားပါလိမ့်မယ်။ လာမယ့်သီတင်းပတ်တွေမှာလည်း လီဗာပူးအသင်းဆီ ဘာကိုလာနဲ့ အမ်ဘာယီတို့ ရောက်ရှိလာနိုင်တယ်လို့ သတင်းတွေ ထွက်ပေါ်နေပါတယ်။