ကမ္ဘာ့ဖလားဖိုင်နယ်ရှုံးနိမ့်မှုအပြီး အာဂျင်တီးနားအသင်းမှ အနားယူသွားဖို့ အရိပ်အမြွက်ပြောဆိုလိုက်တဲ့ ဂိုးသမားမာတီနက်ဇ်
အာဂျင်တီးနားအသင်းရဲ့ ပထမဦးစားပေးဂိုးသမားမာတီနက်ဇ်က ၂၀၂၆ ကမ္ဘာ့ဖလား ဗိုလ်လုပွဲမှာ စပိန်ကို ရှုံးနိမ့်ခဲ့ပြီးနောက် လက်ရွေးစင်အသင်းမှ အနားယူဖို့ စဉ်းစားနေပါတယ်။
မာတီနက်ဇ်က MetLife Stadium ကွင်းမှာ စပိန်အသင်းရဲ့အဆက်မပြတ်ထိုးစစ်တွေကို တအစွမ်းကုန် ကာကွယ်ပေးခဲ့ပါတယ်။ ဒါပေမဲ့ အချိန်ပိုမှာတော့ ဖာရန်တောရက်စ်က သူ့ကိုကျော်ဖြတ်ကာ အဆုံးအဖြတ်အနိုင်ဂိုးကို သွင်းယူသွားခဲ့ပါတယ်။
ပွဲစဉ်အပြီးမှာ ဝါရင့်ဂိုးသမားကြီးကိုယ်တိုင် မျက်ရည်ကျနေခဲ့သလို အာဂျင်တီးနားအသင်းကလည်း သူတို့အတွက် အားကိုးရတဲ့အသင်းခေါင်းဆောင်မက်ဆီကို နှုတ်ဆက်ဖို့ ပြင်ဆင်နေကြပါပြီ။
အသက် ၃၉ နှစ်အရွယ်မက်ဆီက ၂၀၃၀ ပြည့်နှစ်ကမ္ဘာ့ဖလားပြိုင်ပွဲကို ပါဝင်ကစားဖို့ မရှိပေမဲ့ အခုလောလောဆယ်တော့ အာဂျင်တီးနားအတွက် ဘာဆက်လုပ်မယ်ဆိုတာ အတည်မပြုရသေးပါဘူး။ မာတီနက်ဇ်ကိုယ်တိုင်လည်း အလားတူအခြေအနေမျိုးမှာ ရှိနေပါတယ်။
"ကျွန်တော်တို့ နောက်တစ်ကြိမ် ဗိုလ်စွဲနိုင်မယ်လို့ အိပ်မက်မက်ခဲ့တယ်။ ဆုဖလားကြီးကို အာဂျင်တီးနားဆီ ပြန်သယ်လာပြီး နောက်ထပ်သမိုင်းသစ်တစ်ခု ရေးထိုးနိုင်ဖို့ မျှော်လင့်ခဲ့ပါတယ်" လို့ မာတီနက်ဇ်က သူ့ရဲ့ Instagram မှာ ရေးသားခဲ့ပါတယ်။
"တကယ်တော့ ခံစားရတဲ့ နာကျင်မှုကို စကားလုံးနဲ့ဖော်ပြဖို့ဆိုတာ ခက်ခဲပါတယ်။ အနာဂတ်အတွက် ဘာဆက်လုပ်မလဲ၊ နောက်ဆုတ်ပေးရမယ့် အချိန်ရောက်ပြီလားဆိုတာကို ပြန်ပြီးစဉ်းစားရမယ့်အချက်တွေ အများကြီးရှိနေပါတယ်"
"တကယ်ကို တောင်းပန်ပါတယ်၊ ကျွန်တော့်နိုင်ငံနဲ့ အသင်းဖော်တွေကို ကူညီပေးနိုင်ဖို့ အစွမ်းကုန် ကြိုးစားခဲ့တာပါ" လို့ သူက ဆိုပါတယ်။
မာတီနက်ဇ်က ၂၀၂၆ ခုနှစ်ကုန်ပိုင်းမှာ ရာထူးမှနုတ်ထွက်နိုင်တဲ့ နည်းပြစကာလိုနီလက်အောက်၊ အာဂျင်တီးနားရဲ့ပထမဦးစားပေးဂိုးသမား ဖြစ်လာခဲ့ပါတယ်။ အက်စတွန်ဗီလာဂိုးသမားက လက်ရွေးစင်အဆင့်ပွဲစဉ် ၆၇ ပွဲအထိ ပါဝင်ကစားပြီး ၂၀၂၂ ကမ္ဘာ့ဖလားနဲ့ ကိုပါအမေရိကဖလား(၂ ကြိမ်)တို့ကို ဆွတ်ခူးရရှိခဲ့ပါတယ်။
အသက် ၃၃ နှစ်အရွယ်ဂိုးသမားက အခုဘောလုံးရာသီသစ်မှာ အက်စတွန်ဗီလာအသင်းနဲ့အတူ ချန်ပီယံလိဂ်ပြန်ကစားရဖို့ရှိနေလို့ ဗီလာနည်းပြအမ်မရီနဲ့ ဆွေးနွေးပြီးမှသာ အပြီးသတ်ဆုံးဖြတ်ချက် ချမှတ်နိုင်ပါလိမ့်မယ်။ အာဂျင်တီးနားအသင်းကတော့ ၂၀၂၆ ခုနှစ်အတွက် ဘောလုံးအစီအစဉ်တွေကို မထုတ်ပြန်ထားပါဘူး။
