ဟယ်လ်ဆင်ကီးမှာ ကစားခဲ့တဲ့ ဝရိဇ်ဟမ်းအသင်းကို ၁ ဂိုး - ဂိုးမရှိနဲ့ ရှုံးနိမ့်ခဲ့တဲ့ စနေနေ့ ရာသီကြိုခြေစမ်းပွဲမှာ ဘရာဇီးကွင်းလယ်လူ အန်ဒရေးဆန်းတို့စ်က မန်ချက်စတာယူနိုက်တက်အတွက် ပွဲဦးထွက် ပါဝင်ကစားပေးခဲ့ပြီးနောက် နည်းပြ မိုက်ကယ်ကားရစ်က အသင်းသားသစ်ဖြစ်သူ ဆန်းတို့စ်ကို ချီးကျူးစကားပြောကြားခဲ့ပါတယ်။

၂၀၃၁ ခုနှစ်အထိ စာချုပ်ချုပ်ဆိုထားတဲ့ အသက် ၂၂ နှစ်အရွယ် ဆန်းတို့စ်ဟာ ပွဲစဉ်ရဲ့ ပထမပိုင်းမှာ ပါဝင်ကစားခဲ့ပြီး အားတက်စရာကောင်းတဲ့ ခြေစွမ်းမျိုး ပြသနိုင်ခဲ့ပါတယ်။

သူကစားခဲ့တဲ့ ၄၅ မိနစ်အတွင်းမှာ ဆန်းတို့စ်ဟာ ဘောလုံးပေးပို့မှု အောင်မြင်မှုနှုန်း ၉၃ ရာခိုင်နှုန်း ရှိခဲ့သလို ဂိုးသွင်းခွင့် နှစ်ကြိမ်ဖန်တီးပေးနိုင်ခဲ့ပြီး ခံစစ်ပိုင်းအတွက်လည်း ၄ ကြိမ်အထိ ကူညီပေးနိုင်ခဲ့ပါတယ်။

ဒီကွင်းလယ်လူဟာ စထရာဘိုးအသင်းမှာ အငှားနဲ့ သွားရောက်ကစားစဉ် ၁၁ ဂိုးသွင်း၊ ဂိုးဖန်တီးမှု ၅ ကြိမ် ပြုလုပ်နိုင်ခဲ့ပြီး ချယ်လ်ဆီးအသင်းမှာလည်း အထင်ကြီးစရာခြေစွမ်းပြသနိုင်ခဲ့ပြီးမှ ရောက်ရှိလာတာဖြစ်ပါတယ်။

"ဒီပွဲကနေ ရရှိလိုက်တဲ့ ကောင်းမွန်တဲ့အချက်တွေ အများကြီးရှိပါတယ်။ အန်ဒရေးနဲ့ မေဆန်တို့ဟာ တကယ်ကို ကောင်းကောင်းမွန်မွန် ကစားနိုင်ခဲ့သလို ချိတ်ဆက်မှုလည်း အရမ်းကောင်းတာကို တွေ့ရပါတယ်။ အဲ့ဒီမှာ အလားအလာကောင်းတွေကို ကျွန်တော် မြင်ခဲ့ရပါတယ်" လို့ ကားရစ်က ကလပ်အသင်းဝဘ်ဆိုက်ကို ပြောကြားခဲ့ပါတယ်။

"ကွင်းရဲ့အရှေ့ပိုင်း တိုက်စစ်ပိုင်းမှာဆိုရင်တော့ လေ့ကျင့်မှုစတာ တစ်ပတ်ပဲ ရှိသေးတာကြောင့် ကျွန်တော်တို့ မျှော်လင့်ထားတဲ့ ထက်မြက်တဲ့ လှုပ်ရှားမှုတွေနဲ့ ကောင်းမွန်တဲ့ အခိုက်အတန့်တွေကတော့ လေ့ကျင့်ရေးအပတ်တွေ ကြာလာတာနဲ့အမျှ တဖြည်းဖြည်း ရရှိလာမှာပါ။ အခြေအနေကတော့ ဒါပါပဲ။ အန်ဒရေးရဲ့ ပထမဆုံးပွဲမှာ အလားအလာကောင်းတွေ တွေ့ရပြီး သူကလည်း ကစားကွက် အရှိန်အဟုန်ကို ပြန်ရလာတာကြောင့် သူ့ကို ယူနိုက်တက်ရဲ့ အင်္ကျီအနီရောင်နဲ့ မြင်ရတာ တကယ်ကို ဝမ်းသာစရာပါပဲ" လို့ ဆိုပါတယ်။