စပိန်စူပါစတား ယာမယ်လ် ကမ္ဘာ့ဖလားပြိုင်ပွဲကို သွားရောက်ယှဉ်ပြိုင်ဖို့ ရှိနေချိန်မှာ သူ့ရဲ့ ကြံ့ခိုင်မှုအခြေအနေနဲ့ ပတ်သက်ပြီး ဘာစီလိုနာ အသင်းက စိုးရိမ်နေတယ်လို့ သတင်းတွေ ထွက်ပေါ်နေပါတယ်။

အသက် ၁၈ နှစ်အရွယ်ရှိပြီဖြစ်တဲ့ ယာမယ်လ်ဟာ ပြီးခဲ့တဲ့ ဧပြီလနှောင်းပိုင်းက ဆယ်လ်တာဗီဂို အသင်းကို ၁ ဂိုး - ဂိုးမရှိနဲ့ နိုင်ခဲ့တဲ့ ဘာစီလိုနာအသင်းရဲ့ ပွဲစဉ်မှာ ပြင်းထန်တဲ့ ပေါင်နောက်ကြောဒဏ်ရာ ရရှိခဲ့တာဖြစ်ပြီး၊ အဲဒီအချိန်ကတည်းက ပွဲထွက်ကစားနိုင်ခြင်း မရှိသေးပါဘူး။

လာမယ့် တနင်္လာနေ့ (ဇွန်လ ၁၅ ရက်) မှာ ကိပ်ဗာဒီ အသင်းနဲ့ ကစားရမယ့် စပိန်အသင်းရဲ့ ကမ္ဘာ့ဖလားအဖွင့်ပွဲစဉ်မှာ ပါဝင်ကစားနိုင်ဖို့ ယာမယ်လ်က ကြိုးစားပြင်ဆင်နေပြီး၊ စပိန်အသင်းမန်နေဂျာ လူးဝစ် ဒီလာဖွန်တေး ကလည်း သူ ပွဲထွက်ခွင့်ရဖို့ အလားအလာရှိကြောင်း အတည်ပြုပြောကြားထားပါတယ်။

"ဒီကစားသမားတွေ (ယာမယ်လ်၊ မိခေးလ် မီရီနို၊ နီကို ဝီလျံစ်) ဟာ ဒဏ်ရာကနေ ပြန်လည်သက်သာလာဖို့ တိုးတက်မှုကောင်းတွေ ရှိနေပါတယ်" ဟု ၎င်းက ပြောကြားခဲ့ပါတယ်။

"သူတို့အားလုံး ပထမပွဲစဉ်မှာ ပါဝင်နိုင်လိမ့်မယ်လို့ ကျွန်တော် ထင်ပါတယ်။ ဒါပေမဲ့ အဲဒီပွဲမှာ သူတို့ကို ပေးကစားဖို့ ထိုက်တန်ရဲ့လားဆိုတာကိုတော့ ဆန်းစစ်ရပါဦးမယ်။ ဒဏ်ရာပြန်ရနိုင်တဲ့ စွန့်စားရမှုကြောင့်တင်မကဘဲ ကျွန်တော်တို့ရဲ့ အဓိကပစ်မှတ်က ဒုတိယပွဲ ဒါမှမဟုတ် တတိယပွဲစဉ်တွေထက်မက ပိုပြီး အဝေးကြီးကို ရည်မှန်းထားလို့ ဖြစ်ပါတယ်"

Sport မီဒီယာရဲ့ ဖော်ပြချက်အရ ဘာစီလိုနာအသင်းဟာ ယာမယ်လ်ကို စောစောစီးစီး ကွင်းအတွင်း ပြန်လည်စေလွှတ်လိုက်ရင် ဒဏ်ရာကနေ သေသေချာချာ သက်သာပျောက်ကင်းဦးမှာ မဟုတ်ဘူးလို့ စိုးရိမ်နေကြကြောင်း သိရပါတယ်။