မန်ချက်စတာစီးတီးအသင်းရဲ့ တိုက်စစ်မှူး အာလင်းဟာလန်းဟာ တနင်္ဂနွေနေ့က အီတီဟတ်ကွင်းမှာ ကျင်းပခဲ့တဲ့ ပက်ဂွါဒီယိုလာရဲ့ နှုတ်ဆက်ပွဲစဉ်မှာ ပါဝင်ကစားခဲ့ခြင်းမရှိပေမဲ့ ၄ ရာသီအတွင်း ၎င်းရဲ့ တတိယမြောက် ပရီးမီးယားလိဂ် ရွှေဖိနပ်ဆု (Golden Boot) ကို ဆွတ်ခူးနိုင်ခဲ့ပါတယ်။

မန်စီးတီးအသင်းဟာ နည်းပြဂွါဒီယိုလာရဲ့ ဆုဖလားအောင်မြင်မှုတွေနဲ့ ပြည့်နှက်နေတဲ့ ၁၀ နှစ်တာကာလအတွက် နောက်ဆုံးပွဲအဖြစ် ဂုဏ်ပြုကျင်းပခဲ့တဲ့ အက်စတွန်ဗီလာကို ၂ ဂိုး ၁ ဂိုးနဲ့ ရှုံးနိမ့်ခဲ့တဲ့ပွဲစဉ်မှာ အာလင်းဟာလန်းကို လူစာရင်းကနေ ချန်လှပ်ထားခဲ့တာ ဖြစ်ပါတယ်။

နော်ဝေကြယ်ပွင့် အာလင်းဟာလန်းဟာ ဒီရာသီ ပရီးမီးယားလိဂ် ၃၅ ပွဲ ကစားခဲ့ပြီး ၂၇ ဂိုးအထိ သွင်းယူပေးခဲ့ပေမဲ့ မန်စီးတီးကတော့ အာဆင်နယ်အသင်းရဲ့ ပရီးမီးယားလိဂ်ချန်ပီယံဖြစ်မှုကို တားဆီးနိုင်ဖို့ ကြိုးစားရာမှာ အနည်းငယ် လိုအပ်ချက်တွေရှိခဲ့ပြီး ဒုတိယနေရာနဲ့ပဲ ကျေနပ်ခဲ့ရပါတယ်။

အာလင်းဟာလန်းဟာ အခုဆိုရင် ဒီဆုကို ၃ ကြိမ်စီ ရရှိထားကြတဲ့ အလန်ရှီးယား၊ ဟာရီကိန်းတို့နဲ့အတူ စာရင်းဝင်သွားခဲ့ပြီဖြစ်သလို ပရီးမီးယားလိဂ်ခေတ်အတွင်း ဒီဆုကို ၄ ကြိမ်စီ ရရှိထားတဲ့ မိုဟာမက်ဆာလာနဲ့ သီယာရီဟင်နရီတို့ရဲ့ စံချိန်ကို လိုက်မီဖို့ပဲ ကျန်ပါတော့တယ်။

ဘရန့်ဖို့ဒ်တိုက်စစ်မှူး အီဂေါသီယာဂိုကတော့ ၂၂ ဂိုးနဲ့ ဟာလန်းရဲ့နောက် ဒုတိယနေရာမှာ ရပ်တည်နိုင်ခဲ့ပြီး ဒီခြေစွမ်းကြောင့်ပဲ ဘရာဇီးအသင်းရဲ့ ကမ္ဘာ့ဖလားလူစာရင်းမှာ ရွေးချယ်ခြင်း ခံခဲ့ရပါတယ်။

အာလင်းဟာလန်းဟာ ရာသီအစမှာ အလွန်ကောင်းမွန်တဲ့ ပုံစံရှိခဲ့ပြီး ပထမဆုံး ၁၇ ပွဲမှာတင် ပရီးမီးယားလိဂ်သွင်းဂိုး ၁၉ ဂိုးအထိ သွင်းယူထားနိုင်ခဲ့တာ ဖြစ်ပါတယ်။

ဂွါဒီယိုလာရဲ့အသင်း အောင်မြင်မှုရဖို့အတွက် ၎င်းဟာ ဘယ်လောက်အထိ အရေးပါသလဲဆိုတာကို ကြုံတောင့်ကြုံခဲ ဂိုးပေါက်ပျောက်ဆုံးနေတဲ့ အချိန်တွေမှာ သိသာခဲ့ပြီး အဲဒီကာလတွေကြောင့်ပဲ မန်စီးတီးတို့ ချန်ပီယံဆု လက်လွှတ်ခဲ့ရတာလို့ ဆိုနိုင်ပါတယ်။

အာလင်းဟာလန်းဟာ နှစ်သစ်ကူးကာလဝန်းကျင် ၇ ပွဲကစားရာမှာ ဘရိုက်တန်အသင်းနဲ့ပွဲက ပင်နယ်တီတစ်ဂိုးတည်းသာ သွင်းယူနိုင်ခဲ့ပြီး အဲဒီကာလအတွင်း မန်စီးတီးအသင်းဟာ ၂ ပွဲသာ အနိုင်ရရှိခဲ့ပါတယ်။

အသက် ၂၅ နှစ်အရွယ် တိုက်စစ်မှူးဟာ ရာသီကုန်ခါနီးအချိန်မှာတော့ ခြေစွမ်းပြန်လည်ကောင်းမွန်လာခဲ့ပြီး ပြီးခဲ့တဲ့လက ချန်ပီယံလုပွဲလို့ သတ်မှတ်ခဲ့ကြတဲ့ လီဗာပူး၊ အာဆင်နယ်တို့နဲ့ပွဲစဉ်တွေမှာ အနိုင်ဂိုးတွေ သွင်းယူပေးခဲ့ပါသေးတယ်။

ဒါပေမဲ့ အာလင်းဟာလန်းက အဆိုပါနှစ်ပွဲလုံးမှာ ဂိုးသွင်းယူနိုင်ခဲ့ပေမဲ့ မန်စီးတီးအသင်းဟာ အဲဗာတန်နဲ့ ဘုန်းမောက်တို့ကို ရှုံးနိမ့်ပြီး အမှတ်လျော့ခဲ့တာကြောင့် အာဆင်နယ်အသင်းဟာ ၂၂ နှစ်အကြာမှာ ပထမဆုံးအကြိမ်အဖြစ် ချန်ပီယံဆုကို ဆွတ်ခူးသွားနိုင်ခဲ့တာ ဖြစ်ပါတယ်။