ချန်ပီယံလိဂ်ဆုဖလားစိန်ခေါ်နိုင်မယ့်အသင်းဆီ ပြောင်းရွှေ့ဖို့ အိုစီမန်ကို တိုက်တွန်းလိုက်တဲ့ အန်ဆိုဖာ
အင်တာမီလန်တိုက်စစ်မှူးဟောင်းအိုဘင်နာအန်ဆိုဖာက ချန်ပီယံလိဂ်ဆုဖလားကို အမြဲတမ်းစိန်ခေါ်နိုင်မယ့် ကလပ်အသင်းတစ်ခုဆီ ပြောင်းရွှေ့ဖို့အတွက် ဂါလာတာစာရေးအသင်းမှထွက်ခွာဖို့ပြင်ဆင်နေတဲ့ အိုစီမန်ကို တိုက်တွန်းလိုက်ပါတယ်။
နိုင်ဂျီးရီးယားလက်ရွေးစင်ကစားသမားဟောင်းက တူရကီကလပ်ရဲ့ဥရောပပုံရိပ်ကို အသိအမှတ်ပြုပေမဲ့ စူပါအီးဂဲလ်စ်တိုက်စစ်မှူး အိုစီမန်အတွက် ကမ္ဘာ့အကောင်းဆုံးတိုက်စစ်မှူးတစ်ဦးအဖြစ် အပြည့်အဝ သတ်မှတ်ခံရဖို့ဆိုရင် ဥရောပရဲ့ထိပ်တန်းလိဂ်တစ်ခုမှာ မိမိကိုယ့်ကိုယ် စမ်းသပ်ပြရမယ်လို့ ယုံကြည်နေပါတယ်။
"ဗစ်တာအိုစီမန်က ဂါလာတာစာရေးမှာ လုပ်ပြနိုင်သလောက် လုပ်ပြပြီးပါပြီ။ သူသာ ကမ္ဘာ့အကောင်းဆုံးတိုက်စစ်မှူး တကယ်ဖြစ်ချင်တယ်ဆိုရင် ချန်ပီယံလိဂ်ဖလားအတွက် အမှန်အကန်ယှဉ်ပြိုင်နိုင်တဲ့ အသင်းဆီကို ပြောင်းရွှေ့ရပါမယ်" လို့ အန်ဆိုဖာက Brila FM ကို ပြောကြားခဲ့ပါတယ်။
ဆက်လက်ပြီး အန်ဆိုဖာက "လက်ရှိမှာ သူ့ကို ထိပ်ဆုံးအဆင့်နဲ့ကွာခြားနေစေတဲ့ တစ်ခုတည်းသော အရာကတော့ ဥရောပရဲ့ထိပ်ဆုံးအဆင့်မှာ အောင်မြင်မှုရယူနိုင်ခြင်းဆိုတာပါပဲ။ ဂါလာတာစာရေးက အသင်းကြီးတစ်ခုဆိုတာ ဘယ်သူမှမငြင်းနိုင်ပေမဲ့ ချန်ပီယံလိဂ်ဖလားရနိုင်မယ့်အသင်းတွေအကြောင်း ပြောမယ်ဆိုရင်တော့ သူတို့က ရေပန်းအစားဆုံးအသင်းတွေထဲမှာ မပါဝင်ပါဘူး။ အိုစီမန်က ရာသီတိုင်းမှာ အကောင်းဆုံးတိုက်စစ်မှူးတွေနဲ့အတူ အဆင့်မြင့်မြင့်ယှဉ်ပြိုင်ရမယ့်အဆင့်ကို ရောက်နေပါပြီ" လို့ ပြောကြားသွားခဲ့ပါတယ်။
