အာဆင်နယ်အသင်းက ဝက်စ်ဟမ်းကို ၁-၀ နဲ့ အငြင်းပွားဖွယ် အနိုင်ရရှိခဲ့တဲ့ပွဲစဉ်အပြီးမှာတော့ မန်ယူဂန္ထဝင်ဂိုးသမားဟောင်း ပီတာရှမိုက်ကယ်က ဒိုင်လူကြီးတွေရဲ့ ဆုံးဖြတ်ချက်အပေါ် ပြင်းပြင်းထန်ထန် ဝေဖန်လိုက်ပါတယ်။ ပွဲနှောင်းပိုင်းမှာ ဝက်စ်ဟမ်းတိုက်စစ်မှူး ကာလမ်ဝီလ်ဆင် သွင်းယူခဲ့တဲ့ ချေပဂိုးကို VAR စစ်ဆေးပြီးနောက် ပယ်ဖျက်ခဲ့တဲ့အတွက် စမိုက်ကယ်က အကြီးအကျယ် ဒေါသထွက်နေတာပါ။ ကွင်းလယ်ဒိုင် ခရစ်ကာဗာနာနဲ့ VAR ဒိုင် ဒါရင်အင်းဂလန်တို့ဟာ ဝက်စ်ဟမ်းကစားသမား ပါဘလိုက အာဆင်နယ်ဂိုးသမား ဒေးဗစ်ရာယာအပေါ် ပြစ်ဒဏ်ကျူးလွန်ခဲ့တယ်လို့ ဆုံးဖြတ်ပြီး အဲဒီဂိုးကို ပယ်ဖျက်ခဲ့တာ ဖြစ်ပါတယ်။

ဒိန်းမတ်ဂန္ထဝင်ကြီး စမိုက်ကယ်က Viaplay နဲ့ အင်တာဗျူးမှာ ပြောကြားရာမှာတော့ ဒိုင်လူကြီးတွေရဲ့ ဆုံးဖြတ်ချက်တွေဟာ တစ်သမတ်တည်းမရှိဘဲ မညီမညာဖြစ်နေတယ်လို့ ဆိုပါတယ်။ ဇယားထိပ်က အာဆင်နယ်အသင်းသားတွေဟာ အခုလိုမျိုး ကိုယ်ထိလက်ရောက် တိုက်ခိုက်မှုတွေ လုပ်လေ့ရှိပေမဲ့ အပြစ်ပေးမခံရဘဲ ကျော်ဖြတ်နိုင်ခဲ့တာတွေ ခဏခဏရှိတယ်လို့ သူက ထောက်ပြခဲ့ပါတယ်။

"တကယ် စိတ်တိုစရာကောင်းတာက ဒါကိုသာ ဖရီးကစ်ပေးမယ်ဆိုရင် အာဆင်နယ်ဟာ ဘယ်တော့မှ ဇယားထိပ်ကို ရောက်လာမှာ မဟုတ်ပါဘူး။ သူတို့ အခုလို ဂိုးတွေအများကြီး သွင်းနေတာက တခြားကစားသမားတွေကို ပိတ်ဆို့တာ၊ ဆွဲထားတာ စတဲ့ နည်းလမ်းအမျိုးမျိုးနဲ့ သွင်းယူခဲ့ကြတာပါ" လို့ စမိုက်ကယ်က ပြောပါတယ်။

သူက ဆက်လက်ပြီး "VAR ဒိုင် ဒါရင်အင်းဂလန်က ဒီဖြစ်ရပ်ကို ၅ မိနစ်လောက်ကြာအောင် အထပ်ထပ်အခါခါ ပြန်ကြည့်နေခဲ့တာပါ။ အဲဒီလို အချိန်အကြာကြီး ပြန်ကြည့်နေရတယ်ဆိုကတည်းက ဒီဆုံးဖြတ်ချက်ဟာ ဖရီးကစ်မဖြစ်သင့်ဘူးဆိုတာကို သံသယဖြစ်စရာ ဖြစ်နေပါပြီ။ ဒါက တကယ်ကို မှားယွင်းနေတယ်လို့ ကျွန်တော်ထင်ပါတယ်။ တစ်ရာသီလုံးမှာ ဘယ်အသင်းကိုမှလည်း အခုလိုမျိုး ဖရီးကစ် မပေးခဲ့ဖူးဘဲ ဘာလို့ အခုမှ ရုတ်တရက်ကြီး ဖရီးကစ်ပေးလိုက်တာလဲဆိုတာ နားမလည်နိုင်ပါဘူး။ ဒါတွေက တကယ်ကို ရူးကြောင်ကြောင်နိုင်လွန်းပါတယ်။ ဒီနေ့ ဆုံးဖြတ်ချက်ကတော့ ဘက်ပေါင်းစုံကနေ ကြည့်ရင် လုံးဝကို မှားယွင်းနေပါတယ်" လို့ ပြင်းပြင်းထန်ထန် ဝေဖန်သွားခဲ့ပါတယ်။