ကိုဘီ မိုင်နူးဟာ သူ့ရဲ့အနာဂတ်ကို အသင်းမှာပဲ ဆက်လက်မြှုပ်နှံဖို့အတွက် မန်ချက်စတာ ယူနိုက်တက်နဲ့ စာချုပ်သစ် ချုပ်ဆိုလိုက်ပြီလို့ သတင်းတွေအရ သိရပါတယ်။

သတင်းတွေရဲ့ ဖော်ပြချက်အရ အင်္ဂလန်လက်ရွေးစင်ကစားသမားလေးရဲ့ တစ်ပတ်လုပ်ခဟာ အရင်ကရရှိနေတဲ့ ပေါင် ၂၅,၀၀၀ ဝန်းကျင်ကနေ အခြေခံလုပ်ခ ပေါင် ၁၅၀,၀၀၀ အထိ ခုန်တက်သွားမှာဖြစ်ပြီး ဒါဟာ အသင်းမှာ သူရရှိထားတဲ့ အခန်းကဏ္ဍနဲ့ ပိုမိုကိုက်ညီတဲ့ ပမာဏလည်း ဖြစ်ပါတယ်။

နာမည်ကြီးသတင်းထောက် ဖာဘရီဇီယို ရိုမာနိုရဲ့ အဆိုအရ ယူနိုက်တက် အကယ်ဒမီထွက် ကစားသမားလေးဟာ ၂၀၃၁ ခုနှစ် ဇွန်လအထိ အသင်းနဲ့ စာချုပ်သက်တမ်း တိုးမြှင့်လိုက်တာဖြစ်ပြီး ဒါဟာ အသက် ၂၁ နှစ်အရွယ် ကစားသမားအတွက် ရေရှည်စာချုပ်တစ်ခု ဖြစ်ပါတယ်။

"သတင်းထူးအနေနဲ့ ကိုဘီ မိုင်နူးဟာ ယူနိုက်တက်နဲ့ စာချုပ်သစ်အတွက် အချက်အလက်အားလုံးကို သဘောတူညီမှု ရရှိခဲ့ပြီဖြစ်ပြီး လက်မှတ်ထိုးဖို့ အဆင်သင့် ဖြစ်နေပါပြီ။ သတင်းတွေမှာ အမြဲဖော်ပြခဲ့သလိုပဲ ဒီစာချုပ်သစ်ဟာ လစာတိုးပေးမှုနဲ့အတူ ၂၀၃၁ ဇွန်လအထိ သက်တမ်းရှိမှာပါ။ ရာသီမကုန်ခင်မှာ တရားဝင်ကြေညာသွားမှာဖြစ်ပြီး မိုင်နူးအနေနဲ့ ဒီအပတ်အတွင်းမှာပဲ လက်မှတ်ထိုးနိုင်ပါတယ်" လို့ ရိုမာနိုက ဆိုပါတယ်။

ရူဘင် အမော်ရင် ထွက်ခွာသွားပြီးနောက် ယာယီနည်းပြ မိုက်ကယ် ကာရစ်ဟာ ရာသီအစကတည်းက မိုင်နူးကို အသင်းမှာ ပြန်လည်အသုံးပြုခဲ့တာကြောင့် အခုနွေရာသီမှာ သူထွက်ခွာတော့မယ်ဆိုတဲ့ ကောလာဟလတွေကို အဆုံးသတ်နိုင်ခဲ့ပြီး ပွဲကစားခွင့်တွေလည်း ပိုမိုရရှိလာခဲ့ပါတယ်။

ဒီကွင်းလယ်လူဟာ အခုရာသီကုန်အထိ နာပိုလီအသင်းဆီ ၆ လအငှားနဲ့ သွားရောက်ကစားဖို့ ထွက်ခွာခါနီးအခြေအနေအထိ ရောက်ရှိခဲ့ပေမဲ့ အခုအခါမှာတော့ ပရီးမီးယားလိဂ်အသင်းကြီးမှာပဲ ဆက်ရှိနေဖို့ စိတ်ကူးထားပုံရပါတယ်။

ပြီးခဲ့တဲ့ တနင်္လာနေ့က ဘရန့်ဖို့ဒ်ကို ၂-၁ နဲ့ အနိုင်ရရှိခဲ့တဲ့ပွဲစဉ်ကြောင့် ယူနိုက်တက်ဟာ လာမယ့်ရာသီ ချန်ပီယံလိဂ်ဝင်ခွင့်အတွက် အဆင့် ၆ နေရာက ဘရိုက်တန်ထက် ၁၁ မှတ်အသာနဲ့ အခွင့်အရေးသာနေပြီး ဒီအချက်ကလည်း ပြီးခဲ့တဲ့ အပတ်တွေအတွင်း မိုင်နူးနဲ့ ဆွေးနွေးမှုတွေကို ပိုမိုအဆင်ပြေချောမွေ့စေခဲ့ပါတယ်။