ဘရန့်ဖို့ဒ်ကို အနိုင်ရရှိခဲ့တဲ့ပွဲစဉ်မှာ ကစားသမားတွေရဲ့ စိတ်ဓာတ်နဲ့ စည်းလုံးမှုအပေါ် မိုက်ကယ်ကာရစ် ကျေနပ်အားရနေ
တနင်္လာနေ့ညက ဘရန့်ဖို့ဒ်ကို ၂-၁ ဂိုးနဲ့ အနိုင်ရရှိခဲ့တဲ့ပွဲစဉ်အပေါ် မန်ချက်စတာယူနိုက်တက်နည်းပြ မိုက်ကယ်ကားရစ်က ကျေနပ်အားရမှု ရှိနေပါတယ်။ အဆိုပါပွဲစဉ်မှာ ယူနိုက်တက်အတွက် အနိုင်ဂိုးတွေကို ကတ်စီမီရိုနဲ့ ဘန်ဂျမင်ဆက်စကိုတို့က သွင်းယူပေးခဲ့တာပါ။
ပွဲအပြီးမှာတော့ ကားရစ်က "တစ်ခါတလေမှာ ပွဲက တော်တော်လေး အပြန်အလှန်ရှိပြီး ပွင့်ပွင့်လင်းလင်း ရှိခဲ့ပါတယ်။ ကျွန်တော်တို့ ပွဲစတာ တကယ့်ကို ကောင်းမွန်ခဲ့ပါတယ်။ ဘရန့်ဖို့ဒ်ကိုလည်း အသိအမှတ်ပြုရပါမယ်၊ သူတို့က အသင်းကောင်းတစ်သင်းဖြစ်သလို သူတို့ ကောင်းတယ်ဆိုတာကိုလည်း ကျွန်တော်တို့ သိထားပြီးသားပါ။ သူတို့ ပွဲထဲကို နည်းနည်း ပြန်ဝင်လာနိုင်ခဲ့ပြီး ပထမပိုင်းအပြီးမှာ အနေအထားကောင်းတစ်ခုမှာ ရှိနေခဲ့လို့ ကျွန်တော်တို့ ဒုတိယပိုင်းမှာ အပြောင်းအလဲတချို့ လုပ်ခဲ့ရပါတယ်။ ပွဲပြီးခါနီးမှာ သူတို့ အခွင့်အရေးတချို့ ရခဲ့ပေမဲ့ ကစားသမားတွေရဲ့ စိတ်ဓာတ်၊ ကြိုးစားအားထုတ်မှုနဲ့ စည်းလုံးညီညွတ်မှုတွေကတော့ တကယ့်ကို အံ့ဩစရာကောင်းခဲ့ပါတယ်။ အခုလိုအချိန်က ရလဒ်ကောင်းဖို့ အရေးကြီးတဲ့အချိန်ဖြစ်ပြီး ကျွန်တော်တို့ ရမှတ်တွေ ရအောင်ယူဖို့ လိုအပ်နေတာပါ" လို့ ပြောကြားခဲ့ပါတယ်။
ဘရူနိုဖာနန်ဒက်စ်ရဲ့ နောက်ထပ် ဂိုးဖန်တီးမှုတစ်ကြိမ် ပြုလုပ်နိုင်ခဲ့တာနဲ့ ပတ်သက်ပြီးတော့လည်း "ကျွန်တော်တို့ ပွဲတိုင်းလိုလို ဂိုးသွင်းနိုင်ခဲ့ပြီး ဘရူနိုက အဲ့ဒီအတွက် အဓိက အစိတ်အပိုင်းတစ်ခု ဖြစ်ပါတယ်။ သူက နောက်ထပ် ဂိုးဖန်တီးမှုတစ်ခု ထပ်ရနိုင်သလို ကိုယ်တိုင်လည်း ဂိုးသွင်းနိုင်ခဲ့မှာပါ" လို့ ဆိုပါတယ်။
ဘရန့်ဖို့ဒ်က ချေပဂိုးတစ်ဂိုး ပြန်သွင်းပြီးနောက် ပွဲကို အဆုံးသတ်နိုင်ခဲ့ပုံနဲ့ ပတ်သက်ပြီး မေးမြန်းရာမှာတော့ ကားရစ်က "ဒါက ခက်ခဲတဲ့ လိဂ်ပြိုင်ပွဲတစ်ခုရဲ့ ခက်ခဲတဲ့ ပွဲသိမ်းပိုင်းပါပဲ။ ကျွန်တော်တို့ အခုလို အနိုင်ရလဒ်တွေ အများကြီး ရရှိထားတဲ့အပေါ် တကယ့်ကို ဝမ်းသာမိပါတယ်။ ဒီနေ့ပွဲကတော့ ကျွန်တော်တို့အတွက် သုံးမှတ်ရဖို့က အဓိကပါပဲ။ ဒါဟာ နောက်ထပ် အနိုင်ရရှိမှု တစ်ခုဖြစ်သလို ရှေ့မှာလည်း အရေးကြီးတဲ့ ပွဲစဉ်တွေ လာဦးမှာဖြစ်လို့ အဲ့ဒီပွဲတွေအတွက် မျှော်လင့်နေပါတယ်" လို့ နိဂုံးချုပ် ပြောကြားသွားခဲ့ပါတယ်။
