မန်စီးတီးအတွက် အနိုင်ဂိုးသွင်းပေးနိုင်ခဲ့တာဟာ သူ့အတွက် အရမ်းကောင်းတဲ့ အခိုက်အတန့်ဖြစ်တယ်လို့ ဟာလန်း ဆို
အာဆင်နယ်နဲ့ ကစားခဲ့တဲ့ တနင်္ဂနွေနေ့ပွဲစဉ်မှာ မန်စီးတီးအတွက် အနိုင်ဂိုးသွင်းယူပေးခဲ့ပြီးနောက် အာလင်းဟော်လန်းက အသင်းဖော်တွေကို အာရုံစိုက်မှုအပြည့်ထားကြဖို့ တိုက်တွန်းလိုက်ပါတယ်။ အဲဒီပွဲမှာ ၂-၁ ဂိုးနဲ့ အနိုင်ရခဲ့တာကြောင့် မန်စီးတီးဟာ လက်ကျန်ပွဲတစ်ပွဲ ကစားဖို့ ကျန်ရှိနေသေးသလို အမှတ်ပေးဇယားထိပ်က အသင်းနဲ့ အမှတ်ကွာခြားမှုကို ၃ မှတ်အထိ လျှော့ချနိုင်ခဲ့တာပါ။ ပွဲအပြီးမှာတော့ ဟော်လန်းက "ကျွန်တော် တကယ်ကို ပျော်ရွှင်မိပါတယ်။ ဒါဟာ ကျွန်တော့်အတွက် အရမ်းကောင်းတဲ့ အခိုက်အတန့်ဖြစ်သလို အရမ်းကောင်းတဲ့ နိုင်ပွဲတစ်ခုလည်း ဖြစ်ပါတယ်" လို့ ပြောခဲ့ပါတယ်။ ဆက်လက်ပြီး သူက "ပွဲတွေကတော့ အမြဲတမ်း ဒီလိုပါပဲ၊ အားစိုက်ရတာတွေ၊ တိုက်ပွဲဝင်ရတာတွေ အများကြီး ရှိပါတယ်။ ဒါက အမြဲတမ်း ကောင်းမွန်တဲ့ ခံစားချက်ပါပဲ။ ကျွန်တော် တိုက်ပွဲမှာ အနိုင်ရခဲ့သလား၊ မရခဲ့ဘူးလားဆိုတာကိုတော့ တခြားသူတွေပဲ ဆုံးဖြတ်ပေးကြမှာပါ။ ဂိုးသွင်းလိုက်တဲ့ အချိန်မှာတော့ ကျွန်တော် အနိုင်ရခဲ့တယ်လို့ပဲ ဆိုရမှာပေါ့။ ဖြတ်တင်ဘောကလည်း ကောင်းသလို အဆုံးသတ်ကလည်း ပြည့်စုံခဲ့ပါတယ်။ အဲဒါက တကယ်ကို ကောင်းမွန်တဲ့ဂိုးဖြစ်ပြီး အဆုံးအဖြတ်ပေးနိုင်တဲ့ အခိုက်အတန့်ဖြစ်ခဲ့လို့ နောက်ဆုံးမှာ ကျွန်တော်တို့ အနိုင်ရခဲ့တာပါ" လို့ ဆိုပါတယ်။ "ကျန်ရှိနေတဲ့ ပွဲစဉ်တိုင်းဟာ ဗိုလ်လုပွဲတွေပါပဲ။ အခု ဒီမှာ စကားပြောပြီးတာနဲ့ ဘန်လေနဲ့ပွဲအတွက် ပြင်ဆင်မှုတွေ စတင်ရတော့မှာပါ။ အဲဒီပွဲကလည်း ဒီပွဲလိုပဲ အရေးကြီးပါတယ်။ ကျွန်တော်တို့ အာရုံစိုက်ဖို့ လိုပါတယ်။ နှိမ့်ချမှုရှိရှိနဲ့ အများကြီး မတွေးဘဲ နောက်လာမယ့်ပွဲကိုပဲ အာရုံစိုက်သွားဖို့ လိုပါတယ်" လို့ ဟော်လန်းက ပြောကြားခဲ့ပါတယ်။
