အာဆင်နယ်အသင်းဟာ ဒီတစ်ပတ်မှာ ချန်ပီယံလိဂ် ကွာတားဖိုင်နယ် ပထမအကျော့ပွဲစဉ်အဖြစ် လစ္စဘွန်းမြို့ကို သွားရောက်ပြီး စပို့တင်းအသင်းနဲ့ အဝေးကွင်းမှာ ရင်ဆိုင်ရမှာ ဖြစ်ပါတယ်။

ဂန်းနားတို့ဟာ EFL Cup ဗိုလ်လုပွဲမှာ မန်စီးတီးကို ရှုံးနိမ့်ခဲ့သလို၊ ပြီးခဲ့တဲ့ စနေနေ့က ကစားခဲ့တဲ့ FA Cup ကွာတားဖိုင်နယ်မှာလည်း ဆောက်သမ်တန်ကို ၂-၁ ဂိုးနဲ့ ရှုံးနိမ့်ခဲ့တာကြောင့် ပြီးခဲ့တဲ့ သီတင်းပတ်အနည်းငယ်ဟာ အသင်းအတွက် တကယ်ကို ခက်ခဲတဲ့ အချိန်တွေ ဖြစ်ခဲ့ပါတယ်။

အခုအခါမှာတော့ ဗစ်တာ ဂယိုကေးရက်စ်ဟာ ချန်ပီယံလိဂ် ဆီမီးဖိုင်နယ် အဆင့်ကို တက်လှမ်းနိုင်ဖို့အတွက် သူ့ရဲ့ အသင်းဟောင်းရှိရာ ပေါ်တူဂီနိုင်ငံကို ပြန်လည်ခြေချလာပြီ ဖြစ်ပါတယ်။

ဒါပေမဲ့ စပို့တင်းအသင်းအတွက် ကံမကောင်းတာကတော့ သူတို့ရဲ့ အသင်းခေါင်းဆောင် မော်တင် ဟူးလ်မန်းဟာ ပြီးခဲ့တဲ့ ဥရောပပွဲစဉ်ဖြစ်တဲ့ ဘိုဒိုဂလင့်မ်နဲ့ ပွဲမှာ အဝါကတ် ပြသခံခဲ့ရတာပါ။ ဒါဟာ သူ့အတွက် ဒီရာသီပြိုင်ပွဲအတွင်း ၅ ကြိမ်မြောက် အဝါကတ် ဖြစ်ပါတယ်။

ဒါကြောင့် သူဟာ တစ်ပွဲပယ်ပြစ်ဒဏ် ကျခံရမှာဖြစ်လို့ လာမယ့် အင်္ဂါနေ့ညမှာ ကစားမယ့် အာဆင်နယ်နဲ့ပွဲကို စပို့တင်းအသင်းအတွက် ဦးဆောင်ကစားပေးနိုင်တော့မှာ မမဟုတ်ပါဘူး။ ဒါဟာ အင်အားချင်း မမျှတဖြစ်နေတဲ့ ပေါ်တူဂီကလပ်အတွက်တော့ တကယ်ကို လက်ခံရခက်တဲ့ သတင်းဆိုးပါပဲ။

အာဆင်နယ်အနေနဲ့ ချန်ပီယံလိဂ်မှာ နှစ်နှစ်ဆက်တိုက် ဆီမီးဖိုင်နယ် အဆင့်ကို တက်လှမ်းဖို့ (သမိုင်းတစ်လျှောက် စတုတ္ထအကြိမ်မြောက်) ရည်မှန်းထားချိန်မှာ ဟူးလ်မန်းက အိမ်ကွင်းပရိသတ်တွေရှေ့မှာ ကစားနိုင်မှာ မဟုတ်တာဟာ အာဆင်နယ်အတွက်တော့ အားသာချက်တစ်ခု ဖြစ်လာစေပါတယ်။

ချန်ပီယံလိဂ်ရဲ့ စည်းမျဉ်းအရ အဝါကတ် ၃ ကတ် ပြသခံရရင် တစ်ပွဲပယ်ခံရမှာဖြစ်ပြီး၊ အဲဒီနောက်ပိုင်းမှာတော့ ပွဲစဉ်အရေအတွက် ကန့်သတ်ချက်ရှိတာကြောင့် အဝါကတ် ၂ ကတ်ပြတိုင်း တစ်ပွဲပယ်ပြစ်ဒဏ် ကျခံရမှာ ဖြစ်ပါတယ်။

ဒါကြောင့် အာဆင်နယ်ကစားသမားတွေဖြစ်တဲ့ မာတင် ဇူဘီမန်ဒီ နဲ့ ခရစ်စတီယန် နော်ဂတ်တို့အနေနဲ့လည်း သတိထားဖို့ လိုအပ်နေပါတယ်။ သူတို့နှစ်ဦးထဲက တစ်ယောက်ယောက်သာ စပို့တင်းနဲ့ပွဲမှာ နောက်ထပ် အဝါကတ် ထပ်ရရင် အလိုအလျောက် တစ်ပွဲပယ်ပြစ်ဒဏ် ထိမှာ ဖြစ်ပါတယ်။

ဟူးလ်မန်းဟာ ဒီရာသီမှာ ပြိုင်ပွဲစုံ ၃၆ ပွဲ ကစားထားပြီး ၂ ဂိုးသွင်းကာ ၅ ဂိုး ဖန်တီးပေးထားသူပါ။ အခုတော့ သူဟာ အင်္ဂါနေ့ညမှာ သူ့အသင်းရဲ့ တိုက်ပွဲကို ကွင်းဘေးကနေပဲ ကြည့်ရှုရတော့မှာ ဖြစ်ပါတယ်။