ဂျိုရှူအာ ဇက်ခ်ဇီဟာ ဒီနွေရာသီမှာ မန်ချက်စတာ ယူနိုက်တက်ကနေ ထွက်ခွာတော့မယ်လို့ သတင်းတွေ ထွက်ပေါ်နေပေမဲ့ သူကိုယ်တိုင်ကတော့ ဒါဟာ ဖြစ်လာဖို့ မသေချာဘူးလို့ ယူဆနေပါတယ်။ ဇက်ခ်ဇီကို အဲရစ်တန်ဟက်ဂ် နည်းပြဖြစ်ခဲ့စဉ် ၂၀၂၄ နွေရာသီမှာ ဘိုလော့ဂ်နာအသင်းကနေ ယူနိုက်တက်က ခေါ်ယူခဲ့တာပါ။ ဒါပေမဲ့ သူဟာ ဒီရာသီမှာ ပြိုင်ပွဲစုံ ၂၀ ပွဲပဲ ကစားခွင့်ရထားပြီး သွင်းဂိုး ၂ ဂိုးသာ ရရှိထားပါတယ်။

အသက် ၂၅ နှစ်အရွယ်ရှိပြီဖြစ်တဲ့ ဒီနယ်သာလန်သားဟာ ပြီးခဲ့တဲ့ နွေရာသီမှာပဲ အသင်းကို ရောက်ရှိလာပြီး အိုးလ်ထရက်ဖို့ဒ်မှာ အလားအလာကောင်းတွေနဲ့ စတင်နိုင်ခဲ့ကြတဲ့ အမ်ဘီယူမို၊ မားသီးယပ်စ် ကွန်ညာနဲ့ ဘင်ဂျမင် ဆက်စကိုတို့ရဲ့နောက်မှာ အရန်ကစားသမားအဖြစ်သာ ရှိနေပါတယ်။ အဲဒါကြောင့် ရာသီကုန်ရင် ဇက်ခ်ဇီ အသင်းကနေ ထွက်ခွာတော့မယ်လို့ သတင်းတွေ ထွက်လာပေမဲ့ The Mirror ရဲ့ ဖော်ပြချက်အရ ဇက်ခ်ဇီနဲ့ သူ့ရဲ့အဖွဲ့ကတော့ အသင်းကနေ ထွက်ခွာရလိမ့်မယ်ဆိုတာကို သိပ်ပြီး မယုံကြည်ကြပါဘူး။

သူဟာ ပရီးမီးယားလိဂ် ၁၈ ပွဲအထိ ကစားထားပေမဲ့ ရူဘင် အမော်ရင်မ်နဲ့ အခု ယာယီနည်းပြ မိုက်ကယ် ကာရစ်တို့ လက်အောက်မှာ ၄ ပွဲပဲ ပွဲထွက်ခွင့် ရခဲ့ပါတယ်။ ကာရစ်က သူ့ကို အခွင့်အရေးပေးဖို့ ဝန်လေးနေပုံလည်း ရပါတယ်။ ဇက်ခ်ဇီဟာ ၂၀၂၉ အထိ စာချုပ်သက်တမ်း ရှိနေပြီး ယူနိုက်တက်ကနေ ထွက်ခွာဖို့လည်း လမ်းဖွင့်ထားတယ်လို့ ယူဆရပါတယ်။ သူ့ကို အဲဗာတန်အပြင် အီတလီကလပ်တွေဖြစ်တဲ့ ဂျူဗင်တပ်စ်နဲ့ အေစီမီလန်တို့ကလည်း အီတလီမြေကို ပြန်ခေါ်ဖို့ စိတ်ဝင်စားနေကြပါတယ်။

ဒါပေမဲ့ Daily Mail ရဲ့ ဖော်ပြချက်အရတော့ ဇက်ခ်ဇီဟာ ကစားခွင့်နည်းရင်တောင်မှ ယူနိုက်တက်မှာပဲ ဆက်နေချင်တဲ့ ဆန္ဒရှိနေပါတယ်။ သူဟာ ငယ်သေးတာကြောင့် ယူနိုက်တက်က သူ့ကို စခေါ်တုန်းက မျှော်လင့်ထားတဲ့အတိုင်း တိုးတက်လာနိုင်တဲ့ ကစားသမားတစ်ယောက်ဖြစ်အောင် ကြိုးစားသွားနိုင်မယ်လို့ ယုံကြည်နေတာပဲ ဖြစ်ပါတယ်။