နာပိုလီတိုက်စစ်မှူး ရက်စ်မွတ်စ်ဟွိုက်လန်းက သူ ယူနိုက်တက်မှာ ရှိနေစဉ်က အခြေအနေတွေကို ဒိန်းမတ်မီဒီယာတွေနဲ့ နိုင်ငံတကာမီဒီယာတွေက တကယ့်လက်တွေ့ထက် ပိုပြီးဆိုးရွားအောင် ပုံဖော်ခဲ့ကြတယ်လို့ ပြောကြားလိုက်ပါတယ်။

ပြင်ပကကြည့်ရင်တော့ သူ နာပိုလီကိုပြောင်းပြီး စီးရီးအေဆီ ပြန်သွားတာဟာ ဘောလုံးကစားရတဲ့ ပျော်ရွှင်မှုကို ပြန်ရှာဖို့ ကြိုးစားတာလို့ ထင်ရပေမဲ့ တကယ်တမ်းတော့ အဲဒီလိုမဟုတ်ဘူးလို့ TV2 Sport နဲ့ အင်တာဗျူးမှာ ရက်စ်မွတ်စ်ဟွိုက်လန်းက ဆိုပါတယ်။

"ကျွန်တော် မန်ချက်စတာမှာ ဘောလုံးကစားရတာ ပျော်ခဲ့ပါတယ်။ အထူးသဖြင့် ဒိန်းမတ်က မီဒီယာတွေက အရာရာတိုင်းဟာ စုတ်ပြတ်သတ်နေပြီး ကျွန်တော် ကစားတာတွေကလည်း အရမ်းညံ့ဖျင်းနေတယ်ဆိုတဲ့ ပုံစံမျိုး ဖန်တီးခဲ့ကြတာပါ။ ဒါပေမဲ့ ကျွန်တော်ကတော့ အဲဒီလိုမျိုး မမြင်ပါဘူး" လို့ ၎င်းက ပြောပါတယ်။

"ဒီဘောလုံးလောကမှာ မီဒီယာတွေရဲ့ ပြောဆိုချက်တွေက သြဇာညောင်းလွန်းတော့ အဲဒါတွေရဲ့ လွှမ်းမိုးမှုကို မခံရဖို့ဆိုတာ ခက်ခဲပါတယ်။ ဒါပေမဲ့ ဒါတွေထက် ပိုမိုနက်ရှိုင်းတဲ့ အကြောင်းအရာတွေ ရှိပါသေးတယ်။ ဒါကြောင့်လည်း ကျွန်တော်ဟာ အောင်မြင်နေချိန်မှာ အရမ်းဘဝင်မမြင့်ဖို့နဲ့ ကျရှုံးနေချိန်မှာလည်း အရမ်းစိတ်ဓာတ်မကျဖို့ကို အမြဲတမ်း နှလုံးသွင်းထားတာပါ" လို့ ဆိုပါတယ်။

၂၀၂၅-၂၆ ရာသီမှာ နာပိုလီကို ပြောင်းရွှေ့ခဲ့ပြီးနောက် ရက်စ်မွတ်စ်ဟွိုက်လန်းဟာ နည်းပြအန်တိုနီယိုကွန်တီရဲ့ လက်အောက်မှာ "တစ်ကျော့ပြန် နိုးထလာသူ" အဖြစ် တင်စားခံနေရပြီး ပြိုင်ပွဲစုံမှာ ၁၃ ဂိုးအထိ သွင်းယူပေးထားပါတယ်။

၂၀၂၅ ခုနှစ် ဒီဇင်ဘာလအထိ စာရင်းတွေအရ သူဟာ နာပိုလီအသင်းကို အီတလီစူပါဖလား ရရှိအောင် ကူညီပေးထားပြီးဖြစ်ပါတယ်။ ယူနိုက်တက်က နောက်ဆုံးရာသီမှာ ပုံမှန်ကစားခွင့်နဲ့ ခြေစွမ်းပြဖို့ ရုန်းကန်ခဲ့ရပြီးနောက် နာပိုလီကို ပြောင်းရွှေ့ခဲ့တာဟာ "အကောင်းဆုံး ဆုံးဖြတ်ချက်" ဖြစ်တယ်လို့လည်း သူက ဆိုပါတယ်။

လာမယ့်သီတင်းပတ်ကုန်မှာ ကစားမယ့် ကမ္ဘာ့ဖလားခြေစစ်ပွဲ ပလေးအော့ဖ်ပွဲစဉ်တွေမှာလည်း ရက်စ်မွတ်စ်ဟွိုက်လန်းက ဒိန်းမတ်အသင်း ခြေစစ်ပွဲအောင်မြင်ဖို့အတွက် အဓိကနေရာကနေ ပါဝင်ကစားပေးသွားရမှာ ဖြစ်ပါတယ်။