တော့တင်ဟမ်နဲ့ နယူးကာဆယ် ဂန္ထဝင်ကစားသမား ခရစ်ဝါဒယ်လ်က ချဲလ်ဆီးကြယ်ပွင့် ကိုးလ်ပယ်လ်မာရဲ့ အနာဂတ်နဲ့ပတ်သက်ပြီး ထုတ်ဖော်ပြောဆိုလာပါတယ်။ ဇန်နဝါရီလတုန်းက ထွက်ပေါ်ခဲ့တဲ့ သတင်းတွေအရ ပယ်လ်မာဟာ လန်ဒန်မှာ အခြေမကျဘဲ အိမ်ကိုလွမ်းနေပြီး သူ့ရဲ့ မိသားစုနဲ့ သူငယ်ချင်းတွေရှိရာ မန်ချက်စတာမြို့ဆီ ပြန်ချင်နေတယ်လို့ သိရပါတယ်။ ဒီတောင်ပံကစားသမားလေးဟာ မန်စီးတီးကို ပြန်ဖို့ အစီအစဉ်မရှိတာကြောင့် သူငယ်စဉ်ကတည်းက အားပေးခဲ့တဲ့ မန်ချက်စတာယူနိုက်တက်ကို ပြောင်းရွှေ့မလားဆိုတဲ့ အပြောင်းအရွှေ့သတင်းတွေ ထွက်ပေါ်လာခဲ့တာပါ။

ကမ္ဘာ့ဖလားပြိုင်ပွဲ မတိုင်ခင် လာမယ့်နွေရာသီမှာ ဒီအင်္ဂလန်ကြယ်ပွင့်လေးရဲ့ အပြောင်းအရွှေ့ ဖြစ်လာနိုင်ခြေရှိနေပြီး ဒီအပြောင်းအရွှေ့ ဘယ်လိုဖြစ်လာမလဲဆိုတာကို ဝါဒယ်လ်က Ozoon နဲ့ အင်တာဗျူးမှာ ပြောပြခဲ့ပါတယ်။ "ပယ်လ်မာက တကယ့်ကို ပါရမီပါတဲ့ ကစားသမားတစ်ယောက်ပါ၊ ကျွန်တော်ကိုယ်တိုင်လည်း သူ့ကို အရမ်းသဘောကျပါတယ်။ သူ ချဲလ်ဆီးကို ရောက်ကတည်းက ခြေစွမ်းမမှန်တဲ့ အပိုင်းတွေရှိခဲ့တာကိုလည်း သိပါတယ်။ ဒါက ကွင်းပြင်ပက ကိစ္စတွေကြောင့်လား ဒါမှမဟုတ် လန်ဒန်မှာ မပျော်လို့လားဆိုတာကိုတော့ သူကိုယ်တိုင်ပဲ ဖြေနိုင်ပါလိမ့်မယ်။ ချဲလ်ဆီးမှာက ကစားသမားအင်အား အရမ်းများတော့ သူက တစ်ခါတလေ အနားပေးခံရတယ်၊ တစ်ခါတလေ ကစားရတယ်၊ တစ်ခါတလေမှ လူစားဝင်ကစားရတာမျိုးတွေ ရှိပါတယ်။ ကစားသမားတိုင်းလိုပဲ သူလည်း ပွဲတိုင်း ကစားချင်မှာပါ။ သူက မန်ချက်စတာသားဖြစ်ပြီး ယူနိုက်တက်ပရိသတ်လည်း ဖြစ်တယ်ဆိုရင်တော့ ဒီကမ်းလှမ်းမှုကို သူ တကယ် စိတ်ဝင်စားမှာ သေချာပါတယ်" လို့ ဝါဒယ်လ်က ဆိုပါတယ်။

သူက ဆက်လက်ပြီး "ဒါပေမဲ့ အသင်းမှာ မားသီးယပ်စ် ကွန်ဟာနဲ့ ဘရူနို ဖာနန်ဒက်စ်တို့ ရှိနေတဲ့အခါ တီထွင်ဖန်တီးနိုင်စွမ်းရှိတဲ့ ကစားသမားတွေကို အများကြီး ထည့်သုံးဖို့တော့ ခက်ပါတယ်။ သူ အသင်းမှာ နေရာရပါ့မလား။ တခြားအသင်းအများစုမှာဆိုရင်တော့ ရနိုင်ပေမဲ့ လက်ရှိမှာ ဖာနန်ဒက်စ်နဲ့ ကူညာတို့က ခြေစွမ်းပြနေကြပါတယ်။ ကူညာက တိုက်စစ်ပိုင်း နေရာစုံမှာ ကစားနိုင်ပေမဲ့ သူကတော့ လွတ်လွတ်လပ်လပ် လှည့်ပတ်ကစားရတာကို ပိုကြိုက်တာပါ။ ဒါကြောင့် ပယ်လ်မာကို ဘယ်နေရာမှာ ထားကစားမလဲဆိုတာ စဉ်းစားစရာပါ။ အရင်ပြောခဲ့သလိုပဲ ယူနိုက်တက်အနေနဲ့ လူပိုတွေကို အရင်ရှင်းထုတ်ပစ်ရပါမယ်။ အသက်ကြီးနေတဲ့ ကစားသမားတချို့ကို ရောင်းထုတ်ဖို့ ကြိုးစားရမှာပါ။ ဘာပဲဖြစ်ဖြစ် ပယ်လ်မာကို ခေါ်နိုင်ရင်တော့ အသင်းအတွက် တကယ်ကို ကောင်းမွန်တဲ့ ခေါ်ယူမှုဖြစ်မှာပါ။ သူ့လို အရည်အချင်းရှိတဲ့ ကစားသမားမျိုးဆိုရင် အသင်းမှာ နေရာတစ်ခု သေချာပေါက် ရှာပေးနိုင်မှာပါ" လို့ သုံးသပ်ခဲ့ပါတယ်။

ကတ်စီမီရိုကလည်း အသင်းက ထွက်ခွာတော့မှာ ဖြစ်တာကြောင့် လာမယ့်နွေရာသီမှာ ယူနိုက်တက်ရဲ့ အပြောင်းအရွှေ့ စာရင်းထဲမှာ ပယ်လ်မာ ပါဝင်လာမှာ ဖြစ်ပါတယ်။ အသက် ၂၃ နှစ်အရွယ် ပယ်လ်မာကလည်း မြောက်ပိုင်းကို ပြန်ချင်နေတာကြောင့် ယူနိုက်တက်က သူ့အတွက် အခွင့်အရေးကောင်းတစ်ခု ဖြစ်လာနိုင်ပါတယ်။