အင်္ဂလန်အသင်း နည်းပြသစ် သောမတ်စ်တူချယ်ရဲ့ ကမ္ဘာ့ဖလားလူစာရင်းမှာ သူ ပါဝင်လာနိုင်မလားဆိုတဲ့ မေးခွန်းတွေအပေါ် ရာဟင်မ်စတာလင်က တုံ့ပြန်ပြောကြားလိုက်ပါတယ်။

စတာလင်ဟာ ပြီးခဲ့တဲ့အပတ်က ဖီယင်နုအသင်းအတွက် ပထမဆုံးအကြိမ် ပါဝင်ကစားပေးခဲ့ပါတယ်။ ဖီယင်နုက တဲလ်စတားအသင်းကို ၂-၁ နဲ့ အနိုင်ရခဲ့တဲ့ပွဲစဉ်မှာ ပွဲကစားချိန် ၆၁ မိနစ်မှာ ဂိုက်စ်စမောလ်ရဲ့နေရာမှာ လူစားဝင် ကစားခဲ့တာဖြစ်ပါတယ်။

မန်စီးတီးနဲ့ ချယ်လ်ဆီးကြယ်ပွင့်ဟောင်းဟာ စတန်းဖို့ဒ်ဘရစ်ဂျ်ရဲ့ အရန်အသင်းမှာ လပေါင်းများစွာ အချိန်ကုန်ဆုံးခဲ့ပြီးနောက်မှာ အခုတော့ သူ့ရဲ့ကစားသမားဘဝကို လမ်းကြောင်းမှန်ပေါ် ပြန်ရောက်အောင် ကြိုးစားနေပါတယ်။

ပရီးမီးယားလိဂ်ဖလား ၄ ကြိမ်ရရှိထားတဲ့ စတာလင်ဟာ အင်္ဂလန်အသင်းအတွက် ၈၂ ပွဲကစားပေးထားပြီး နိုင်ငံတကာသွင်းဂိုး ၂၀ ဂိုး သွင်းယူပေးထားသူပါ။ အသက် ၃၁ နှစ်အရွယ်ရှိပြီဖြစ်ပေမဲ့ ဒီနွေရာသီမှာကျင်းပမယ့် ကမ္ဘာ့ဖလားလူစာရင်းအတွက်တော့ သူက ရေပန်းစားနေဆဲ ဖြစ်ပါတယ်။

တူချယ်ဟာ စတာလင်ကို အလွန်နှစ်သက်သူဖြစ်ပြီး ၂၀၂၂ ခုနှစ်က ချယ်လ်ဆီးအသင်းကို စတာလင်ကို ခေါ်ယူခဲ့စဉ်ကလည်း အခုလို ချီးကျူးခဲ့ဖူးပါတယ်။

"သူက အဲ့ဒီနေရာအတွက် နံပါတ်တစ် ရွေးချယ်မှုပါပဲ။ ကျွန်တော် တော့ဒ်ဘိုလီကို သူ့နာမည်ကို ချက်ချင်းပေးခဲ့တာပါ။ သူနဲ့ ရင်ဆိုင်ကစားရတဲ့ အကြိမ်တိုင်းမှာ သူက တကယ်ကို ရင်ဆိုင်ရခက်တဲ့သူပါ၊ တကယ်ကို ခက်ခဲပါတယ်။ အဓိကအချက်က သူ့ရဲ့ ကစားအားက တကယ့်ကို ထူးခြားဆန်းပြားပြီး အရင်နှစ်တွေကတည်းက အံ့ဩစရာကောင်းတဲ့ စွမ်းဆောင်ရည်တွေကို အကြိမ်ကြိမ် ပြသနိုင်ခဲ့တာပါ။ ကျွန်တော်တို့နဲ့ ရင်ဆိုင်ကစားချိန်တွေမှာလည်း သူက ဒုက္ခအများကြီးပေးခဲ့ပါတယ်။ သူ့ရဲ့ အချက်အလက်တွေကို သေချာကြည့်မယ်ဆိုရင် ဂိုးပါဝင်ပတ်သက်မှုတွေတင်မကဘဲ တခြားစွမ်းဆောင်ရည်တွေကလည်း တကယ်ကို ကောင်းမွန်ပါတယ်။ ကျွန်တော်တို့ ကစားသမားတွေရဲ့ အဆင့်အတန်းကို မြှင့်တင်ဖို့အတွက် သူက အလိုအပ်ဆုံးလူဖြစ်လို့ သူ့ကို နံပါတ်တစ်ဦးစားပေးအဖြစ် သတ်မှတ်ခဲ့တာပါ" လို့ တူချယ်က ပြောခဲ့ပါတယ်။

အင်္ဂလန်အသင်းဆီ ပြန်သွားဖို့ လမ်းစရှာနေသလားလို့ မေးမြန်းရာမှာတော့ စတာလင်က လက်ရှိအခြေအနေကိုပဲ အာရုံစိုက်ထားကြောင်း ဝန်ခံပြောကြားခဲ့ပါတယ်။

"ကျွန်တော် သူနဲ့ စကားမပြောရသေးပါဘူး။ လက်ရှိမှာ ဘောလုံးကိုပဲ ဆက်ပြီး အကောင်းဆုံးကစားသွားဖို့က အရေးကြီးဆုံးပါပဲ" လို့ ဆိုပါတယ်။

စတာလင်ဟာ ၂၀၂၂ ဖီဖာကမ္ဘာ့ဖလားနောက်ပိုင်း အင်္ဂလန်အသင်းအတွက် ပါဝင်ကစားပေးခြင်း မရှိတော့ပေမဲ့ သူ့ကို အလွန်နှစ်သက်တဲ့ နည်းပြတူချယ်ရဲ့ မျက်စိကျခြင်းကို ခံရဖွယ် ရှိနေပါတယ်။