ရီးရဲလ်မက်ဒရစ်ရဲ့စိတ်ဝင်စားမှုတွေကြားမှာ မန်ချက်စတာယူနိုက်တက်က သူ့ကိုခေါ်ယူနိုင်ဖို့ ဘယ်လိုဆွဲဆောင်ခဲ့သလဲဆိုတာ အိုးလ်ထရက်ဖို့ဒ်ကစားသမားသစ် လန်နီယိုရိုက ရှင်းပြလာခဲ့ပါတယ်။

ယူနိုက်တက်ဟာ အသက်-၁၈ နှစ်အရွယ်နောက်ခံကစားသမားကို ပြောင်းရွှေ့ကြေး ‌ပေါင် ၅၈ သန်း+အပိုဆုကြေးနဲ့ ခေါ်ယူခဲ့ပြီး ၅ နှစ်သက်တမ်းရှိစာချုပ်တစ်ရပ်ကို ချုပ်ဆိုခဲ့ပါတယ်။ သဘောတူညီချက်အရ ကစားသမားဟာ ယူနိုက်တက်မှာ နောက်ထပ်အပို ၁ နှစ် ရွေးချယ်ခွင့်ရှိသေးတယ်လို့သိရပါတယ်။

နွေရာသီအစမှာ ရီးရဲလ်မက်ဒရစ်ဟာ ယိုရိုကို ခေါ်ယူနိုင်ဖို့ကျယ်ကျယ်ပြန့်ပြန့်သတင်းတွေထွက်ပေါ်ခဲ့ပေမယ့် နောက်ပိုင်းမှာ‌တော့ ယူနိုက်တက်က ပြင်သစ်လူငယ်ကစားသမားကို အလျင်အမြန်ခေါ်ယူနိုင်ဖို့ ဆွဲဆောင်နိုင်ခဲ့ပြီး လက်ဦးမှုရယူခဲ့တာဖြစ်ပါတယ်။

ယခုအခါမှာ‌တော့ ယိုရိုက "ကျွန်တော့်ရဲ့ ကစားသမားဘဝအစောပိုင်းမှာ ယူနိုက်တက်လို ‌ရည်မှန်းချက်ကြီးတဲ့အသင်းရဲ့ခေါ်ယူခြင်းကိုခံခဲ့ရတာက မယုံနိုင်လောက်အောင် ဂုဏ်ယူစရာကောင်းပါတယ်။ ကလပ်နဲ့ စကားစပြောကတည်းက သူတို့က ကျွန်တော့်ကို ဘယ်လိုတိုးတက်လာအောင် ကူညီနိုင်သလဲဆိုတာ ရှင်းပြခဲ့ပြီး ကျွန်တော့်ကို ကလပ်ရဲ့ ပရောဂျက်တွေထဲမှာထည့်သွင်းထားကြောင်း ပြောပြခဲ့ပါတယ်။ ပြီး‌တော့ သူတို့က ကျွန်တော်နဲ့ ကျွန်တော့်မိသားစုကို အရမ်းဂရုစိုက်ကြောင်း ဖော်ပြခဲ့ကြတယ်" "ကျွန်တော် ယူနိုက်တက် လူငယ်ကစားသမားတွေရဲ့ သမိုင်းကြောင်းတွေကိုသိထားပါတယ်။ ဒါကြောင့် ကျွန်တော့်ရည်မှန်းချက်တွေအတွက် ဒီအသင်းဟာ ပြီးပြည့်စုံတဲ့အသင်းဖြစ်မယ်လို့ ခံစားရပါတယ်။ အသင်းဖော်အသစ်တွေနဲ့ အတူတွဲကစားဖို့ မစောင့်နိုင်တော့ပါဘူး" လို့ပြောကြားခဲ့ပါတယ်။