ဘရာဇီးလက်ရွေးစင်တောင်ပံကစားသမား ဗင်နီစီးယက်စ်ဂျူနီယာက ကိုလံဘီယာကို ၂-၁ နဲ့အနိုင်ရခဲ့တဲ့ တောင်အမေရိကဇုန်ကမ္ဘာ့ဖလားခြေစစ်ပွဲစဉ်မှာ အဝါကတ်ပြသခံရဖို့ နီးစပ်ခဲ့ပေမယ့် ရာဖင်ဟာရဲ့အကူအညီကြောင့် မပြသခံခဲ့ရဘူးလို့ ဖွင့်ဟပြောကြားလာခဲ့ပါတယ်။ ၂၀၂၁ ခုနှစ်မှာ ကိုပါအမေရိကဆုဖလားကို အာဂျင်တီးနားထံဆုံးရှုံးခဲ့ရတဲ့ ဘရာဇီးဟာ ၂၀၂၂ ကမ္ဘာ့ဖလားပြိုင်ပွဲမှာလည်း အောင်မြင်မှုမရခဲ့သလို၊ ၂၀၂၄ ကိုပါအမေရိကပြိုင်ပွဲမှာလည်း ကိုလံဘီယာကိုရှုံးနိမ့်ပြီး ပြိုင်ပွဲကနေထွက်ခွာခဲ့ရပါတယ်။ အခုလို ဘရာဇီးရဲ့ကျရှုံးမှုတွေကြောင့် ပရိသတ်တွေဟာ ဗင်နီစီးယက်စ်ကို အပြစ်တင်ခဲ့ကြပြီး ကစားသမားဟာ ရီးရဲလ်မက်ဒရစ်မှာပြသနေတဲ့ခြေစွမ်းမျိုးကို နိုင်ငံအသင်းမှာတော့ ပြသနိုင်ခြင်းမရှိဘူးလို့ ယူဆနေကြတာဖြစ်ပါတယ်။ 

ပြီးခဲ့တဲ့နှစ်ကလည်း ဗင်နီစီးယက်စ်ဟာ ဘောလွန်းဒီအော်ဆုနဲ့နီးစပ်ခဲ့ပေမယ့် ပွတ်ကာသီကာ လွဲချော်ခဲ့သလို၊ ဒီနှစ်မှာတော့ လက်ရွေးစင်အသင်းဖော် ရာဖင်ဟာနဲ့ ဘောလွန်းဒီအော်ဆုအတွက် ယှဉ်ပြိုင်သွားရဖွယ်ရှိနေပါတယ်။ ရီးရဲလ်မက်ဒရစ်ရဲ့မဟာပြိုင်ဘက် ဘာစီလိုမှာကစားနေတဲ့ ရာဖင်ဟာက ထိပ်တန်းခြေစွမ်းကို တောက်လျှောက်ပြသထားပြီး ၂၀၂၅ ခုနှစ်ဘောလွန်းဒီအော်ဆုအတွက် ရေးပန်းစားလာနိုင်တဲ့အခြေအနေမှာရှိနေတာဖြစ်ပါတယ်။ သောကြာနေ့က ကိုလံဘီယာကိုအနိုင်ရခဲ့တဲ့ပွဲစဉ်မှာတော့ ရာဖင်ဟာနဲ့ ဗင်နီစီးယက်စ်တို့ဟာ အသင်းဖော်တွေအဖြစ် ဘရာဇီးအတွက် အတူတူကစားပေးခဲ့ကြပါတယ်။ အဆိုပါပွဲစဉ်အတွင်း ဗင်နီစီးယက်စ်ဟာ ကိုလံဘီယာကစားသမားတွေနဲ့ အချင်းများနေစဉ်မှာ ရာဖင်ဟာက လာရောက်တွန်းထုတ်ပြီး အခြေအနေကိုထိန်းသိမ်းခဲ့တာကို မြင်တွေ့ခဲ့ရပါတယ်။ 

အဆိုပါအဖြစ်အပျက်နဲ့ပတ်သက်ပြီး ဗင်နီစီးယက်စ်က “ခြေစစ်ပွဲတွေမှာ ဘာမဆိုအမြဲတမ်းရှုပ်ထွေးပါတယ်။ အဝါကတ် ၂ ကတ်ထိတာနဲ့ ၁ ပွဲပယ်ခံရပါတယ်။ ပွဲထဲမှာ တစ်ခါလောက်ပြစ်ဒဏ်ကျူးလွန်ပြီးလို့ နောက်ထပ်တစ်ခါကျူးလွန်မယ်ဆိုရင် သေချာပေါက်အဝါကတ်ပြသခံရမှာပါ။ ရာဖင်ဟာက ကျွန်တော်အဝါကတ်ထိမှာစိုးလို့ ကူညီပေးခဲ့ပါတယ်။ ဘာကြောာင့်လဲဆိုတော့ နောက်ပွဲကို ကျွန်တော်လွဲချော်လို့မရပါဘူး” လို့ပြောကြားခဲ့ပါတယ်။

လာမယ့်ခြေစစ်ပွဲစဉ်မှာတော့ ဘရာဇီးဟာ ခါးသီးတဲ့ပြိုင်ဘက် အာဂျင်တီးနားနဲ့ယှဉ်ပြိုင်သွားရမှာဖြစ်ပြီး လက်ရှိတောင်အမေရိကဇုန် ကမ္ဘာ့ဖလား ခြေစစ်ပွဲစဉ်အမှတ်ပေးဇယားကို အာဂျင်တီးနားက ထိပ်ဆုံးကနေပြတ်ပြတ်သားသားဦးဆောင်ထားတာဖြစ်ပါတယ်။ ကိုလံဘီယာနဲ့ပွဲမှာတော့ ဘရာဇီးအတွက်သွင်းဂိုးတွေကို ရာဖင်ဟာနဲ့ ဗင်နီစီးယက်စ်တို့က တစ်ဂိုးစီသွင်းယူပေးခဲ့ကြတာဖြစ်ပါတယ်။