ဥရောပထိပ်တန်းအသင်းတစ်သင်းအဖြစ် ပြန်လည်ဦးမော့နိုင်ရေး အားစိုက်လုပ်ဆောင်နေတဲ့ မန်ချက်စတာယူနိုက်တက်အသင်းက နောက်တန်း ဘယ်အစွန်တွင် အဓိက အားထားရတဲ့ လုခ်ရှောရဲ့ ကြွက်သားဒဏ်ရာကြောင့် ယာယီအစားထိုးတဲ့အနေဖြင့် ဘာစီလိုနာအသင်းရဲ့ ပရီးမီးယားလိဂ်အတွေ့ အကြုံများပြားတဲ့ အလွန်ဆိုအား ခေါ်ယူရန် စိတ်ဝင်စားနေတာပဲ ဖြစ်ပါတယ်။

ကစားသမားစုဖွဲ့မှုအားကောင်းမွန်တဲ့ ဘာစီလိုနာအသင်းအတွက် အလွန်ဆိုအနေဖြင့် ပုံမှန် ပွဲထွက်ကစားခွင့်ရရန် ရုန်းကနေရပြီး ဗီလာရီးရဲလ်ကို အနိုင်ရခဲ့တဲ့ ပွဲစဉ်တွင် ပါဝင်ခွင့်ရခဲ့ပေမဲ့ လာလီဂါ အဖွင့်ပွဲစဉ် ၂ပွဲကို လွဲချော်ထားခဲ့တာ ဖြစ်ပါတယ်။ အခြားတစ်ဖက်တွင်လည်း ပရီးမီးယားလိဂ် ပွဲစဉ် ၃ပွဲကစားပြီးချိန်မှာ ရမှတ် ၆မှတ်သာ စုဆောင်းနိုင်ခဲ့ပြီး ကွင်းလယ်ပိုင်းလိုအပ်ချက် မြင့်မားနေတာကြောင့် အပြောင်းအလဲပြုလုပ်တဲ့ အနေဖြင့် ယူနိုက်တက်အသင်းက တိုမီနေးကို ရောင်းချကာ ကစားသမားခေါ်ယူရန် လုပ်ဆောင်နေတာလည်း ဖြစ်ပါတယ်။

စပိန်သတင်းစာ မန်ဒိုဒီပို့တီပို့ရဲ့ အဆိုအရ ယူနိုက်တက်အသင်းအနေဖြင့် လုခ်ရှောရဲ့ နေရာအတွက် ယာယီအစားထိုးဖြေရှင်းမှုတစ်ရပ်အဖြစ် အသက် ၃၂အရွယ် ဘာစီလိုနာ နောက်တန်းအစွန်ကစားသမားကို ပစ်မှတ်ထားလာတာ ဖြစ်ပါတယ်။ ရီးရဲလ်မက်ဒရစ်အသင်းရဲ့ အကယ်ဒမီထွက် ကစားသမားဖြစ်တဲ့ အလွန်ဆိုအနေဖြင့် ပရီးမီးယားလိဂ်ပြိုင်ပွဲနဲ့ စိမ်းတဲ့ ကစားသမားတစ်ဦးမဟုတ်ဘဲ ချဲလ်ဆီးအသင်းတွင် ၂၀၁၆ခုနှစ်ကနေ ၂၀၂၁ခုနှစ်အထိ ၅နှစ်ကြာ ပါဝင်ကစားပေးခဲ့တာပဲ ဖြစ်ပါတယ်။