မေလက အမ်ဘာပေဟာ ရီးရဲလ်မက်ဒရစ် တွင် ပထမဆုံးရာသီမှာ ၃၄ ပွဲ ကစားခဲ့ရာ လာလီဂါသွင်းဂိုး ၃၁ ဂိုးဖြင့် အဆုံးသတ်ခဲ့ပြီး ပြိုင်ပွဲစုံတွင် ၄၂ ဂိုး သွင်းယူကာ ဥရောပရွှေဖိနပ်ဆုကို ဆွတ်ခူးခဲ့ပါတယ်။

အမှန်စင်စစ် အဆိုပါ ဂိုးသွင်းမှတ်တမ်းကြောင့် အမ်ဘာပေဟာ ရီးရဲလ်မက်ဒရစ်တွင် ပထမဆုံးရာသီ၌ ပြိုင်ပွဲစုံတွင် သမိုင်းတစ်လျှောက် ဂိုးအများဆုံး သွင်းယူနိုင်ခဲ့တဲ့ ကစားသမား ဖြစ်လာခဲ့ပြီး ၁၉၉၂-၉၃ ရာသီက အီဗန် ဇာမိုရာနို တင်ခဲ့တဲ့ စံချိန်ကို ကျော်ဖြတ်နိုင်ခဲ့ပါတယ်။

သို့သော် စပို့တင်း မှ ရောကရက်စ် က ပြီးခဲ့တဲ့ရာသီမှာ ပြင်သစ်ကပ္ပတိန်ထက် လိဂ်ဂိုး ပိုမိုသွင်းယူနိုင်ခဲ့ပါတယ်။ ဆွီဒင်ကစားသမားဟာ ပေါ်တူဂီပြည်တွင်းလိဂ်တွင် ၃၉ ဂိုး သွင်းယူခဲ့ပြီး အသင်းကလည်း ချန်ပီယံဖြစ်ခဲ့ပါတယ်။

သို့သော်လည်း ယူအီးအက်ဖ်အေ ရဲ့ အလေးပေးတဲ့ ဂိုးသွင်းစနစ်ကြောင့် ရောကရက်စ်ကိုကျော်ကာ အမ်ဘာပေအား ဥရောပရွှေဖိနပ်ဆုကို ချီးမြှင့်ခဲ့ခြင်း ဖြစ်ပါတယ်။ ထိုစနစ်ဟာ အဆင့်နိမ့်လိဂ်များထက် စပိန်တွင် သွင်းယူသော ဂိုးများအပေါ် ပိုမိုတန်ဖိုးထားနေခြင်း ဖြစ်ပါတယ်။ အမ်ဘာပေရဲ့ ၃၁ ဂိုးဟာ ၆၂ အမှတ် ရရှိစေခဲ့ပြီး လာလီဂါရဲ့ဂိုးတိုင်းက အမှတ် နှစ်မှတ် တန်ဖိုးရှိနေတာဖြစ်ပါတယ်။

ပေါ်တူဂီ ထိပ်တန်းလိဂ်တွင် သွင်းယူတဲ့ ဂိုးတစ်ဂိုးက ၁.၅ မှတ်သာ တန်ဖိုးရှိပြီး ရောကရက်စ်ရဲ့ ၃၉ ဂိုးက ၅၈.၅ မှတ် ရရှိစေခဲ့ရာ အမ်ဘာပေရဲ့ စုစုပေါင်းထက် ၃.၅ မှတ် လျော့နည်းနေတာဖြစ်ပါတယ်။
အမ်ဘာပေဟာ ရီးရဲလ် တွင် အသားကျရန် အချိန်ယူခဲ့ရပြီး ပထမသုံးပွဲတွင် ဂိုးသွင်းနိုင်ခြင်း မရှိခဲ့သလို စက်တင်ဘာလတွင် ကြွက်သားဒဏ်ရာများ ခံစားခဲ့ရပါတယ်။

သို့သော်လည်း သူဟာ နှစ်သစ်ကူးချိန်တွင် ခြေစွမ်းပြန်တွေ့ခဲ့ပြီး စူပါကိုပါ ဒီ အက်စ်ပါညာ ဖိုင်နယ်တွင် ဘာစီလိုနာ ကို ၅-၂ ဂိုးဖြင့် ရှုံးနိမ့်ခဲ့တဲ့ပွဲ၌ ဂိုးသွင်းခဲ့ပြီး ချန်ပီယံလိဂ် ပလေးအော့ဖ် ဒုတိယအကျော့တွင် မန်စီးတီး ကို ဟက်ထရစ် သွင်းယူခဲ့ပါတယ်။ အမ်ဘာပေက လာလီဂါပွဲစဉ်များအတွင်း ဘာစီလိုနာကို ၄-၃ ဂိုးဖြင့် ရှုံးနိမ့်ခဲ့တဲ့ အဝေးကွင်းပွဲတွင်လည်း ဟက်ထရစ် သွင်းယူခဲ့ပါတယ်။
မက်ဒရစ်အတွက် သွင်းဂိုးများအနက် ၂၉ ဂိုးက ၂၀၂၅ ခုနှစ်တွင် သွင်းယူခဲ့ခြင်း ဖြစ်ပါတယ်။

မက်ဒရစ်တွင် ဖြည်းဖြည်းချင်း စတင်နိုင်ခဲ့ခြင်းနှင့် ပတ်သက်၍ အမ်ဘာပေက ဇန်နဝါရီလ သတင်းစာရှင်းလင်းပွဲတွင် "ကျွန်တော် ကိုယ်ခန္ဓာပိုင်းကတော့ ကောင်းပါတယ်။ ဒါပေမဲ့ ပိုလုပ်ရမယ်ဆိုတာ သိပါတယ်။ ကျွန်တော် မက်ဒရစ်ကို ဆိုးဆိုးရွားရွား ကစားဖို့ လာတာ မဟုတ်တဲ့အတွက် အရာအားလုံးကို ပြောင်းလဲဖို့ အချိန်တန်ပါပြီ"

"ကျွန်တော် အရမ်းစဉ်းစားခဲ့တယ်။ အရမ်းပဲ။ ဘယ်လိုလုပ်ရမလဲ၊ ဘယ်လို ရွှေ့ရမလဲ။ ပြီးတော့ အရမ်းစဉ်းစားတဲ့အခါ ကောင်းကောင်း ကစားနိုင်မှာ မဟုတ်ဘူး။ အခုတော့ ကျွန်တော် မက်ဒရစ်အကြောင်းပဲ စဉ်းစားနေပါတယ်။ ကျွန်တော့်ရဲ့ အကောင်းဆုံး ဘောလုံးကို ကစားဖို့ စဉ်းစားနေပါတယ်" လို့ ပြောပါတယ်။