အာဆင်နယ်အသင်းဂန္ထဝင်ဟောင်း အွန်နရီက အမေရိကန်နဲ့ပွဲမှာ အောင်ပွဲခံနေစဉ် ပနားမားစတားက သူ့ကိုဘာပြောခဲ့လဲဆိုတာကို ထုတ်ဖော်ပြောကြားလိုက်ပါတယ်။ နေးရှင်းလိဂ်ဖိုင်နယ်ပွဲမှာ ပနားမားအသင်းဟာ အမေရိကန်အသင်းကို ဝါးတားမန်းရဲ့တစ်လုံးတည်းသောသွင်းဂိုးနဲ့အနိုင်ရရှိခဲ့တာဖြစ်ပါတယ်။လက်ကျန်မိနစ် ၂၀ နဲ့ အချိန်ပိုကျန်နေချိန်မှာ ပနားမားနည်းပြ သောမက်စ်က လက်ပစ်ဘောကို ဝါးတားမန်းဆီပေးပို့ခိုင်းခဲ့တာဖြစ်ပါတယ်။

ပွဲကစားချိန် ၉၄ မိနစ်မှာ ကာရက်စ်ကွီလာရဲ့ပေးပို့မှုကို ဝါးတားမန်းက သပ်ရပ်စွာအဆုံးသတ်ပြီး အဖိုးတန်အနိုင်ဂိုးကို သွင်းယူပေးနိုင်ခဲ့ပါတယ်။ အဲ့နောက် ဝါးတားမန်းက သူ့အကျီကိုချွတ်ပြီး အပြင်းအထန်အောင်ပွဲခံခဲ့သလို အာဆင်နယ်ဂန္ထဝင်ဟောင်း အွန်နရီထံကိုပါသွားရောက်အောင်ပွဲခံခဲ့ပါတယ်။ အဆိုပါအောင်ပွဲခံမှုနဲ့ပတ်သက်ပြီး အွန်နရီက ဝါးတားမန်းတစ်ယောက် သူ့ကိုပြောခဲ့တဲ့အကြောင်းအရာကို ထုတ်ဖော်ပြောကြားခဲ့ပါတယ်။

“အဲ့တာက လုံးဝပြောင်မြောက်ခဲ့ပါတယ်။ ကျွန်တော် လုံးဝအံ့အားသင့်ခဲ့ရပါတယ်။ ကျွန်တော်ဘယ်မှာရှိလဲဆိုတာကို သူသိခဲ့ပါတယ်။ ကွင်းထဲမှာ ဂိုးလည်းမသွင်းသလို ကစားသမားအဖြစ်လည်း မပါဝင်ပဲ အခုလိုမျိုးအောင်ပွဲခံရမယ်လို့ ကျွန်တော်ဘယ်တုန်းကမှမတွေးထားမိပါဘူး။ ဒါပေမယ့် အဲ့တာက သူတို့အတွက် ဘယ်လောက်အဓိပ္ပာယ်ရှိလဲဆိုတာကို ကျွန်တော် သူတို့မျက်လုံးတွေထဲမှာ မြင်လိုက်ရပါတယ်။ ကျေးဇူးတင်ရမှာက ကျွန်တော်စပိန်စကားနားလည်လို့ပါ။

သူက “Eres mi idolo” (ခင်ဗျားက ကျွန်တော်အားကျရတဲ့ကစားသမား)လို့ ပြောခဲ့တာပါ။ ကျွန်တော်ကလည်း အိုကေ တူလေးဆိုပြီး ပြန်ပြောခဲ့ပါတယ်”လို့ အွန်နရီက ဖြေကြားခဲ့ပါတယ်။ ပွဲအပြီးမှာ ဝါးတားမန်းတစ်ယောက် အင်တာဗျူးထံလာရောက်ပူးပေါင်းခဲ့ပြီး “အသင်းဖော်တွေက ဟော်တယ်မှာ ခင်ဗျားငယ်ငယ်က အားကျရတဲ့ကစားသမားက ဘယ်သူလဲလို့ မေးခဲ့ကြပါတယ်။ ကျွန်တော်က အွန်နရီလို့ပြောခဲ့ပါတယ်။

ကျန်တော် ငယ်ငယ်လေးကတည်းက သူ့ကိုကြည့်ရင်း ကြီးပြင်းလာခဲ့ရတာပါ။ကျွန်တော် အာဆင်နယ်ပွဲကို အမြဲတမ်းကြည့်ဖြစ်သလို အခုသွင်းဂိုးကလည်း သူသွင်းခဲ့တာကို ပြန်မြင်နေရသလိုပါပဲ။ အဲ့တာက ရူးချင်စရာပါ။ အဲ့နောက် ကျွန်တော သူနဲ့အတူတူအောင်ပွဲခံဖို့ သွားခဲ့သလို အခွင့်အရေးလည်းရခဲ့ပါတယ်။  ပြီးတော့ သူ့ကို ခင်ဗျားက ကျွန်တော် အားကျရတဲ့ကစားသမားလို့ ပြောခဲ့ပါတယ်"လို့ ဝါးတားမန်းက ဖြေကြားခဲ့ပါတယ်။

ပနားမားအသင်းဟာ လာမယ့်တနင်္ဂနွေနေ့မှာ မက္ကဆီကိုအသင်းနဲ့ကန်ရမှာဖြစ်ပါတယ်။ ဝါးတားမန်းကတော့ အခုနိုင်ပွဲဟာ လာမယ့်ဇွန်လမှာကန်မယ့် Belize ၊ Nicaragua တို့နဲ့ပွဲတွေအတွက် တွန်းအားဖြစ်လိမ့်မယ်လို့ မျှော်လင့်နေပါတယ်။