အာဂျင်တီးနားအသင်းနည်းပြ စကာလိုနီက မိမိအနေနဲ့ လာမယ့်ကမ္ဘာ့ဖလားအတွက် မက်ဆီတစ်ယောက် ဒဏ်ရာပြဿနာနဲ့ နပန်းလုံးနေရမှာကို မလိုလားကြောင်း ဝန်ခံပြောကြားလိုက်ပါတယ်။ စကာလိုနီက မက်ဆီကို အနာဂတ်အတွက် အနားပေးဖို့ အလိုရှိကြောင်း အခိုင်အမာပြောကြားခဲ့ပါတယ်။ အသက် ၃၇ နှစ်သားဟာ ကြွက်သားဒဏ်ရာကြောင့် အခုနိုင်ငံတကာရက်သတ္တပတ်မှာ မပါဝင်ခဲ့တာဖြစ်ပါတယ်။

မက်ဆီမပါဝင်နိုင်ပေမယ့် အာဂျင်တီးနားအသင်းဟာ ဥရုဂွေးအသင်းကို ၁-၀ ၊ ဘရာဇီးအသင်းကို ၄-၁ နဲ့ အနိုင်ရရှိခဲ့ပါတယ်။ ပွဲအပြီးမှာ စကာလိုနီက သတင်းထောက်တွေကို “ကျွန်တော်တို့ တစ်ပွဲချင်းသွားနေပါတယ်။ ကျွန်တော် မက်ဆီကို အခုတစ်နှစ်လုံးဒီပြဿာနဲ့ နပန်းလုံးနေတာမျိုးမလိုချင်ပါဘူး။ သူ့ကိုအနားပေးရပါမယ်။ ကျွန်တော်တို့ တွန်းအားပေးနေလို့မရပါဘူး”လို့ ဖြေကြားခဲ့ပါတယ်။

မက်ဆီဟာ ပြီးခဲ့တဲ့လတွေတုန်းက ဒဏ်ရာပြဿနာတွေရှိခဲ့တာဖြစ်ပြီး ကမ္ဘာ့ဖလားကလည်း မကြာခင်မှာ လာတော့မှာဖြစ်တာကြောင့် ဒဏ်ရာတွေနဲ့နပန်းမလုံးရဖို့ လိုအပ်နေတာဖြစ်ပါတယ်။ အာဂျင်တိုင်းသားတစ်ယောက် အခု ၂၀၂၅ မှာ ၃ ပွဲသာ မိနစ် ၉၀ ပြည့်ပါဝင်ခွင့်ရရှိထားပြီး နောက် ၃ ပွဲကို အနားယူခဲ့ရတာဖြစ်ပါတယ်။ မက်ဆီတစ်ယောက် လာမယ့် Philadelphia Union နဲ့ပွဲမှာ ပါဝင်နိုင်ဖို့ ကြံ့ခိုင်မှုပြည့်ဝမလားဆိုတာကို စောင့်ကြည့်ရမှာဖြစ်ပါတယ်။