ယူနိုက်တက်နည်းပြ အာမိုရင်က အန်တိုနီတစ်ယောက် မန်ချက်စတာမှာ ဘာကြောင့် ရုန်းကန်ရလဲဆိုတာကို ထုတ်ဖော်ပြောကြားလိုက်ပါတယ်။ ဘရာဇီးသားဟာ ဘက်တစ်အသင်းထံ အငှားထွက်ကစားပြီးနောက် စွမ်းဆောင်ရည်ကောင်းတွေပြသနေပြီး ပထမဆုံး ၇ ပွဲမှာ ၃ ဂိုးသွင်း ၊ ၂ ဂိုးဖန်တီးထားနိုင်ခဲ့ပါတယ်။

ယခင်ယူနိုက်တက်မှာတုန်းက အန်တိုနီတစ်ယောက် စွမ်းဆောင်ရည်ကောင်းတွေပြသနိုင်ခြင်းမရှိတာဖြစ်ပါတယ်။ ဒါ့အပြင် အသင်းအတွက် ၉၆ ပွဲမှာလည်း ၁၂ ဂိုးသာသွင်းယူနိုင်ခဲ့ပြီး အာမိုရင်က ပရီးမီးယားလိဂ်မှာ ရုန်းကန်ရတဲ့ အဓိကအချက်တစ်ချက်ကို ထုတ်ဖော်ပြောကြားခဲ့ပါတယ်။

“အင်္ဂလန်မှာ ပြိုင်ဘက်အသင်းတွေက ရုပ်ပိုင်းဆိုင်ရာကို အဓိကထားပါတယ်။ ခင်ဗျားမှာ ရုပ်ပိုင်းဆိုင်ရာကြံ့ခိုင်မှုမရှိရင် ခင်ဗျားအများကြီးရုန်းကန်ရနိုင်ပါတယ်။ အန်တိုနီက အခုစပိန်မြေမှာ ပိုကောင်းလာနေပါပြီ။ အဲ့တာက အကြောင်းအရာအများကြီးကြောင့်ပါ။ ဒါပေမယ့် ကျွန်တော် အာမခံနိုင်တာက အန်တိုနီတစ်ယောက် ပရီးမီးယားလိဂ်မှာ ရုန်းကန်ရတာဟာ ရုပ်ပိုင်းဆိုင်ရာကြောင့်ပါ”လို့ ဖြေကြားခဲ့ပါတယ်။

အန်တိုနီကတော့ စပိန်မြေမှာ စွမ်းဆောင်ရည်ကောင်းတွေပြသနိုင်ခဲ့ပြီနောက် အခုလိုဖွင့်ဟလာခဲ့ပါတယ်။ “မန်ချက်စတာမှာလည်း အချိန်ကောင်းတွေရှိခဲ့ပါတယ်။ ကျွန်တော် ဆုဖလား ၂ လုံးရှိခဲ့သလို ပျော်ရွှင်ခဲ့ရပါတယ်။ ဒါပေမယ့် ကျွန်တော် ဒီမှာ ကျွန်တော့်ကိုယ်ကျွန်တော် ပြန်လည်ရှာဖွေနိုင်ခဲ့ပါပြီ။ ကျွန်တော် ဒီမှာပျော်သလို ဒီကလူတွေက ဘရာဇီးမှာနဲ့ဆင်တူပါတယ်။ နေရောင်ကလည်း အများကြီးကူညီပါတယ်။ ကျွန်တော် ဒီမှာအရမ်းပျော်သလို နေ့တိုင်းအပြုံးတွေနဲ့ နိုးထရပါတယ်။

အဲ့တာက အရမ်းအရေးကြီးပါတယ်။ ဒီမှာ ကျွန်တော့်အတွက် သူငယ်ချင်းတွေအများကြီးရှိပါတယ်။ အဲ့တာကြောင့် ဒီကိုပြောင်းလာခဲ့တာပါ။ ကျွန်တော့်အတွက်လည်း တကယ်ကောင်းတဲ့ဆုံးဖြတ်ချက်ဖြစ်ခဲ့ပါတယ်။ ဒီခြေစွမ်းမျိုးကိုလည်း ဆက်ထိန်းထားနိုင်ဖို့ မျှော်လင့်ပါတယ်”လို့ အန်တိုနီက ထုတ်ဖော်ပြောကြားခဲ့ပါတယ်။

 ယူနိုက်တက်နဲ့ သဘောတူညီမှုမှာ အငှားသီးသန့်သာဖြစ်ပေမယ့် ဘက်တစ်ဘက်က အန်တိုနီအခြေအနေကို စောင့်ကြည့်နေပြီး တကယ်လို့အဆင်ပြေခဲ့ရင် အပြီးသတ်ခေါ်ယူဖွယ်ရှိနေပါတယ်။