အက်စတွန်ဗီလာနဲ့ပွဲက အပြုအမူကြောင့် အက်ဖ်အေရဲ့ စွဲချက်တင်ခြင်းကို ခံထားရတဲ့ ရီစီဂျိမ်းစ်
ချဲလ်ဆီးအသင်းနောက်ခံလူ ရီစီဂျိမ်းစ်ဟာ အက်စတွန်ဗီလာကို ရှုံးနိမ့်ခဲ့တဲ့ပွဲစဉ်အပြီး ဥမင်လှိုဏ်ခေါင်းအတွင်းက ဒိုင်လူကြီးကို ရိုင်းရိုင်းစိုင်းစိုင်းပြောဆိုခဲ့တာကြောင့် အက်ဖ်အေရဲ့ စွဲချက်တင်ခြင်းကို ခံထားရတာဖြစ်ပါတယ်။ အသင်းခေါင်းဆောင် ရီစီဂျိမ်းစ်ဟာ တံကောက်ကြောဒဏ်ရာပြဿနာကြောင့် အက်စတွန်ဗီလာနဲ့ပွဲစဉ်မှာ မပါဝင်နိုင်ခဲ့သော်လည်း ဥမင်လှိုဏ်ခေါင်းအတွင်းမှာတော့ အဆိုပါပွဲစဉ်ကိုကြီးကြပ်ခဲ့တဲ့ ဒိုင်လူကြီးနဲ့ ထိပ်တိုက်တွေ့ဆုံခဲ့တာဖြစ်ပါဝယ်။
အက်ဖ်အေက "စက်တင်ဘာလ ၂၄ ရက်၊ တနင်္ဂနွေနေ့က ချဲလ်ဆီးနဲ့အက်စတွန်ဗီလာတို့ပွဲစဉ်အပြီးမှာ အက်ဖ်အေရဲ့ E3 စည်းကမ်းချက်ကိုဖောက်ဖျက်ခဲ့တဲ့ ရီစီဂျိမ်းစ်ကို တရားစွဲဆိုလိုက်ပြီဖြစ်ပါတယ်။ နောက်ခံလူဟာ ပွဲအပြီး ဥမင်လှိုဏ်ခေါင်းအတွင်းရှိ ပွဲကြီးကြပ်သူကို မဖွယ်မရာ(သို့မဟုတ်) ရိုင်းစိုင်းတဲ့ စကားလုံး(သို့မဟုတ်) အပြုအမူတွေနဲ့ ဆက်ဆံခဲ့တယ်လို့ စွပ်စွဲခံထားရပါတယ်။ ရီစီဂျိမ်းစ်အနေနဲ့ ယခုစွပ်စွဲချက်ကို ပြန်လည်ချေပရန် စက်တင်ဘာ ၂၉ ရက်၊ သောကြာနေ့အထိအချိန်ရှိပါတယ်" လို့ထုတ်ပြန်ထားတာဖြစ်ပါတယ်။
ဒဏ်ရာပြဿနာကြောင့် အင်္ဂလန်သားဟာ အောက်တိုဘာလနှောင်းပိုင်းအထိ အနားယူဖို့လိုအပ်နေတာဖြစ်ပြီး အဆိုပါပွဲစဉ်မှာလည်း ချဲလ်ဆီးအသင်းက အက်စတွန်ဗီလာအသင်းကို ၀-၁ နဲ့ရှုံးနိမ့်ခဲ့တာဖြစ်ပါတယ်။ အဆိုပါရှုံးပွဲကြောင့် ပိုချက်တီနိုရဲ့အသင်းဟာ ၁၉၇၈-၇၉ နောက်ပိုင်း အဆိုးရွားဆုံးသော ရာသီစတင်မှုကို ကြုံတွေ့ခဲ့ရတာဖြစ်ပြီး လက်ရှိပရီးမီယားလိဂ်အမှတ်ပေးဇယားမှာ ၆ ပွဲကစား ရမှတ် ၅ မှတ်နဲ့ အဆင့် ၁၄ နေရာမှာရပ်တည်နေပါတယ်။
ပွဲအပြီးမှာ ပိုချက်တီနိုက "ကျွန်တော်တို့က တစ်ဦးတစ်ယောက်ချင်းထက် အသင်းလိုက်တိုးတက်နိုင်ဖို့ လိုပါတယ်။ နီကိုလက်စ်ဂျက်ဆန်လို ငယ်ရွယ်တဲ့ကစားသမားတွေက ပရီးမီးယားလိဂ်ကို သင်ယူနေဆဲဖြစ်ပါတယ်။ သူကအချိန်လိုပါတယ်။ ဒီလိုပွဲမျိုးမှာကျွန်တော်တို့ အနိုင်ရရှိလိုပါတယ်။ ဒါပေမယ့် ကစားသမားတွေအနေနဲ့ ငယ်ရွယ်ချိန်မှာ အတွေ့အကြုံတွေရရှိဖို့ အမှားတွေပြုလုပ်နေမိဦးမှာပါပဲ။ ဒါကြောင့် ဒီအခြေအနေတွေအတွက် ပေးဆပ်နေရတာတွေရှိလို့ စိတ်ပျက်စရာတွေဖြစ်ပေါ်စေပါတယ်။ ကျွန်တော်တို့အသင်းကို တတ်နိုင်သမျှအမြန်ဆုံး ပြောင်းလဲဖို့ လိုအပ်နေပါပြီ"လို့ ပြောကြားခဲ့ပါတယ်။
