ဘင်ဖီကာနဲ့ ချန်ပီယံလိဂ်ပွဲမှာ သူရဲကောင်းမဖြစ်မီ မနက်ပိုင်းမှာ ဘာစီလိုနာစတားဟာ သူတို့သားလေးနဲ့အတူ ဆေးရုံမှာ အတူတူရှိခဲ့ကြောင်း ရာဖင်ညာရဲ့ ဇနီးက ဖွင့်ဟပြောကြားခဲ့ပါတယ်။

ဘာစီလိုနာအသင်းဟာ အင်္ဂါနေ့က ဘင်ဖီကာကို ၃-၁ ဂိုးနဲ့ အနိုင်ယူပြီး ချန်ပီယံလိဂ်ကွာတားဖိုင်နယ်ကို အေးအေးဆေးဆေး တက်ရောက်ခဲ့ပါတယ်။ ရာဖင်ညာနဲ့ ယာမဲလ်တို့ဟာ ဟန်စီဖလစ်ခ်ရဲ့အသင်းအတွက် ခြေစွမ်းပြခဲ့တဲ့ ကစားသမားတွေဖြစ်ကြပြီး ဘရာဇီးသားက ၂ ဂိုးသွင်းယူခဲ့တာကြောင့် ဒီရာသီ ပြိုင်ပွဲစုံမှာ ၂၇ ဂိုးအထိ ရှိသွားခဲ့ပါတယ်။ လိဒ်စ်တိုက်စစ်မှူးဟောင်းဟာ ချန်ပီယံလိဂ် ၁၀ ပွဲမှာ ၁၁ ဂိုးအထိ သွင်းယူထားပြီး ချန်ပီယံလိဂ်ရဲ့ ထိပ်တန်းဂိုးသွင်းရှင်လည်း ဖြစ်ပါတယ်။

ဘာစီလိုနာအတွက် ရာဖင်ညာရဲ့ သူရဲကောင်းဆန်တဲ့ စွမ်းဆောင်ရည်တွေဟာ တိုက်စစ်မှူးက သူ့သားလေးနဲ့အတူ မနက်ပိုင်းမှာ ဆေးရုံမှာ အတူတူရှိခဲ့ရတာကို ကျော်လွှားပြီးမှ ရရှိခဲ့တာလို့ နောက်ပိုင်းမှာ ပေါ်ထွက်လာပါတယ်။ ရာဖင်ညာရဲ့ ဇနီး နာတာလီယာ ရိုဒရီဂွက်ဇ်က ပွဲအပြီးမှာ သူမရဲ့ခင်ပွန်းအတွက် ပို့စ်တစ်ခုကို တင်ခဲ့ပြီး သူ့ရဲ့စွမ်းဆောင်ရည်နဲ့ သူ့မိသားစုကို ဂရုစိုက်တဲ့ပုံစံကို ဂုဏ်ယူကြောင်း ပြောကြားခဲ့ပါတယ်။

သူမက အင်စတာဂရမ်မှာ "ချစ်ရသူရေ ရှင့်အတွက် အရမ်းဂုဏ်ယူပါတယ်။ ရှင်က ကျမတို့သားလေးနဲ့အတူ ဆေးရုံမှာ စောစောရောက်နေခဲ့ပေမယ့် ကစားသမားတစ်ဦးရဲ့အလုပ်ကို ကျွမ်းကျင်စွာ လုပ်ဆောင်နိုင်ခဲ့ပါတယ်။ ဖခင်ကောင်းတစ်ဦးနဲ့ ပရော်ဖက်ရှင်နယ်ဘောလုံးသမားကောင်းတစ်ဦးပါ။ ကျမတို့ ရှင့်ကို ချစ်ပါတယ်" လို့ တင်ခဲ့ပါတယ်။

ရာဖင်ညာဟာ ဒီရာသီ ချန်ပီယံလိဂ်မှာ ၁၁ ဂိုးအထိ သွင်းယူထားပြီး ကာကာနဲ့ နေမာလို ဂန္တဝင်ကစားသမားတွေထက် သာလွန်ပြီး တစ်ရာသီတည်းမှာ မည်သည့်အသင်းအတွက်မဆို ဘရာဇီးကစားသမားတစ်ဦးရဲ့ အများဆုံးဂိုးသွင်းယူမှုလည်း ဖြစ်ပါတယ်။

ဘာစီလိုနာအသင်းဟာ ပြိုင်ပွဲရဲ့ ကွာတားဖိုင်နယ်မှာ လိုင်လီ ဒါမှမဟုတ် ဒေါ့မွန်အသင်းနဲ့ တွေ့ဆုံရမှာပါ။ တစ်ချိန်တည်းမှာပဲ ဟန်စီဖလစ်ခ်ရဲ့အသင်းဟာ တနင်္ဂနွေနေ့တွင် လာလီဂါရဲ့ထိပ်သီးတွေ့ဆုံမှုအဖြစ် အက်သလက်တီကိုမက်ဒရစ်ရဲ့ အိမ်ကွင်းသို့ သွားရောက်ကစားရမှာဖြစ်ပါတယ်။