၂၀၂၄-၂၀၂၅ ပရီးမီးယားလိဂ်ဘောလုံးရာသီ မကြာမီပြီးဆုံးပါတော့မယ်။ အခုဘောလုံးရာသီမှာတော့ ဥရောပပြိုင်ပွဲဝင်ခွင့်ယှဉ်ပြိုင်မှုတွေက အတော်လေးအကြိတ်အနယ်ရှိပြီး စိတ်ဝင်စားစရာ ကောင်းနေပါတယ်။ လက်ကျန်ပွဲစဉ်အနည်းငယ်သာကစားရဖို့ ကျန်ရှိနေတယ်ဆိုပေမယ့် ကလပ်အသင်းအများစုကတော့ လာမယ့်ရာသီ၊ ဥရောပအဆင့်ပြိုင်ပွဲတွေမှာဝင်ရောက်ယှဉ်ပြိုင်ခွင့်ရရှိဖို့အတွက် အပြိုင်အဆိုင်ကြိုးစားနေကြဆဲ ဖြစ်ပါတယ်။ လက်ရှိပရီးမီးယားလိဂ်အမှတ်ပေးဇယားရပ်တည်မှုအရ အဆင့်-၄ မှ အဆင့်-၁၁ အထိ ၈ မှတ်သာကွာဟလို့ ချန်ပီယံလိဂ်၊ ယူရိုပါလိဂ်၊ ကွန်ဖရန့်လိဂ်ဝင်ခွင့်ရရှိရေး ကြိုးပမ်းမှုတွေက အတော်လေးကြည့်လို့ကောင်းမယ့်အခြေအနေ ဖြစ်လာပါတယ်။

အခုလက်ရှိအမှတ်ပေးဇယားရပ်တည်မှုအရ အဆင့်-၃ နေရာမှာရှိနေတဲ့ နော်တင်ဟမ်ဖောရက်စ်က ၁၉၈၀ ပြည့်နှစ်လွန်ကာလတွေနောက်ပိုင်း ပထမဆုံးအကြိမ်ချန်ပီယံလိဂ်ဝင်ခွင့်ရရှိဖို့ အတော်လေးနီးစပ်နေပါတယ်။ သူတို့တွေရဲ့တိုးတက်လာမှုက အခုဘောလုံးရာသီ၊ အံ့အားသင့်စရာအကောင်းဆုံးကိစ္စတွေအနက် တစ်ခု ဖြစ်လာခဲ့ပါတယ်။ အလားတူ ဘုန်းမောက်ကလည်း အသင်းသမိုင်းတလျှောက် ပထမဆုံးအကြိမ်ဥရောပပြိုင်ပွဲဝင်ခွင့်ရရှိဖို့ အခြေအနေကောင်းနေပြန်ပါတယ်။

ဒါ့အပြင် ဘရိုက်တန်လည်း ရှိနေပါသေးတယ်။ သူတို့ဆိုရင် အသင်းသမိုင်းတလျှောက် ချန်ပီယံလိဂ်ပြိုင်ပွဲဆီ ပထမဆုံးအကြိမ်ဝင်ရောက်ယှဉ်ပြိုင်ခွင့်ရရှိဖို့တောင် အခွင့်အရေးအနည်းငယ်ရှိနေပါသေးတယ်။ ၁၃ ရာသီဆက်တိုက် ချန်ပီယံလိဂ်ဝင်ခွင့်ရရှိခဲ့တဲ့ မန်စီးတီးတို့ လက်ကျန်ပွဲစဉ်တွေမှာ ခြေချော်ခဲ့မယ်ဆိုရင် ဥရောပရဲ့အဆင့်အမြင့်ဆုံးပြိုင်ပွဲကြီးနဲ့ လွဲချော်မယ့်အန္တရာယ်ကို ရင်ဆိုင်သွားရနိုင်ပါတယ်။

လက်ရှိအမှတ်ပေးဇယားရပ်တည်မှုအရ ထိပ်ဆုံးလေးသင်းစာရင်းဝင်အသင်းတွေကတော့ လာမယ့်ရာသီ၊ ချန်ပီယံလိဂ်ဝင်ခွင့်ရရှိဖို့ သေချာသလောက်ဖြစ်နေပါတယ်။ ဒါပေမယ့် ချန်ပီယံလိဂ်ဝင်ခွင့်အတွက် နောက်ထပ်နေရာတွေ ရှိလာနိုင်သေးလို့ အခြေအနေတွေ အပြောင်းအလဲရှိလာနိုင်ပါတယ်။ အခုရာသီ၊ ဥရောပအဆင့်ပြိုင်ပွဲဝင်ကလပ်အသင်းတွေရဲ့စွမ်းဆောင်ရည်ညွှန်းကိန်းတွေအရ ယူအီးအက်ဖ်အေက ပရီးမီးယားလိဂ်အတွက် ချန်ပီယံလိဂ်ဝင်ခွင့်တစ်နေရာ ထပ်ဆောင်းပေးအပ်လိုက်မယ်ဆိုရင် အမှတ်ပေးဇယားအဆင့်-၅ နေရာနဲ့ ရာသီသိမ်းနိုင်တဲ့ ကလပ်အသင်းကလည်း ၂၀၂၅-၂၀၂၆ ဘောလုံးရာသီ၊ ချန်ပီယံလိဂ်ပြိုင်ပွဲကို ဆင်နွှဲခွင့်ရရှိသွားနိုင်ပါတယ်။ ဒါက ပြိုင်ပွဲဝင်ကလပ်အသင်း ၃၆ ခုအထိ တိုးမြှင့်ထားတဲ့ ချန်ပီယံလိဂ်ပြိုင်ပွဲပုံစံသစ်အရ ဖြစ်တည်လာခဲ့တာပါ။

ဥရောပဝင်ခွင့်အတွက် ဘယ်လိုသတ်မှတ်ပေးနိုင်မလဲဆိုတော့ ပုံမှန်အတိုင်း ပရီးမီးယားလိဂ်အမှတ်ပေးဇယား ထိပ်ဆုံးလေးနေရာမှာရှိနေတဲ့ ကလပ်အသင်းလေးခုက ချန်ပီယံလိဂ်ပြိုင်ပွဲဝင်ခွင့်ရရှိပြီး အမှတ်ပေးဇယားအဆင့်-၅ နေရာမှာ ရှိနေတဲ့ကလပ်အသင်းကလည်း ယူအီးအက်ဖ်အေရဲ့ထပ်တိုးနေရာ ပေးခြင်း၊မပေးခြင်းအပေါ် မူတည်ပြီး ချန်ပီယံလိဂ်ဝင်ခွင့်ရရှိလာနိုင်ပါတယ်။ ဒီအတိုင်းသာဖြစ်လာမယ်ဆိုရင် အမှတ်ပေးဇယားအဆင့်-၆ နေရာရှိကလပ်အသင်းနဲ့ အက်ဖ်အေဖလားချန်ပီယံတို့က ယူရိုပါလိဂ်ပြိုင်ပွဲဝင်ခွင့် ရရှိပါလိမ့်မယ်။

ပူပူနွေးနွေးကာရာဘောင်းဖလားချန်ပီယံ နယူးကာဆယ်က သူတို့ရဲ့အောင်ပွဲကြောင့် ၂၀၂၅-၂၀၂၆ ဘောလုံးရာသီ၊ ကွန်ဖရန့်လိဂ်ခြေစစ်ပွဲဝင်ခွင့် ရရှိထားပါတယ်။ ဒါပေမယ့် နယူးကာဆယ်ရဲ့ အမှတ်ပေးဇယားရပ်တည်မှုအရ ချန်ပီယံလိဂ်(သို့မဟုတ်)ယူရိုပါလိဂ်ဝင်ခွင့်ရရှိမယ်ဆိုရင် သူတို့ရဲ့ကွန်ဖရန့်လိဂ်ခြေစစ်ပွဲဝင်ခွင့်နေရာက အမှတ်ပေးဇယားရပ်တည်မှုအမြင့်ဆုံး နောက်ထပ်ကလပ်အသင်းတစ်ခုဆီ ရောက်ရှိသွားပါလိမ့်မယ်။

ဒါ့အပြင် ပရီးမီးယားလိဂ်ကလပ်အသင်း ၇ ခုအထိ ချန်ပီယံလိဂ်ဝင်ခွင့်ရရှိနိုင်မယ့် အခြေအနေတစ်ရပ်လည်း ရှိနေပါသေးတယ်။ ပရီးမီးယားလိဂ်အမှတ်ပေးဇယားထိပ်ဆုံးငါးနေရာရှိ ကလပ်အသင်းငါးခုက လိဂ်ရပ်တည်မှုအရ ချန်ပီယံလိဂ်ဝင်ခွင့်ရရှိမယ်၊ ဒီစာရင်းပြင်ပမှာရှိနေတဲ့ကလပ်အသင်းက အခုရာသီ၊ ချန်ပီယံလိဂ်ပြိုင်ပွဲမှာ ဗိုလ်စွဲမယ်၊ ပြီးတော့ မန်ချက်စတာယူနိုက်တက်(သို့မဟုတ်)တော့တင်ဟမ်တို့သာ ယူရိုပါလိဂ်ချန်ပီယံဖြစ်ပြီး ပရီးမီးယားလိဂ်အမှတ်ပေးဇယားထိပ်ဆုံးငါးသင်းစာရင်းမှာ မပါဝင်လာဘူးဆိုရင် ပရီးမီးယားလိဂ်ကလပ်အသင်း ၇ ခုအထိ ချန်ပီယံလိဂ်ဝင်ခွင့်ရရှိသွားနိုင်ပါလိမ့်မယ်။ အဲ့ဒါဆိုရင် ပရီးမီးယားလိဂ်ကလပ်အသင်း ၇ ခုက ချန်ပီယံလိဂ်ဝင်ခွင့်ရရှိပြီး ယူရိုပါလိဂ်မှာ ကလပ်အသင်း ၂ ခု၊ ကွန်ဖရန့်လိဂ်မှာ ကလပ်အသင်း ၁ ခု ရှိလာနိုင်ပါတယ်။

တကယ့်ကိုရှားပါးလွန်းတဲ့အခြေအနေတစ်ရပ်မှာဆိုရင် အင်္ဂလန်အခြေစိုက်ကလပ်အသင်း ၁၁ ခုအထိ လာမယ့်ရာသီ၊ ဥရောပပြိုင်ပွဲဝင်ခွင့်ရရှိသွားနိုင်ပါတယ်။ ဒီအခြေအနေကတော့ -
•    လီဗာပူး၊ အာဆင်နယ်၊ နော်တင်ဟမ်ဖောရက်စ်၊ နယူးကာဆယ်၊ မန်စီးတီးက ပရီးမီးယားလိဂ်အမှတ်ပေးဇယားထိပ်ဆုံးငါးနေရာမှာ ရှိနေမယ်။
•    အက်စတွန်ဗီလာက အမှတ်ပေးဇယားအဆင့် ၆ မှ ၁၀ အတွင်း ရပ်တည်ပြီး အခုရာသီ၊ ချန်ပီယံလိဂ်ပြိုင်ပွဲမှာ ဗိုလ်စွဲမယ်။
•    မန်ချက်စတာယူနိုက်တက်(သို့မဟုတ်)တော့တင်ဟမ်က ယူရိုပါလိဂ်ဆုဖလားရရှိပြီး လိဂ်အမှတ်ပေးဇယားအဆင့် ၆ မှ ၁၀ အတွင်း ရှိနေမယ်။
•    နောက်ပြီး အခြားကလပ်အသင်းတစ်ခုက အက်ဖ်အေဖလားဗိုလ်စွဲပြီး အမှတ်ပေးဇယားအဆင့် ၆ မှ ၁၀ အတွင်း ရှိနေမယ်။
•    နောက်ထပ်ကလပ်အသင်းတစ်ခုက အမှတ်ပေးဇယားအဆင့် ၆ မှ ၁၀ အတွင်း ရှိနေပြီး ယူရိုပါလိဂ်ဝင်ခွင့်ရရှိမယ်။ 
•    ချဲလ်ဆီးကလည်း ယူရိုပါကွန်ဖရန့်လိဂ်ဗိုလ်စွဲပြီး အမှတ်ပေးဇယားအဆင့် ၆ မှ ၁၀ အတွင်း ရပ်တည်မယ်ဆိုရင် ပရီးမီးယားလိဂ်ကလပ်အသင်းအများစု လာမယ့်ရာသီ၊ ဥရောပပြိုင်ပွဲအရပ်ရပ်ဆီ ဝင်ရောက်ယှဉ်ပြိုင်ခွင့် ရရှိသွားပါလိမ့်မယ်။ ဒီအခြေအနေက ဖြစ်နိုင်ခြေနည်းပါးပေမယ့် ဥရောပပြိုင်ပွဲဝင်ခွင့်ရရှိဖို့ ဘယ်လောက်ခက်ခဲသလဲဆိုတာ၊ အရှုပ်အထွေးတွေနဲ့အတူ အပြောင်းအလဲရှိလာနိုင်တယ်ဆိုတာကို ပြသနေပါတယ်။

ဒါကြောင့် အချိန်ကာလအနည်းငယ်သာကျန်ရှိတော့တဲ့ ၂၀၂၄-၂၀၂၅ ပရီးမီးယားလိဂ်ဘောလုံးပြိုင်ပွဲမှာ ဥရောပပြိုင်ပွဲဝင်ခွင့်ရရှိရေးကြိုးပမ်းမှုတွေက ယခင်ထက် ပိုပြီးပြင်းထန်လာနိုင်ပါတယ်။ အမှတ်ပေးဇယားအဆင့်-၄ မှ အဆင့်-၁၁ အထိ ရမှတ်ကွာဟမှုကျဉ်းမြောင်းနေလို့ လာမယ့်ဘောလုံးရာသီမှာ ပရီးမီးယားလိဂ်ကလပ်အသင်း ၁၁ ခုအထိ ဥရောပအဆင့်ပြိုင်ပွဲတွေမှာ မြင်တွေ့ရနိုင်တဲ့ အခြေအနေတွေ ရှိလာနိုင်ပါတယ်။ ဘရိုက်တန်၊ ဘုန်းမောက်၊ နော်တင်ဟမ်ဖောရက်စ်တို့လို အသင်းတွေက သမိုင်းသစ်ရေးထိုးနိုင်ဖို့ ကြိုးစားနေစဉ် ပရီးမီးယားလိဂ်ရဲ့ဥရောပဝင်ခွင့်ပြိုင်ဆိုင်မှုကို ရာသီပိတ်ပွဲစဉ်အထိ ဘောလုံးပရိသတ်တွေ မျက်တောင်မခတ်တမ်း စောင့်ကြည့်သွားရပါတော့မယ်။