ချဲလ်ဆီးအသင်းကနေ အေစီမီလန်အသင်းထံ ပြောင်းရွှေ့ပြီးနောက် ဒီရာသီမှာ ပူလီဆစ်တစ်ယောက် စွမ်းဆောင်ရည်ကောင်းတွေ ဆက်တိုက်ပြသထားနိုင်ခဲ့ပါတယ်။ အမေရိကန်သားက ချန်ပီယံလိဂ်ပွဲမတိုင်ခင် အင်တာဗျူးတစ်ခုမှာ အခုလိုမျိုးပြန်လာနိုင်ခဲ့တဲ့အကြောင်း ပြောကြားခဲ့ပါတယ်။

“သေချာတာပေါ့။ ကျွန်တော့်အတွက် အဲ့မတိုင်ခင်တုန်းက အရမ်းခက်ခဲတဲ့ရာသီတော်တော်များများကို ဖြတ်သန်းခဲ့ရပါတယ်။ အဆုံးသတ်မှာ အခွင့်အရေးရလာခဲ့ပြီး မီလန်မှာ ကျွန်တော် ယုံကြည်မှု ပြန်ရလာခဲ့ပါတယ်။ ဒီလိုအသင်းမျိုးမှာ ကစားခွင့်ရလို့ ကျွန်တော်တကယ်ပဲ စိတ်လှုပ်ရှားမိပါတယ်။ နောက်တစ်ကြိမ်လူတွေကို ကျွန်တော် ဘာလုပ်နိုင်လဲဆိုတာကိုပြရတာ တကယ်ကောင်းပါတယ်”လို့ ပူလီဆစ်က ဖြေကြားခဲ့ပါတယ်။

ပူလီဆစ်ဟာ ၂၀၁၉ ဇန်နဝါရီတုန်းက ဒေါ့မွန်ကနေ ချဲလ်ဆီးအသင်းထံ ပြောင်းရွှေ့လာခဲ့တာဖြစ်ပြီး သမိုင်းတစ်လျှောက် အမေရိကန်သားတွေထဲမှာ ဈေးအကြီးဆုံးဖြစ်လာခဲ့ပါတယ်။ ဒါပေမယ့်လည်း အခြေအနေတွေက ထင်ထားသလိုဖြစ်မလာခဲ့ပဲ ၄ ရာသီအတွင်း ၂၆ ဂိုးသာ သွင်းယူနိုင်ခဲ့ပါတယ်။

အသက် ၂၅ နှစ်သားဟာ ပြီးခဲ့တဲ့နွေရာသီတုန်းက အေစီမီလန်အသင်းထံ  ပြောင်းရွှေ့လာခဲ့ပြီး ပြိုင်ပွဲစုံ ၁၅ ဂိုးသွင်း ၊ ၁၁ ဂိုးဖန်တီးနိုင်ခဲ့ပါတယ်။ နွေရာသီကတော့ ပူလီဆစ်အတွက် ကွင်းတွင်း ကွင်းပြင် အလုပ်များဖွယ်ရှိနေပြီး အမေရိကန်အသင်းနဲ့အတူ ကိုပါဖလားမှာ အဓိကနေရာကပါဝင်လာဖွယ်ရှိနေပါတယ်။ အမေရိကန်ဟာ အုပ်စု (C) မှာ ဥရုဂွေး ၊ ပနားမား ၊ ဘိုလီဗီးယားတို့နဲ့ တစ်အုပ်စုတည်းကျရောက်နေပါတယ်။