အက်ဖ်အေဖလားဆွတ်ခူးနိုင်ခြင်းနဲ့ ပရီးမီးယားလိဂ်ထိပ်ဆုံးလေးသင်းစာရင်းဝင်အဖြစ် ရာသီသိမ်းနိုင်ခြင်းတို့ကသာ ဆိုးရွားလှတဲ့ဘောလုံးရာသီတစ်ခုကို ကယ်တင်နိုင်လိမ့်မယ်လို့ မန်စီးတီးတိုက်စစ်မှူးဖိုဒန် ယုံကြည်နေပါတယ်။လိဂ်ကိုးပွဲရှုံးနိမ့်ထားမှုနဲ့အတူ ပက်ဂွါဒီယိုလာရဲ့အသင်းက အမှတ်ပေးဇယားဦးဆောင်သူလီဗာပူးနဲ့ ၂၂ မှတ်အထိ ကွာဟနေပြီး ချန်ပီယံလိဂ်ဝင်ခွင့်ရရှိဖို့လည်း တိုက်ပွဲဝင်နေရပါတယ်။ သူတို့တွေက အခုရာသီ၊ ချန်ပီယံလိဂ်ပြိုင်ပွဲရှုံးထွက်ပလေးအော့ဖ်အဆင့်မှာ ရီးရဲလ်မက်ဒရစ်ကိုရှုံးနိမ့်ပြီး ပြိုင်ပွဲမှထွက်ခွာလာခဲ့ရပါတယ်။

မန်စီးတီးအတွက် ရရှိနိုင်တဲ့ ဆုဖလားတွေအဖြစ် အက်ဖ်အေဖလားနဲ့ ပုံစံသစ်ပြောင်းလဲထားလို့ မကြာခဏဝေဖန်ခံနေရတဲ့ ရာသီကုန်ကာလအလွန် ကလပ်ကမ္ဘာ့ဖလားတို့သာ ကျန်ရှိပါတယ်။ ပြီးခဲ့တဲ့သြဂုတ်လမှာတုန်းက အခုလိုဆုဖလားတွေကို မန်စီးတီးအသင်းရဲ့ထိပ်တန်းပစ်မှတ်အဖြစ် မသတ်မှတ်ထားခဲ့ပေမယ့် ဖိုဒန်ကတော့ စိတ်ပျက်စရာဘောလုံးရာသီတစ်ခုမှာ တစုံတခုကိုတော့ အမိအရဆုပ်ကိုင်နိုင်ရမယ်လို့ ပြောဆိုခဲ့ပါတယ်။

ဖိုဒန်က “ ဒါ အရေးကြီးပါတယ်။ အက်ဖ်အေဖလားအပြင် ရာသီကုန် TOP 4 စာရင်းဝင်ရောက်နိုင်မှုက အသင်းရဲ့ဆိုးရွားလှတဲ့ဘောလုံးရာသီတစ်ခုကို ကယ်တင်သွားနိုင်လိမ့်မယ်လို့ ယူဆမိပါတယ်။ လာမယ့်ရာသီ၊ ချန်ပီယံလိဂ်ပြိုင်ပွဲဝင်ခွင့်ရရှိအောင် လုပ်ဆောင်သွားနိုင်ဖို့က အခုအချိန်၊ ကျွန်တော်တို့ရဲ့အဓိကပစ်မှတ်တွေအနက် တစ်ခု ဖြစ်ပါတယ်။ ပွဲစဉ်တိုင်းကိုသာ အနိုင်ရရှိသွားမယ်ဆိုရင် ကိုယ့်ကြမ္မာကိုယ်ဖန်တီးနိုင်ပါပြီ။ ကျွန်တော်တို့ ရရှိနိုင်တဲ့အရာတွေနဲ့ လုပ်နိုင်တဲ့အရာတွေအပေါ် ယုံကြည်မှုရှိနေရပါမယ်။

ဒီအတိုင်းသာ တကယ်ဖြစ်လာမယ်ဆိုရင် အပေါင်းလက္ခဏာဆောင်တဲ့ကိစ္စတစ်ခုလို့ သတ်မှတ်နိုင်ပြီး လာမယ့်ဘောလုံးရာသီသစ်ဆီ ယုံကြည်မှုပိုင်းပိုမိုအားကောင်းစွာနဲ့ ဝင်ရောက်သွားနိုင်ပါလိမ့်မယ်။ အခုအခြေအနေတွေက ရာသီအစပိုင်းမှာတုန်းက ကျွန်တော်တို့ ထားရှိခဲ့တဲ့ ရည်မှန်းချက်တွေနဲ့တော့ တထပ်တည်းမကျပါဘူး။ ဒါပေမယ့် တခါတရံ ဘောလုံးမှာ ဘယ်အရာကိုမှ ကြိုတင်မသိရှိနိုင်ပါဘူး။

ပြိုင်ဘက်အသင်းတွေက အစဉ်အမြဲတိုးတက်နေပြီး ကျွန်တော်တို့ကို စိန်ခေါ်နေကြပါတယ်။ ဟုတ်ပါတယ်၊ ကျွန်တော်တို့တွေ အခုဘောလုံးရာသီမှာ ခြေချော်မှုတွေရှိခဲ့ပေမယ့် ကိုယ်သာဆန္ဒရှိမယ်ဆိုရင် ခိုင်မာအားကောင်းတဲ့ပုံစံတစ်ခုနဲ့အတူ ရာသီပိတ်သိမ်းပြီး ကိုယ့်ရဲ့ဘောလုံးရာသီကို ကယ်တင်သွားနိုင်ပါလိမ့်မယ်”လို့ ပြောပါတယ်။