အမြဲတမ်းလိုလို ချဲလ်ဆီးထံ အပြောင်းအရွှေ့ကာလ နောက်ဆုံးရက် တနင်္လာနေ့မတိုင်ခင် ကစားသမားတွေ အများအပြား ရောက်လာနိုင်သလို ထွက်ခွာသွားနိုင်တဲ့ ကစားသမားတွေလည်း ရှိနေပါတယ်။ စတန်းဖို့ဒ်ဘရစ်ချ်မှာ ယခုလအတွင်း ပြောင်းရွှေ့မှုတွေ အနည်းငယ်ဖြင့်သာ ပြီးဆုံးခဲ့ပေမယ့် အပြောင်းအရွှေ့ကာလရဲ့ နောက်ဆုံးရက်တွေမှာ အခြေအနေတွေ အမြန်ပြောင်းလဲနိုင်ပါတယ်။

မာရက်စ်ကာကတော့ ဒီလိုပြောင်းလဲမှုတွေ ဖြစ်လာမယ်လို့ မျှော်လင့်နေပေမယ့် ဘယ်သူတွေ ရောက်လာမယ် ဘယ်သူတွေ ထွက်ခွာသွားမယ်ဆိုတာကို သူက မပြောနိုင်သေးပါဘူး။ "ကစားသမားတွေ ရောက်လာမယ်၊ ကစားသမားတွေ ထွက်ခွာသွားမယ်ဆိုတာ မျှော်လင့်ထားလို့ ရပါတယ်။ အခုအချိန်မှာ ဒါဟာ ပုံမှန်ပါပဲ"

"ဘယ်သူတွေ ထွက်ခွာသွားမယ်၊ ဘယ်သူတွေ ရောက်လာမယ်ဆိုတာ ကျွန်တော်တော့ မသိပါဘူး။ ဘာမဆို ဖြစ်နိုင်ပါတယ် ကျွန်တော်တို့ စောင့်ကြည့်ရမှာပေါ့။ ကျွန်တော့်အတွက် အဓိက အာရုံစိုက်ရမှာက ၄၈ နာရီအတွင်း ကစားရမယ့်ပွဲအတွက်ပါ။ ဒါဟာ အဓိက အာရုံစိုက်ရမယ့်အရာပါ" လို့ မာရက်စ်ကာ က သောကြာနေ့မနက်ပိုင်း သတင်းစာရှင်းလင်းပွဲမှာ ပြောကြားခဲ့ပါတယ်။ ချဲလ်ဆီးဟာ တနင်္လာနေ့ညမှာ ပရီးမီးယားလိဂ်ပွဲစဉ်အဖြစ် ဝက်စ်ဟမ်း နှင့် အိမ်ကွင်းမှာ ကစားရမှာဖြစ်ပြီး ဒါဟာ အပြောင်းအရွှေ့ ပိတ်ရက်နဲ့ တိုက်ဆိုင်နေပါတယ်။

သူ့ရဲ့ ကစားသမားတွေနဲ့ပတ်သက်ပြီး အများကြီး ပြောဆိုနေကြတာကို မာရက်စ်ကာ က ဝန်ခံခဲ့ပေမယ့် ဒါဟာ သူတစ်ယောက်တည်းအတွက် စိန်ခေါ်မှုမဟုတ်ဘူးလို့ ဆိုပါတယ်။ ဝက်စ်ဟမ်း မန်နေဂျာ ပေါတာကလည်း ဒီလိုပဲ ရင်ဆိုင်နေရမယ်လို့ သူက ပြောပါတယ်။ "အခုအချိန်မှာ ကစားသမားတွေနဲ့ပတ်သက်ပြီး အများကြီး ပြောဆိုနေကြတယ်။ ဒါပေမယ့် ဒါဟာ ကျွန်တော်တို့အတွက်ချည်းပဲ မဟုတ်ပါဘူး။ ပေါ်တာကို မေးရင် သူလည်း ဒီလိုပဲ ဖြစ်နေမှာပါ"

"သူတို့မှာ ကစားသမားတွေနဲ့ပတ်သက်ပြီး ပြောဆိုနေတာတွေ ရှိမရှိ ကျွန်တော် မသိပါဘူး။ ဒါပေမယ့် အားလုံးဟာ ဒီလိုပဲ ဖြစ်နေတာပါ။ ကလပ်တိုင်း၊ မန်နေဂျာတိုင်း ဒီလိုပါပဲ" လို့ မာရက်စ်ကာက ပြောပါတယ်။ ဒါပေမယ့် အပြောင်းအရွှေ့နဲ့ပတ်သက်တဲ့ ကောလဟာလတွေဟာ ကစားသမားတွေကို ထိခိုက်စေတယ်ဆိုတာကို သူက ဝန်ခံခဲ့ပါတယ်။ "၁၀၀ ရာခိုင်နှုန်း ထိခိုက်စေပါတယ်။ ကျွန်တော့်အတွက်လည်း ဟုတ်ပါတယ်။ ဒါပေမယ့် ကျွန်တော်တို့ပဲ မဟုတ်ပါဘူး၊ အားလုံးပါပဲ။ သူတို့ဟာ လူသားတွေပါ။ သူတို့ဟာ ပရော်ဖက်ရှင်နယ်တွေဖြစ်ပြီး အာရုံစိုက်နေပေမယ့် တခြားကလပ်တွေနဲ့ စကားပြောနေရင် အာရုံစိုက်မှုဟာ ၁၀၀ ရာခိုင်နှုန်း မဖြစ်နိုင်ပါဘူး"  လို့ ပြောပါတယ်။

ချဲလ်ဆီးရဲ့ တိုက်စစ်မှူး ဂျာအိုဖီးလစ်ဟာ နွေရာသီမှာပဲ ကလပ်နှင့်လက်မှတ်ရေးထိုးခဲ့ပေမယ့် စတန်းဖို့ဒ်ဘရစ်ချ်ကနေ ထွက်ခွာသွားနိုင်တယ်လို့ ကောလဟာလတွေ ထွက်နေပါတယ်။ ပေါ်တူဂီလက်ရွေးစင် ဖီးလစ်ဟာ လက်ရှိရာသီရဲ့ ပထမရာသီဝက်မှာ ကလပ်အတွက်သိသာတဲ့ သက်ရောက်မှုမျိုး မရှိခဲ့ပါဘူး။ ဒါပေမယ့် ဗီလာကတော့ သူ့ကို ဝယ်ယူဖို့ စိတ်ဝင်စားနေပါတယ်။

ဒီဆာဆီ ဟာလည်း ဗီလာရဲ့ ဦးတည်ချက်တစ်ခုဖြစ်နေပြီး ဒူစ်ဘယ်ရီဟော နဲ့ ဘန်ချီဝဲလ်တို့လို ကစားသမားတွေဟာလည်း ထွက်ခွာနိုင်တဲ့အခြေအနေမှာ ရှိနေပါတယ်။ အန်ကွန်ကူကိုလည်း ယူနိုက်တက် နဲ့ ဘိုင်ယန်မြူးနစ် တို့က စိတ်ဝင်စားနေပါတယ်။ ဒေါ့မွန်ရဲ့ ဂိုးသမား ကိုဘယ် နဲ့ ယူနိုက်တက်ရဲ့ တောင်ပံစစ်ကစားသမား ဂါနာချိုတို့ကိုလည်း ချဲလ်ဆီး က ခေါ်ယူရန် ပစ်မှတ်ထားနေပါတယ်။ ချဲလ်ဆီးဟာ တိုက်စစ်မှူးတစ်ဦးကို ဝယ်ယူဖို့လည်း စဉ်းစားနေပြီး ဘရိုက်တန်ရဲ့ အီဗန်ဖာဂူဆန်ကို စောင့်ကြည့်နေပါတယ်။