ဂျိုနသန် တာ က ဘိုင်ယန်မြူးနစ်တွင် တာဝန်များရယူရန်အတွက် အသင့်ရှိနေကြောင်း ပြောကြားခဲ့ပြီး နွေရာသီအပြောင်းအရွှေ့တွင် အသင်းသို့ ပြောင်းရွှေ့ပြီးနောက် လေးစားမှုကို ရယူရဦးမည်ဖြစ်ကြောင်း ဝန်ခံခဲ့ပါတယ်။ ဇွန်လတွင် ဘွန်ဒက်စ်လီဂါ ပြိုင်ဘက် လေဗာကူဆင် မှ ဘိုင်ယန်သို့ ရောက်ရှိလာပြီး ကလပ်ကမ္ဘာ့ဖလားတွင် ကိုယ်စားပြုကစားပြီးနောက် တာဟာ အသင်းတွင် ခေါင်းဆောင်မှုအခန်းကဏ္ဍကို ရယူရန် အသင့်ဖြစ်နေပြီး ဒါဟာ ဘာဗေးရီးယန်းတို့အနေနဲ့ သူ့ထံမှ မျှော်လင့်ထားတယ်လို့ ယုံကြည်နေပါတယ်။

တာဟာ လေဗာကူဆင်တွင် ၁၀ နှစ်ကြာ ကစားခဲ့ပြီး ၂၀၂၃-၂၄ ရာသီတွင် နည်းပြ ဇာဘီ အလွန်ဆို ရဲ့ လမ်းညွှန်ဦးဆောင်မှုဖြင့် ဘွန်ဒက်စ်လီဂါနှင့် ပိုကလပ်ဖလားများကို ရရှိခဲ့ပါတယ်။ သူဟာ ပြီးခဲ့တဲ့ နွေရာသီက ဘိုင်ယန်သို့ ပြောင်းရွှေ့ရန် နီးစပ်ခဲ့သော်လည်း စပိန်နိုင်ငံသားနည်းပြက ဘေအာရီနာတွင် နောက်တစ်နှစ် ဆက်နေရန် စည်းရုံးနိုင်ခဲ့ပါတယ်။ လေဗာကူဆင်နှင့် သူ့ရဲ့စာချုပ်က ဇွန်လကုန်တွင် သက်တမ်းကုန်ဆုံးမှာဖြစ်သော်လည်း ကွန်ပနီရဲ့ အသင်းကို ကလပ်ကမ္ဘာ့ဖလားတွင် ကိုယ်စားပြုနိုင်ရန်အတွက် ဘိုင်ယန်က အပြောင်းအရွှေ့ကြေး ပေးချေခဲ့ပါတယ်။ သူဟာ ပြိုင်ပွဲတွင် အသင်းရဲ့ ခံစစ်ကို ဦးဆောင်ခဲ့ပြီး ကွာတားဖိုင်နယ်အထိ တက်ရောက်နိုင်အောင် ကူညီခဲ့ကာ ကွာတားဖိုင်နယ်တွင် ပီအက်စ်ဂျီကို ရှုံးနိမ့်ခဲ့ပါတယ်။

တာက ဘိုင်ယန်သို့ ပြောင်းရွှေ့ရခြင်း အကြောင်းရင်းကို ကလပ်မီဒီယာသို့ ပြောကြားရာတွင် "ဒါဟာ ကျွန်တော့်အတွက် သက်သောင့်သက်သာဇုန်ကနေ ထွက်ခွာတဲ့ ခြေလှမ်းတစ်ရပ်ဖြစ်ပြီး ကျွန်တော် ဒါကို သတိရှိရှိနဲ့ လုပ်ခဲ့ပါတယ်။ လေဗာကူဆင်မှာ ဆယ်နှစ်ကြာ အချိန်ကောင်းတွေ ရှိခဲ့ပါတယ် ကလပ်နဲ့ ကျွန်တော်ကိုယ်တိုင်လည်း တိုးတက်လာခဲ့တယ်။ ပြီးတော့ အခု ကျွန်တော်အတွက် လုံးဝကို အသစ်အဆန်းဖြစ်တဲ့ ပတ်ဝန်းကျင်ကို ထပ်မံသိကျွမ်းဖို့ အချိန်တန်ပြီလို့ ခံစားခဲ့ရပါတယ်။ ဒါပေမဲ့ တစ်ခါတလေ ကိုယ့်ကိုယ်ကိုယ် ပြန်သုံးသပ်ပြီး 'နောက်ထပ် ခြေလှမ်းတစ်လှမ်းကို လှမ်းဖို့၊ လူတစ်ဦးအနေနဲ့ရော ဘောလုံးသမားတစ်ဦးအနေနဲ့ပါ တိုးတက်ဖို့ ဘာတွေ လုပ်နိုင်မလဲ' လို့ စဉ်းစားဖို့လည်း အရေးကြီးတယ်လို့ ကျွန်တော် ထင်ပါတယ်။ ဒါကြောင့် ဒီဆုံးဖြတ်ချက်ကို ချခဲ့တာပါ" လို့ ပြောကြားခဲ့ပါတယ်။

သူက ခေါင်းဆောင်မှုအခန်းကဏ္ဍကို ရယူခြင်းနှင့် ပတ်သက်၍လည်း "ဒီမှာ တာဝန်ယူချင်ပါတယ်။ ဒါက ကလပ်က ကျွန်တော့်အပေါ် မျှော်လင့်ထားတဲ့အရာဖြစ်သလို အထူးသဖြင့် ကျွန်တော် ကိုယ်ကို မျှော်လင့်ထားတဲ့အရာ ဖြစ်ပါတယ်။ ဒီကို ရောက်လာပြီး 'ကျွန်တော် ရောက်လာပြီ၊ အခု တာဝန်ယူပါပြီ' လို့ ပြောလို့ မရပါဘူး။ စွမ်းဆောင်ရည်ပြသရပါမယ်၊ အဲဒီအခါမှာ အချိန်၊ ပွဲစဉ်တွေ၊ လေ့ကျင့်ရေးတွေနဲ့အတူ ကွင်းထဲမှာရော အပြင်မှာပါ ပြသရမှာပါ။ ကိုယ်တိုင် မကျင့်သုံးတဲ့အရာတစ်ခုကို တခြားသူတွေဆီက တောင်းဆိုလို့ မရပါဘူး။ အဲဒီလိုလုပ်မှသာ ကျွန်တော် တခြားသူတွေဆီက မျှော်လင့်ပြီး သူတို့ကို တိုက်တွန်းနိုင်ပါလိမ့်မယ်" လို့ ပြောကြားခဲ့ပါတယ်။

ဘိုင်ယန်ဟာ ဩဂုတ်လ ၇ ရက်နေ့တွင် တော့တင်ဟမ် ၊ ဩဂုတ်လ ၁၂ ရက်နေ့တွင် ဂရပ်စ်ဟော့ပါးတို့နှင့် ခြေစမ်းပွဲများ ကစားမှာဖြစ်ပါတယ်။ ထို့နောက် ဩဂုတ်လ ၁၆ ရက်နေ့တွင် DFL စူပါဖလား ဗိုလ်လုပွဲတွင် စတုဂတ် နှင့် ရင်ဆိုင်ရမှာဖြစ်ပါတယ်။ သူတို့အသင်းဟာ ဩဂုတ်လ ၂၂ ရက်နေ့တွင် လိုက်ပ်ဇစ် နှင့် ဘွန်ဒက်စ်လီဂါ အဖွင့်ပွဲစဉ်ကို စတင်ကစားရမှာဖြစ်ပါတယ်။