အာဆင်နယ် ၊ ချဲလ်ဆီး နဲ့ လီဗာပူးအသင်းတို့က ချိတ်ဆက်နေတဲ့အပေါ် နယူးကာဆယ်အသင်းတိုက်စစ်မှူး အီဆက်က ပြန်လည်တုံ့ပြန်လာပါတယ်။ အီဆက်ဟာ ဒီရာသီနယူးကာဆယ်အသင်းနဲ့အတူ စွမ်းဆောင်ရည်ကောင်းတွေပြသနေပြီး ၁၉ ဂိုးအထိသွင်းယူပေးထားနိုင်ကာ အသင်းကို ကာရာဘောင်ဖလားဖိုင်နယ်ထံပို့ဆောင်ပေးထားနိုင်ခဲ့ပါတယ်။ အဆိုပါစွမ်းဆောင်ရည်တွေကြောင့် ထိပ်တန်းအသင်းတွေက ချိတ်ဆက်နေပြီး နွေရာသီမှာ ထိပ်တန်းသတင်းဖြစ်လာဖွယ်ရှိနေပါတယ်။

အာဆင်နယ်က အီဆက်ကို တစ်နှစ်ကျော်လောက်ချိတ်ဆက်နေတာဖြစ်ပြီး နယူးကာဆယ်ဘက်က ပေါင်သန်း ၁၂၀ တန်ကြေးသတ်မှတ်ထားပါတယ်။ အာတီတာကလည်း တိုက်စစ်မှူးသစ်ခေါ်ယူချင်ခဲ့ပေမယ့် ဇန်နဝါရီတုန်းက မခေါ်ယူနိုင်လိုက်တာကြောင့် ရမှတ် ၁၅ မှတ်အထိ လျော့ကျခဲ့ပါတယ်။ နယူးကာဆယ်ဟာ ကာရာဘောင်ဖိုင်နယ်မှာ လီဗာပူးအသင်းနဲ့ရင်ဆိုင်ရမှာဖြစ်ပြီး အီဆက်ရဲ့ခြေစွမ်းကို စောင့်ကြည့်ဖွယ်ရှိနေပါတယ်။

ချဲလ်ဆီးကလည်း တိုက်စစ်ပိုင်းအတွက် လာမယ့်နွေမှာ အီဆက်ကိုခေါ်ယူဖွယ်ရှိနေပါတယ်။ အပြောင်းအရွှေ့သတင်းတွေနဲ့ပတ်သက်ပြီး အီဆက်က “ကျွန်တော် နွေရာသီအကြောင်း မတွေးသေးပါဘူး။ ရာသီကုန်ချိန်မှာ အဲ့တာက ပြောစရာဖြစ်လာပါလိမ့်မယ်။ အခုတော့ ဘာမှမပြောနိုင်သေးပါဘူး။ ကျွန်တော် အကြိမ်ရေတော်တော်များများပြောပြီးပါပြီ။ ကျွန်တော့်အနာဂတ်အတွက် မစဉ်းစားသေးပါဘူး။ ကျွန်တော် ဒီမှာပျော်နေသလို ဆုဖလားစိန်ခေါ်နိုင်ဖို့အတွက် ကြိုးစားနေပါတယ်။

အခုဆိုဖိုင်နယ်ပွဲတစ်ပွဲကန်ရပါမယ်။ အခွင့်အရေးတွေရှိနေပါတယ်။ ကျွန်တော်တို့ တစ်ရာသီမှာ တစ်ကြိမ်လောက်သာရနိုင်ပါတယ်။ ဒီရာသီမှာ ကျွန်တော်တို့ ဆုဖလားရနိုင်ပါတယ်။
ကျွန်တော်အကြိမ်ရေများစွာပြောထားပြီးပါပြီ။ ကျွန်တော့်အလုပ်ကိုပဲ အာရုံစိုက်ထားသလို တနင်္ဂနွေနေ့အတွက် အာရုံစိုက်ထားပါတယ်”လို့ အီဆက်က ပြောကြားခဲ့ပါတယ်။ ပြီးခဲ့တဲ့အပတ်က ဝက်စ်ဟမ်းကိုအနိုင်ရခဲ့တဲ့ပွဲမှာ အီဆက်တစ်ယောက် လူစားလဲခံခဲ့ရပါတယ်။ အဲ့နောက် ပွဲအပြီးမှာ ဆွီဒင်သားက “ကျွန်တော် ဒဏ်ရာရတာမဟုတ်ပါဘူး။ မောပန်းတာကြောင့် လူစားလဲလိုက်တာပါ။

ကျွန်တော် ခံစားချက်ကောင်းနေသလို ဖိုင်နယ်ပွဲအတွက် စိတ်လှုပ်ရှားနေပါပြီ။ အကောင်းဆုံးနည်းလမ်းကတော့ သာမန်အတိုင်း ပြင်ဆင်တာပါ။ ကျွန်တော်တို့ အသင်းတစ်သင်းအနေနဲ့ လုပ်ဆောင်ဖို့ လိုအပ်သလို အာရုံစိုက်ဖို့လည်း လိုအပ်ပါတယ်။ ကျွန်တော်စိတ်လှုပ်ရှားနေပေမယ့် အလုပ်အပေါ်မှာ အာရုံစိုက်ထားပါတယ်”လို့ အီဆက်က ထပ်လောင်းပြောကြားခဲ့ပါတယ်။