၂၀၂၁ခုနှစ်ကတော့ တစ်ကမ္ဘာလုံးက လူတွေကို ကိုဗစ်နဲ့စိုးရိမ်စေခဲ့ရုံမကပါဘူး အားကစားပိုင်းမှာလည်း အသင်းကြီးတစ်ချို့ရလဒ်တွေဆိုးရွားမှုနဲ့အတူ ဘောလုံးပရိသတ်များအတွက် အိပ်မက်ဆိုးတွေ မက်နေရလျက် ရှိပါတယ်။ ဥရောပဘောလုံးခွင်အတွင်း ခြေပျက်ပြီး ရလဒ်တွေသိသိသာသာဆိုးနေတဲ့ အသင်းကြီးတစ်ချို့ရှိနေသလို တစ်ချို့အသင်းတွေကလည်း မှန်းချက်နဲ့ နှမ်းတွက်မကိုက်ကြသေးပါဘူး။

မက်ဆီမပါတဲ့ ကာလကိုဖြတ်သန်းရင်း ရုန်းကန်နေရတဲ့  ဘာစီလိုနာ
==========
နူးကမ့်ကွင်းက  ဒီနှစ်မှာ ရလဒ်အဆိုးဆုံးလို့ဆိုရမလိုပါဘဲ။ ပြီးခဲ့တဲ့ စနေညက နူးကမ့်မှာကစားခဲ့တဲ့ အလာဗက်စ်ကို သရေသာကစားနိုင်ခဲ့သလို ပွဲလာကြည့်တဲ့ ပရိသတ်ဦးရေဟာလည်း ၃၇၂၇၈ယောက်သာ ရှိခဲ့ပါတယ်။ ပရိသတ်ဦးရေ လျော့ကျနေခြင်းက အသင်းရဲ့ ဆိုးရွားတဲ့ ခြေစွမ်းတွေနဲ့သက်ဆိုင်လျက်ရှိပါတယ်။

လာလီဂါမှာရော ချန်ပီယံလိဂ်မှာပါ ဂိုးတွေ ရယူနိုင်ဖို့ခဲယဉ်းကာ ရလဒ်ပိုင်းတွေ မကောင်းတော့တဲ့နောက် နည်းပြကိုးမန်းကို ထုတ်ပြီး ယာယီနည်းပြကို ဘီအသင်းက ခေါ်ယူခန့်အပ်ထားပါတယ်။နည်းပြဘာဂျူအန် ပထမဆုံးကိုင်တွယ်တဲ့ အလာဗက်စ်ပွဲကလည်း သိသာစွာခြေစွမ်းတက်လာခြင်း မတွေ့ရဘဲ မက်ဆီမပါတဲ့ ဘာကာအခြေအနေဟာ အရှိန်အဝါလျော့လာပြီး တစ်ပွဲထက်တစ်ပွဲ ဆိုးရွားလာနေပါတယ်။

ကစားသမားတွေ နိုင်လိုစိတ်ပျောက်ဆုံးနေတဲ့ တော့တင်ဟမ်ရဲ့ အနေအထား
=========
တော့တင်ဟမ်အသင်းမှာ ဆိုးရွားတဲ့ ရာသီတွေ ရှိခဲ့ဖူးပါတယ် ဒါပေမဲ့ ၂၀၂၁မှာ ပိုဆိုးကုန်ပါတယ် ဆုဖလားအတွက် မျှော်မှန်းချက်တွေတောင် မရှိတော့သလို နည်းပြနူနိုဆန်းတို့စ်လက်အောက်မှာ ကစားသမားတွေက အသက်မပါသလို ကစားလာနေပါတယ်။

ရာသီအစ ကျဉ်းမြောင်းတဲ့ ၁-ဝရလဒ်တွေနဲ့ ၃ပွဲဆက်တိုက်နိုင်ခဲ့ပေမယ့် နောက်ပိုင်း မျှော်လင့်ချက်အလင်းရောင်က ကြီးထွားလာတဲ့ အမှောင်ထုထဲမှာ အားပျော့သွားသလိုပါဘဲ။ ၃ပွဲဆက်နိုင်ပြီးနောက်ပိုင်း စပါးဟာ ရလဒ်တွေဆိုးရွားလာခဲ့ပြီး ပရီးမီးယားလိဂ်ရော ယူရိုပါလိဂ်မှာပါ အသင်းကြီးအသင်းငယ်မရွေး ရှုံးလာပါတယ်။ ပြီးခဲ့တဲ့အပတ် ယူနိုက်တက်ကို ၃ဂိုးပြတ် ရှုံးပြီးနောက် နည်းပြနူနို အထုတ်ခံရဖို့နီးစပ်လာနေပြီး ကွန်တီ ရောက်လာဖို့များနေတယ်လို့ သတင်းများက ဆိုထားပါတယ်။

အောင်ပွဲသံတွေ တိတ်ဆိတ်နေတဲ့တူရင်
===========
ပြဿနာပေါင်းသောင်းခြောက်ထောင်ရှိနေတဲ့ တူရင်မှာ နည်းပြ အယ်လီဂရီလည်း တစ်ကျော့ပြန်ရောက်လာပေမယ့် ဖြေရှင်းမနိုင်တော့တဲ့ အနေအထားမျိုး ရောက်နေပါတယ်။လက်ရှိ စီးရီးအေ ၁၁ ပွဲကစားအပြီးမှာ ရမှတ်၁၅မှတ်သာ ရထားပြီး ထိပ်ဆုံးက နာပိုလီနဲ့ထက်ဝက်လောက် အမှတ်ပြတ်နေသလို အဆင့်၉နေရာမှာ ရပ်တည်နေပါတယ်။

ချန်ပီယံလိဂ်မှာ ရလဒ်မဆိုးပေမယ့် ၂၀၂၁အတွင်း ဂျူဗီရဲ့ ပြည်တွင်းဖလားပွဲတွေက ချန်ပီယံဆုစိန်ခေါ်ဖို့ဆိုတာထက် ချန်ပီယံလိဂ်ဝင်ခွင့်ရအောင် ကျားကုတ်ကျားခဲနဲ့ကြိုးစားရတော့မယ့် အခြေအနေရှိနေပါတယ်။

နိုင်သော်လည်း မပျော်ရသော ယူနိုက်တက်
=========
တော့တင်ဟမ်အသင်းကို ၃ဂိုးပြတ် နိုင်ခဲ့သော်လည်း ယူနိုက်တက်ပရိသတ်အများစုကတော့ နည်းပြဆိုးလ်ရှား အလုပ်မပြုတ်တဲ့အတွက် ပျော်ရွှင်မှုအပြည့် မရနေပါဘူး။  အထူးသဖြင့် ရော်နယ်ဒို၊ ဗာရာနီ၊ ဆန်ချိုတို့ခေါ်ယူပြီးနောက် အသင်းရှိကြယ်ပွင့်တွေနဲ့ ပေါင်းစပ်ကစားမယ်ဆိုရင် အသင်းကြီးတစ်သင်းသဖွယ် ရပ်တည်နေရမယ့်အစား ရလဒ်ကောင်းအောင် မနည်းကြိုးစားနေရတဲ့ အခြေအနေကို ယူနိုက်တက်ပရိသတ်တွေ စိတ်ပျက်နေကြပါတယ်။ ယူနိုက်တက်ပုံစံက နိုင်ပွဲတွေကို ရသလောက် သိမ်းကြုံးယူမယ့် ပုံစံ၊ ဆုဖလားတွေ စိန်ခေါ်နိုင်မယ့် ခြေစွမ်းမျိုး ခုထိ မတွေ့ရသေးပါဘူး။

မျှော်လင့်ထားသလို အတွဲအဖက်မမိသေးတဲ့ ပီအက်စ်ဂျီရဲ့ မက်ဆီ၊ နေမာ၊ မက်ပီ ကမ္ဘာကျော်အတွဲ
===============
မက်ဆီကို ခေါ်ယူလိုက်တုန်းက ပီအက်စ်ဂျီနှင့် ကမ္ဘာတစ်ဝန်းရှိ ဘောလုံးအသိုင်းအဝိုင်းအားလုံးက ပြင်သစ်ထိပ်သီးကလပ်ဟာ ချန်ပီယံလိဂ်အပါအဝင် ရှိသမျှ ဆုဖလားတွေ အားလုံး သိမ်းကြုံးယူတော့မယ်လို့ထင်မှတ်ခဲ့ကြပါတယ်။ဒါပေမဲ့ တကယ့်တကယ်မှာ ပီအက်စ်ဂျီခေါ်ယူထားတဲ့ သူတွေက လက်တွေ့အသုံးတည့်မှု ရှားပါးနေပြီး အထူးသဖြင့် မက်ဆီတစ်ယောက် အသင်းဖော်တွေနဲ့ချိတ်ဆက်နိုင်မှု မရှိသေးဘဲ ဖြစ်နေပါတယ်။

နည်းပြပိုချက်တီနိုအနေနဲ့လည်း မက်ဆီ၊ နေမာ၊ ကိုင်လီမက်ပီ အတွဲအဖက်ကို မည်သို့မည်ပုံ သုံးရမည် မသိဖြစ်နေတဲ့ ပုံစံပါ။ လက်ရှိ လီဂူးဝမ်းအမှတ်ပေးမှာ ပြတ်ပြတ်သားသား ရပ်တည်ထားတယ်ဆိုပေမယ့် သူတို့၃ယောက်တွဲဖက်ပြီး ထူးထူးခြားခြားခြေစွမ်းပြနိုင်တဲ့ပွဲက မရှိသလောက်ရှားပါးနေဆဲ ဖြစ်ပါတယ်။