ဘာစီလိုနာ နည်းပြ ဟန်စီ ဖလစ်ခ်က ကလပ်မီဒီယာ ချန်နယ်နှင့် အင်တာဗျူးတစ်ခု ပြုလုပ်ခဲ့ပြီး အသင်းနှင့် ရာသီတစ်လျှောက် ၎င်းတို့ရဲ့ တိုးတက်မှုများအကြောင်း ဆွေးနွေးခဲ့ပါတယ်။ သူက ရာဖင်ညာ နှင့် ပက်ဒရီ တို့ကို အထူးချီးကျူးစကား ပြောကြားခဲ့သလို ယာမဲလ် အတွက် အကြံဉာဏ်အချို့လည်း ပေးခဲ့ပါတယ်။

ဂျာမန်သားနည်းပြက ရာသီကြို ကာလတွင်ပင် ကြံ့ခိုင်ရေး နည်းပြချုပ်ဟူလီယို တူးစ် က ‘ကျွန်တော် မြင်နေရတဲ့ အရာတွေအရ လာလီဂါ ဖလားကို ကျွန်တော်တို့ ရရှိမယ်လို့ ထင်ပါတယ်’ လို့ ပြောကြားခဲ့ကြောင်း ရှင်းပြခဲ့ပါတယ်။ ဖလစ်ခ်နှင့် သူ့ရဲ့နည်းပြအဖွဲတွေက ပြည်တွင်းဖလားသုံးလုံးကို ရယူနိုင်ခဲ့ပြီးဖြစ်ရာ တူးစ်ရဲ့ ခန့်မှန်းချက်မှာ မှန်ကန်ခဲ့ပါတယ်။

အဓိက အခန်းကဏ္ဍတွင် ပါဝင်ခဲ့တာကတော့ ဆယ်ကျော်သက် ကြယ်ပွင့် ယာမဲလ်ပဲ ဖြစ်ပါတယ်။ အသင်းရဲ့တီထွင်ဖန်တီးမှု အဓိက အသက်သွေးကြောဖြစ်ပြီး ကြီးမားတဲ့ စွမ်းဆောင်ရည်များ ပြည့်နှက်နေတဲ့ ရာသီတစ်ခုအပြီးတွင် နေမာ ဂျူနီယာ နှင့်အတူ ဘရာဇီးတွင် အားလပ်ရက်များကို ကုန်ဆုံးနေပါတယ်။ သို့သော် ဖလစ်ခ်က သူ့အတွက် အကြံဉာဏ်အချို့ ပေးခဲ့ပါတယ်။

"ကျွန်တော် မကြာခဏ ပြောပါတယ်။ သူက ပါရမီရှင်တစ်ဦးပါပဲ။ ပြီးတော့ သူက ၁၇ နှစ်ပဲ ရှိပါသေးတယ် သူ့ကို ကျွန်တော်တို့ ကူညီရပါမယ်။ အခုထိတော့ အရာအားလုံး အဆင်ပြေပါတယ်။ နောက်ထပ် ၁၅ နှစ်အထိ အမြင့်ဆုံးအဆင့်မှာ ကစားချင်တယ်ဆိုရင် သူ အရမ်းကောင်းကောင်း လေ့ကျင့်ရမှာဖြစ်ပြီး စိတ်ပိုင်းဆိုင်ရာကိုလည်း ပြင်ဆင်ထားရပါမယ်။ သူက ဉာဏ်ကောင်းတယ်။ ပျော်ရွှင်မှုချည်းပဲ မဟုတ်ဘူး၊ အလုပ်လည်း လုပ်ရပါဦးမယ်"

"ပြီးတော့ သူ့လို ပါရမီရှင် ကစားသမားတွေက အဲ့ဒီလို လုပ်ရပါမယ်။ ရာဖင်ညာ လိုမျိုး အသင်းမှာ ကောင်းမွန်တဲ့ စံနမူနာကောင်း ကစားသမားတွေ ရှိပါတယ်။ သူကလည်း သူ့ကို ယုံကြည်မှု အများကြီး ပေးထားပါတယ်"  လို့ နည်းပြက ပြောကြားထားကြောင်း Sportက ဖော်ပြခဲ့ပါတယ်။

ရာဖင်ညာ နှင့် ပတ်သက်၍ ဖလစ်ခ်က ကလပ်သို့ ရောက်ရှိလာစဉ်က သူ့တွင် ယုံကြည်မှု လုံးဝမရှိခဲ့ကြောင်း သတိပြုမိခဲ့ပါတယ်။ ဘရာဇီး ကစားသမားက ဖလစ်ခ် မရှိခဲ့ပါက ပြီးခဲ့တဲ့နွေရာသီက ဘာစီလိုနာမှ ထွက်ခွာခဲ့ဖွယ်ရှိကြောင်း လူသိရှင်ကြား မှတ်ချက်ပေးခဲ့ပါတယ်။

"သူ့ကို ပထမဆုံးအကြိမ် ဒီမှာ ကစားတာ မြင်ခဲ့ရတုန်းက သူ ဘယ်လို ကစားသမားမျိုးလဲဆိုတာ သိခဲ့ရတယ်။ အရမ်းကို တက်ကြွတယ်၊ နောက်ဆုံး ဘောလုံးပေးပို့မှုတွေ လုပ်တယ်။ လီဝန်ဒေါ့စကီး ကို ဂိုးဖန်တီးပေးတယ်။ သူ့မှာ ယုံကြည်မှု လိုအပ်နေတယ်ဆိုတာလည်း ကျွန်တော် မြင်ခဲ့ရတယ်။ သူက ဘရာဇီးလူမျိုး ဖြစ်တဲ့အတွက် အရည်အချင်းရှိတယ် ဒါပေမဲ့ သူက စိတ်ဓာတ်၊ စိတ်နေသဘောထား၊ နဲ့ သဘောထားတွေကိုလည်း ယူဆောင်လာပါတယ်။ သူ အမြဲတမ်း ခံစစ်ပိုင်းမှာ အလုပ်လုပ်တယ်။ သူ့မှာ အလားအလာတွေ အများကြီး ရှိပါတယ်"

ပက်ဒရီ ကလည်း ယခုရာသီတွင် ဘာစီလိုနာ၏ ထူးခြားသော ကစားသမားတစ်ဦး ဖြစ်ပါတယ်။ "သူက ထူးချွန်ပါတယ်။ ပက်ဒရီက ဘောလုံးရပြီဆိုတာနဲ့ ကြည့်ရတာ အရမ်းကောင်းပါတယ်။ သူ့ကို အသင်းမှာ ပါဝင်ခွင့်ရတာ အရမ်းကောင်းပါတယ်။ ဒါ့အပြင် လာမယ့်နှစ်တွေမှာ သူ အသင်းရဲ့ ခေါင်းဆောင်တွေထဲက တစ်ဦး ဖြစ်လာနိုင်တယ်။ သူက အခုမှ ၂၂ နှစ်ပဲ ရှိပါသေးတယ်"

ဖလစ်ခ်အတွက်မူ စိန်ခေါ်မှု အများစုမှာ သူ့အသင်း ဘောလုံးပိုင်ဆိုင်မှု အဆင့်အတန်းကို ထိန်းသိမ်းရန် နည်းလမ်းများ ရှာဖွေခြင်းနှင့် ခံစစ်ပိုင်းအတွက် စိန်ခေါ်မှုအသစ်များ ဖန်တီးခြင်းတို့ ဖြစ်ပါတယ်။ ရာသီကုန်ပိုင်းတွင် အသင်းရဲ့ခံစစ်ပိုင်းတွင် တိုးတက်မှုအတွက် လိုအပ်သေးကြောင်း ရှင်းရှင်းလင်းလင်း ပြောကြားခဲ့သည်။ အကယ်၍ ယာမဲလ်၊ ပက်ဒရီနှင့် ရာဖင်ညာ တို့ကို အဆင့်အတန်းတူ ထိန်းသိမ်းထားနိုင်ပါက အောင်မြင်သော ရာသီတစ်ခုအတွက် များစွာ အထောက်အကူပြုမှာ ဖြစ်ပါတယ်။