မန်ချက်စတာစီးတီးတိုက်စစ်မှူး အာလင်းဟာလန်းက အသင်းရင်ဆိုင်ကြုံတွေ့နေရတဲ့ စွဲချက်ပေါင်း ၁၁၅ ချက်နဲ့ပတ်သက်ပြီး ကြောက်ရွံ့မှုမရှိကြောင်း အခိုင်အမာပြောကြားလာခဲ့ပါတယ်။ ပရီးမီးယားလိဂ်ရဲ့ ဘဏ္ဍာရေးစည်းမျဉ်းစည်းကမ်းတွေကို ချိုးဖောက်ခဲ့တဲ့ မန်စီးတီးဟာ အမှုပေါင်း ၁၁၅ ခုနဲ့ရင်ဆိုင်နေရတာဖြစ်ပြီး အခုချိန်အထိတော့ ရလဒ်ကိုစောင့်ဆိုင်းနေဆဲဖြစ်ပါတယ်။ ၂၀၀၉ ခုနှစ်နဲ့ ၂၀၁၈ ခုနှစ်အကြား ၉ နှစ်အတွင်းမှာ မန်စီးတီးဟာ ပရီးမီးယားလိဂ်ရဲ့ ဘဏ္ဍာရေးစည်းမျဉ်းတွေကို ချိုးဖောက်ထားခဲ့တယ်လို့ အက်ဖ်အေက စွဲချက်တင်ထားခဲ့တာဖြစ်ပါတယ်။ 

သို့သော်လည်း မန်စီးတီးဘက်ကတော့ စွပ်စွဲချက်တွေကို ငြင်းဆန်နေဆဲဖြစ်ပါတယ်။ မန်စီးတီးအနေနဲ့ ပြစ်မှုထင်ရှားကြောင်း စစ်ဆေးတွေ့ရှိခဲ့မယ်ဆိုရင်တော့ ပရီးမီးယားလိဂ်မှတန်းဆင်းရဖို့ ဖြစ်နိုင်ချေရှိသလို၊ ကြီးမားတဲ့ဒဏ်ကြေးနဲ့ အမှတ်လျှော့ခံရမှုတွေလည်း ဖြစ်လာနိုင်ပါတယ်။ ပြီးခဲ့တဲ့ဇန်နဝါရီကမှ ဟာလန်းဟာ မန်စီးတီးနဲ့ ၁၀ နှစ်သက်တမ်းရှိစာချုပ်တစ်ရပ်ကို ချုပ်ဆိုထားခဲ့တာဖြစ်ပေမယ့် ယခုအခါမှာ ကစားသမားဟာ ပြစ်ဒဏ်တွေကြုံတွေ့ခဲ့ရမယ်ဆိုရင်လည်း ကြောက်ရွံ့နေမှာမဟုတ်ကြောင်း အခိုင်အမာပြောကြားလာခဲ့ပါတယ်။ 

နော်ဝေးလက်ရွေးစင်က “ကျွန်တော် ဒီစွဲချက်တွေ၊ ပြစ်ဒဏ်တွေကို လုံးဝမကြောက်ပါဘူး။ ဒါကြောင့်ပဲအသင်းနဲ့ ၉ နှစ်ခွဲစာချုပ် ချုပ်ဆိုခဲ့တာပါ” လို့ပြောကြားခဲ့ပါတယ်။ ၂၀၂၃ နွေရာသီမှာ မန်စီးတီးသို့စတင်ရောက်ရှိလာခဲ့တဲ့ ဟာလန်းဟာ ပထမ ၂ ရာသီမှာ သွင်းဂိုး ၅၂ ဂိုးနဲ့ ၃၈ ဂိုးစီအသီးသီးသွင်းယူနိုင်ခဲ့သလို၊ ဒီရာသီမှာလည်း ပြိုင်ပွဲစုံ ၂၉ ဂိုးအထိသွင်းယူပြီး ထိပ်တန်းဂိုးသွင်းစွမ်းရည်ကို ဆက်လက်ပြသနေဆဲဖြစ်ပါတယ်။