ဒါဝင်နူနက်ဇ်က ပုံစံကောင်းပျောက်ဆုံးနေချိန်အတွင်း လီဗာပူးအသင်းမှာ သူ့ရဲ့ရုန်းကန်နေရမှုတွေကို ဖွင့်ဟလာခဲ့ပါတယ်။ ပြိုင်ပွဲစုံနောက်ဆုံး ၁၃ ပွဲမှာ တစ်ဂိုးသာသွင်းယူထားနိုင်တဲ့ အသက်-၂၅ နှစ်အရွယ်တိုက်စစ်မှူးက ပီအက်စ်ဂျီကို ပယ်နယ်တီအဆုံးအဖြတ်ဖြင့် ရှုံးနိမ့်ကာ လီဗာပူးအသင်း ချန်ပီယံလိဂ်ပြိုင်ပွဲမှထွက်ခွာလာရတဲ့ ပွဲစဉ်မှာလည်း အဆုံးအဖြတ်ပယ်နယ်တီကန်သွင်းမှုတစ်ကြိမ်ကို လွဲချော်ခဲ့ပြန်ပါတယ်။

ပြီးခဲ့တဲ့ဇန်နဝါရီလအတွင်း နူနက်ဇ်ကိုခေါ်ယူဖို့ ဆော်ဒီဘက်မှ ချိတ်ဆက်ခဲ့ဖူးသလို ဒီထင်ကြေးတွေက လာမယ့်နွေရာသီကာလအထိ ဆက်ရှိသွားပါလိမ့်မယ်။ ဒါ့အပြင် လတ်တလောသတင်းတွေအရ သူ့ရဲ့အခြေအနေကို စပိန်ဘက်မှလည်း စိတ်ဝင်စားမှုတွေရှိနေတယ်လို့ သိရပါတယ်။

ဒါကြောင့် လီဗာပူးအသင်းမှာ ဒါဝင်နူနက်ဇ်ရဲ့အနာဂတ်ရေရှည်ရှိနိုင်ပါဦးမလား စောင့်ကြည့်သွားရပါလိမ့်မယ်။ ဒါပေမယ့် ဥရုဂွေးလက်ရွေးစင်တာဝန်ထမ်းဆောင်ဖို့ ရောက်ရှိလာတဲ့ တိုက်စစ်မှူးက ကလပ်အသင်းလိုအပ်သလောက် အကောင်းဆုံးစွမ်းဆောင်ပေးနိုင်ခြင်းမရှိဘူးဆိုတာကို ဝန်ခံပြောဆိုခဲ့ပါတယ်။ဒါဝင်နူနက်ဇ်က “ လက်ရွေးစင်အသင်းအကြောင်း စဉ်းစားနေရလို့ ပျော်ရွှင်ကျေနပ်မိသလို ဒီအသင်းနဲ့အတူ ရှိနေရတဲ့ မိနစ်တိုင်းမှာလည်း ပျော်ရွှင်မိပါတယ်။

ဒါက ဘောလုံးကမ္ဘာမှာ ဖြတ်သန်းဖို့လိုအပ်တဲ့ အခိုက်အတန့်တွေလည်း ဖြစ်ပါတယ်။ ကျွန်တော်ပြောခဲ့ဖူးသလိုပါပဲ။ကျွန်တော်က ပွဲကစားချိန်တွေမရရှိလို့ လက်မြှောက်အရှုံးပေးသွားမယ့်သူမျိုး မဟုတ်ပါဘူး။ ကျွန်တော်က ပွဲကစားချိန်တွေရရှိဖို့အတွက် အလုပ်ကို ဆက်ကြိုးစားသွားမယ့်သူပါပဲ။

ကလပ်အသင်းအတွက် ရှိသင့်ရှိထိုက်သလောက် မစွမ်းဆောင်နိုင်သေးဘူးဆိုတာလည်း ကျွန်တော်သိပါတယ်။ အကောင်းဆုံးလုပ်နေချိန်မှာတောင် အခုလိုမျိုးဖြစ်နေတာ နားလည်ဖို့ ခက်ခဲလွန်းပါတယ်။ ပီအက်စ်ဂျီနဲ့ပွဲစဉ်မှာဆိုရင်လည်း နောက်ပွဲစဉ်ကျရင် ပွဲထွက်ခွင့်သေချာပေါက်ရရှိရမယ်ဆိုတဲ့ ယုံကြည်ချက်မျိုးနဲ့ ယုံကြည်မှုတွေမြှင့်တင်ကာ ပါဝင်ကစားခဲ့ပါတယ်။ ဒါပေမယ့် နောက်ပိုင်းမှာ ခြေချော်သွားခဲ့ပြန်ပါတယ်”လို့ Ovacion သတင်းဌာနဆီ ပြောပါတယ်။

ဒါဝင်နူနက်ဇ်က အန်းစလော့လက်အောက် လီဗာပူးအသင်းတိုက်စစ်ပိုင်းမှာ ဂျိုတာ၊ ဒီယက်ဇ်တို့ကို မကျော်ဖြတ်နိုင်ဘဲ ပွဲထွက်ခွင့်နည်းပါးခဲ့ပါတယ်။ သူက အခုရာသီ၊ လီဗာပူးအသင်းအတွက် ပွဲ ၄၀ ကစား၊ ခုနစ်ဂိုး သွင်းယူပေးခဲ့ပါတယ်။

သွင်းဂိုးတွေရရှိဖို့ ရုန်းကန်နေရမှုအကြောင်း ရှင်းပြပေးဖို့ တောင်းဆိုလာချိန်မှာတော့ သူ့ဘက်မှာ ကံကြမ္မာကောင်းမရှိဘူးလို့ ဥရုဂွေးသားက ဆိုပါတယ်။ ဒါဝင်နူနက်ဇ်က “ ဘောလုံးက ဂိုးပေါက်ဆီ မဝင်သွားချင်တာမျိုးပေါ့။ ကျွန်တော့်ရဲ့မိသားစုက ကျွန်တော့်ကို အမြဲတမ်းထောက်ခံအားပေးနေတယ်ဆိုတာ ကျွန်တော့်ရဲ့စိတ်ထဲမှာ စွဲစွဲမြဲမြဲမှတ်ယူထားပါတယ်။ လူတိုင်းအတွက် ပျော်ရွှင်မှုတွေ ယူဆောင်လာပေးဖို့နဲ့ အလုပ်တွေကို ဆက်လုပ်သွားနိုင်ဖို့အတွက် ဒီအချက်က အရေးအကြီးဆုံးပါပဲ”လို့ ပြောပါတယ်။