မာရက်စ်ကာကို နည်းပြသစ်အဖြစ် တရားဝင်ခန့်အပ်လိုက်ပြီဖြစ်တဲ့ ချဲလ်ဆီး
ချဲလ်ဆီးဟာ လက်စတာနည်းပြ အန်ဇိုမာရက်စ်ကာကို အသင်းရဲ့နည်းပြသစ်အဖြစ် တရားဝင်ခန့်အပ်ခဲ့ပြီး ၅ နှစ်သက်တမ်းရှိ စာချုပ်တစ်ရပ်ကို ချုပ်ဆိုခဲ့တယ်လို့ သိရပါတယ်။
ချဲလ်ဆီးအနေနဲ့ စတန်းဖို့ဒ်ဘရစ်ချ်မှာ တစ်ရာသီသာကြာမြင့်ခဲ့ပြီး ရုန်းကန်ခဲ့ရတဲ့ မော်ရီစီယိုပိုချက်တီနိုရဲ့နေရာမှာ နည်းပြသစ် အစားထိုးဖို့ ရှာဖွေနေခဲ့တာဖြစ်ပြီး ယခုအခါမှာတော့ အီတလီသားနဲ့ သဘောတူညီမှုရ ရှိခဲ့တာဖြစ်ပါတယ်။ အသက်-၄၄ နှစ်အရွယ်ရှိပြီဖြစ်တဲ့ မာရက်စ်ကာဟာ လက်စတာကို ၂၀၂၃ ခုနှစ်မှာ စတင်ကိုင်တွယ်ခဲ့ပြီး ပြီးခဲ့တဲ့ ရာသီက ချန်ပီယံရှစ်ဆုဖလားကို ဆွတ်ခူးပေးနိုင်ခဲ့ကာ ပရီးမီးယားလိဂ်သို့တန်းတက်အောင် စွမ်းဆောင်ပေးနိုင်ခဲ့ပါတယ်။
ယခုအခါမှာတော့ မာရက်စ်ကာက “ချဲလ်ဆီးလို ကမ္ဘာ့အကြီးမားဆုံးကလပ်တွေကို ပြောင်းရွှေ့ခွင့်ရဖို့က နည်းပြတိုင်းရဲ့အိပ်မက်ပါ။ ဒါကြောင့် ကျွန်တော်လည်း ဒီအခွင့်အရေးနဲ့ပတ်သက်ပြီး အရမ်းပဲစိတ်လှုပ်ရှားခဲ့ရပါတယ်။ ကလပ်ရဲ့အောင်မြင်မှု အစဉ်အလာကို ထိန်းသိမ်းပြီး ပရိသတ်တွေအတွက် ဂုဏ်ယူရမယ့် အသင်းတစ်သင်းအဖြစ် အတတ်နိုင်ဆုံးတည်ဆောက်သွားပါမယ်” လို့ ပြောကြားခဲ့ပါတယ်။
မာရက်စ်ကာဟာ သူ့ရဲ့ချဲလ်ဆီးနည်းပြ ရာထူးကို ဇူလိုင်လ ၁ ရက်နေ့မှာ စတင်တာဝန်ယူသွားမှာဖြစ်ပြီး ချဲလ်ဆီးအနေနဲ့ အခုလို အီတလီသားကိုခန့်အပ်ခဲ့ခြင်းမှာ ၅ နှစ်အတွင်း ၆ ကြိမ်မြောက်မန်နေဂျာရာထူး ခန့်အပ်မှုဖြစ်လာခဲ့ပါတယ်။ ပြီးခဲ့တဲ့ ၂၀၂၃-၂၄ ရာသီမှာ ချဲလ်ဆီးဟာ ပရီးမီးယားလိဂ်အမှတ်ပေးဇယားရဲ့ အဆင့် ၆ နေရာမှာ ရပ်တည်နိုင်ခဲ့သလို၊ ကာရာဘောင်ဖလားမှာ ဒုတိယရပြီး အက်ဖ်အေဖလား ဆီမီးဖိုင်နယ်အဆင့်ကို တက်လှမ်းနိုင်ခဲ့ပေမယ့် ပိုချက်တီနိုကို ထုတ်ပယ်ဖို့ဆုံးဖြတ်ခဲ့တာဖြစ်ပါတယ်။
ပိုချက်တီနို ထွက်ခွာသွားပြီးနောက်မှာတော့ စတန်းဖို့ဒ်ဘရစ်ချ်အသင်းဟာ နည်းပြသစ် အစားထိုးဖို့အတွက် အမျိုးမျိုးပစ်မှတ်ထားနေခဲ့ပြီး ဆန်ခါတင်စာရင်းထဲမှာ ဘရိုက်တန်နည်းပြဟောင်း ရော်ဘတ်တိုဒီဇာဘီ၊ အစ်ပ်ဆွစ်ချ်နည်းပြ ကီရန်မက်ကင်နာနဲ့ ဘရန့်ဖို့ဒ်နည်းပြ သောမတ်စ်ဖရန့်ခ်တို့ ပါဝင်ခဲ့ပါတယ်။ လာမယ့်နွေရာသီ ဇူလိုင်လ ၄ ရက်နေ့မှာတော့ ချဲလ်ဆီးဟာ နိုင်ငံ့လက်ရွေးစင်အသင်း အတွက် အရွေးမခံခဲ့ရတဲ့ ကစားသမားတွေနဲ့ အမေရိကန်သို့ ရာသီကြိုခြေစွမ်းပွဲစဉ်တွေကစားဖို့ ခရီးထွက်သွားမှာဖြစ်ပြီး နည်းပြသစ် မာရက်စ်ကာက စတင်ဦးဆောင်သွားမှာဖြစ်ပါတယ်။
ကွင်းလယ်ကစားသမား ၁ ဦးဖြစ်ခဲ့ဖူးတဲ့ မာရက်စ်ကာဟာ ကစားသမားဘဝက အင်္ဂလန်၊ စပိန်၊ အီတလီနဲ့ ဂရိနိုင်ငံတွေမှာ လှည့်ပတ်ကစားခဲ့ဖူးပါတယ်။ ၂၀၀၀ ခုနှစ် ဂျူဗင်တပ်စ်သို့ မပြောင်းခင်မှာ အီတလီသားဟာ ဝက်စ်ဘရွန်းမှာ ခဏတာ ကျင်လည်ခဲ့ပြီး ၂၀၀၆ ခုနှစ် မစ်ဒယ်ဘရော့နဲ့ယှဉ်ပြိုင်ခဲ့တဲ့ ယူအီးအက်ဖ်အေဖလား ဗိုလ်လုပွဲမှာ ဆီဗီလာအတွက် ၂ ဂိုး သွင်းယူပေးခဲ့ပါတယ်။
၂၀၂၁ ခုနှစ်မှာတော့ မာရက်စ်ကာဟာ ပါးမားကို စတင်တာဝန်ယူကိုင်တွယ်ခဲ့ပြီး သူ့ရဲ့လက်အောက် ၁၄ ပွဲမှာ အီတလီကလပ်ဟာ နိုင်ပွဲ ၄ ပွဲသာ ရရှိခဲ့ပါတယ်။ မန်စီးတီး ယူ-၂၃ အသင်းကို ကိုင်တွယ်ခဲ့ဖူးတဲ့ နည်းပြဟာ ၂၀၂၂ ခုနှစ် ဇွန်လမှာတော့ ပက်ဂွါဒီယိုလာရဲ့ လက်ထောက်နည်းပြအဖြစ် တာဝန်ထမ်းဆောင်ခဲ့ပါတယ်။
၂၀၂၂-၂၃ ရာသီမှာ မန်စီးတီးနဲ့အတူ ဆုဖလား ၃ လုံးအောင်မြင်မှုကို ဆွတ်ခူးနိုင်ခဲ့ပြီးနောက်မှာတော့ အီတလီသား လက်စတာသို့ ပြောင်းရွှေ့ခဲ့ပြီး နည်းပြချုပ်အဖြစ်တာဝန်ယူကာ ပရီးမီးယားလိဂ်သို့ တန်းတက်အောင်စွမ်းဆောင်နိုင်ခဲ့ပါတယ်။ ယခုအခါမှာတော့ မာရက်စ်ကာအနေနဲ့ ချဲလ်ဆီးလို ကလပ်အသင်းကြီးတစ်သင်းကို ကိုင်တွယ်သွားရမှာဖြစ်လို့ ထိပ်တန်းဘောလုံးအဆင့်မှာ ဘယ်လောက်အထိလုပ်ပြနိုင်မလဲ စောင့်ကြည့်သွားရပါမယ်။
