ချဲလ်ဆီးကစားသမားတွေအနေဖြင့် အခုဘောလုံးရာသီ၊ ယူရိုပါကွန်ဖရန့်လိဂ်ဆုဖလားကို ပရိသတ်တွေနဲ့ ကလပ်အသင်းအတွက် အရယူသွားပေးဖို့ တာဝန်ရှိတယ်လို့ အန်ဇိုမာရက်စ်ကာက ပြောပါတယ်။ ချဲလ်ဆီးက ဒီနေ့မနက်ပိုင်း၊ ယူရိုပါကွန်ဖရန့်လိဂ် ၁၆ သင်းရှုံးထွက်အဆင့်ဒုတိယအကျော့ပွဲစဉ်မှာ ကိုပင်ဟေဂင်ကို ၁-၀ ဂိုးဖြင့် အနိုင်ယူပြီး နှစ်ကျော့ပေါင်းရလဒ် ၃-၁ ဂိုးဖြင့် ကွာတားဖိုင်နယ်အဆင့်ဆီ တက်ရောက်သွားခဲ့ပါတယ်။

အခုပြိုင်ပွဲမှာ ဗိုလ်စွဲဖို့ရေပန်းအစားဆုံးဖြစ်တဲ့ အနောက်လန်ဒန်ကလပ်အသင်းက လာမယ့်ပွဲစဉ်မှာ လီဂီယာဝါဆောနဲ့ ယှဉ်ပြိုင်သွားရဖို့ ရှိနေပြီး အန်ဇိုမာရက်စ်ကာကလည်း သူ့ရဲ့ကစားသမားတွေဆီ ပြိုင်ဘက်အားလုံးကို ကျော်ဖြတ်နိုင်ရေး တိုက်တွန်းစိန်ခေါ်ခဲ့ပါတယ်။
မာရက်စ်ကာက “ အတိတ်ကာလမှာ ဒီကလပ်အသင်းက ဆုဖလားတိုင်းကို ဆွတ်ခူးနိုင်ခဲ့ပါတယ်။ အခုရာသီ၊ ကိုယ့်ရဲ့ပစ်မှတ်ကို အမိအရဆုပ်ကိုင်နိုင်ရေးအတွက် အကောင်းဆုံးပုံစံမှာ ရှိနေဖို့ လိုအပ်ပါတယ်။ ကျွန်တော်တို့က ကလပ်အသင်းနဲ့ ပရိသတ်တွေအတွက် ဆုဖလားတစ်လုံးတော့ အရယူသွားပေးဖို့ လိုအပ်ပါတယ်။

ကွာတားဖိုင်နယ်ရောက်ရှိဖို့ဆိုတာ အရေးကြီးပါတယ်။ အခုတော့ နောက်ထပ်ပစ်မှတ်က ဆီမီးဖိုင်နယ်ပေါ့။ ကျွန်တော်တို့အတွက် ထိုက်တန်တဲ့ရလဒ်ဖြစ်ပါတယ်။ ဒုတိယပိုင်းပွဲချိန်တွေမှာ ကျွန်တော်တို့အသင်းကစားပုံကို ထိန်းညှိပြောင်းလဲခဲ့ပြီး ပိုကောင်းလာခဲ့ပါတယ်။ စိတ်ရှည်ဖို့တော့ လိုအပ်ပါတယ်”လို့ ပြောပါတယ်။ အခုပွဲစဉ်မှာ ချဲလ်ဆီးကွင်းလယ်ကစားသမားဒူးစ်ဘူရီဟောလ်က ဒုတိယပိုင်းပွဲချိန်စတင်ပြီး မကြာခင်မှာပဲ တစ်လုံးတည်းသောအနိုင်ဂိုးကို သွင်းယူပေးခဲ့ပါတယ်။

ပြီးခဲ့တဲ့နွေရာသီ၊ လက်စတာအသင်းမှ ရောက်ရှိလာပြီးနောက် ပုံမှန်ပွဲထွက်ခွင့်ရရှိရေးရုန်းကန်နေရတဲ့ ဒူးစ်ဘူရီဟောလ်က ယူရိုပါကွန်ဖရန့်လိဂ်မှာ ဗိုလ်စွဲနိုင်ရေး ချဲလ်ဆီးအတွက်အရေးပါပုံကို ရှင်းပြရင်း မာရက်စ်ကာရဲ့စကားကို ထောက်ခံလိုက်ပါတယ်။ ဒူးစ်ဘူရီဟောလ်က “ ချဲလ်ဆီးအသင်းဆိုတာ ချန်ပီယံလိဂ်၊ ယူရိုပါလိဂ်လိုပြိုင်ပွဲကြီးတွေမှာ ဗိုလ်စွဲခဲ့ဖူးပါတယ်။ ဒီပြိုင်ပွဲမှာလည်း ကျွန်တော်တို့အသင်း ဗိုလ်မစွဲနိုင်ဘူးလို့ပြောရင် ရူးနှမ်းရာကျပါလိမ့်မယ်။ ဒါက ကိုယ့်ကိုယ်ကိုယ် အထင်ကြီးနေတာမျိုးမဟုတ်ပါဘူး။ ဒါပေမယ့် ကျွန်တော်တို့က ကိုယ့်အသင်းလူစာရင်းပိုင်းရဲ့အရည်အသွေးတွေကို သိထားလို့ပဲ ဖြစ်ပါတယ်။ ကိုပင်ဟေဂင်က အသင်းကောင်းတစ်ခုဖြစ်ပြီး သူတို့ကို ကျော်ဖြတ်နိုင်ခဲ့လို့ ပျော်ရွှင်ကျေနပ်မိပါတယ်”လို့ ပြောပါတယ်။