ဘရာဇီးတိုက်စစ်မှူးရာဖင်ဟာက ခါးသီးပြိုင်ဘက်အာဂျင်တီးနားနဲ့ရင်ဆိုင်ရမယ့် ကမ္ဘာ့ဖလားခြေစစ်ပွဲအဝေးကွင်းပွဲစဉ်မှာ ကိုယ်တိုင်ဂိုးသွင်းယူမယ်လို့ အာမခံပြီး ရုပ်ပိုင်းဆိုင်ရာတိုက်ပွဲတွေ ပိုမိုမြင်တွေ့ရလိမ့်မယ်လို့ ဆွေးနွေးခဲ့ပါတယ်။

ဘရာဇီးဂန္တဝင်ရိုမာရီယိုနဲ့အတူ “Romario TV” အင်တာဗျူးအစီအစဉ်တစ်ခုမှာ ရာဖင်ဟာက “ ကျွန်တော်တို့ သူတို့ကို လုံးဝအနိုင်ယူသွားပါမယ်။ သူတို့ကို အနိုင်ယူသွားမယ်။ ကွင်းတွင်းမှာရော၊ ကွင်းပြင်ပမှာပါ ကျွန်တော်တို့ အနိုင်ယူပါမယ်။ ကျွန်တော်ကိုယ်တိုင်လည်း ဂိုးသွင်းနိုင်မယ်ဆိုတာ သေချာပါတယ်။ ကျွန်တော့်မှာရှိသမျှအရာအားလုံးကို ပေးဆပ်သွားပါမယ်”လို့ ပြောပါတယ်။

အခုလို ရာဖင်ဟာရဲ့မှတ်ချက်တွေကြောင့် အာဂျင်တီးနားမှာလည်း ရုတ်ရုတ်သဲသဲဖြစ်လာခဲ့ပြီး ပြည်တွင်းမီဒီယာတွေက ကြမ်းတမ်းခက်ထန်တဲ့ ခြိမ်းခြောက်မှုလို့ သတ်မှတ်ခေါ်ဝေါ်ခဲ့ပါတယ်။ လက်ရှိကမ္ဘာ့ဖလားချန်ပီယံတွေရဲ့နည်းပြစကာလိုနီကတော့ ဘရာဇီးနဲ့အပြိုင် စကားလုံးတိုက်ပွဲတွေ မဆင်နွှဲဖို့အတွက် ဆုံးဖြတ်ခဲ့ပါတယ်။

တနင်္လာနေ့နှောင်းပိုင်းသတင်းစာရှင်းလင်းပွဲမှာ စကာလိုနီက “ ကွင်းတွင်းမှာတော့ တိုက်ပွဲဝင်နေတဲ့ သူရဲကောင်းတွေပေါ့၊ ကွင်းပြင်ပမှာ သူငယ်ချင်းမိတ်ဆွေတွေပါ။ ကျွန်တော်က ကစားသမားတွေရဲ့စကားကို ထဲထဲဝင်ဝင်မလေ့လာမိပေမယ့် ဒီကိစ္စကိုတော့ သိပါတယ်။ အာဂျင်တီးနားနဲ့ ဘရာဇီးပွဲစဉ်ဆိုတာ အရေးကြီးပွဲစဉ်တစ်ခုပါ။ ဒါပေမယ့် ဘောလုံးပွဲတစ်ခုသာ ဖြစ်ပါတယ်။ အဲ့ဒါထက်ကျော်လွန်သွားဖို့လည်း မလိုပါဘူး။

မာရာကာနာကွင်းရဲ့ကိုပါအမေရိကဗိုလ်လုပွဲအပြီး နေမာနဲ့အတူ မက်ဆီကို မြင်တွေ့ရတဲ့ပုံရိပ်ကို ကျွန်တော် မှတ်မိနေပါတယ်။ ဒီလိုပုံရိပ်မျိုးကိုပဲ ကျွန်တော်တို့ ထိန်းသိမ်းသွားရပါမယ်။ ကမ္ဘာ့အကောင်းဆုံးဘောလုံးသမားနဲ့ ဒုတိယအကောင်းဆုံးဘောလုံးသမားတွေက သူငယ်ချင်းမိတ်ဆွေတွေ ဖြစ်ကြပါတယ်။ဒါကသာလျှင် ကျွန်တော်တို့လိုအပ်နေတဲ့ ပုံရိပ်ဖြစ်ပါတယ်။

ကျွန်တော်တို့နှစ်သင်းလုံး အနိုင်ရရှိချင်တဲ့ပွဲစဉ်မျိုးပါပဲ။ ကျွန်တော်တို့အားလုံးမှာ ဘရာဇီးသားသူငယ်ချင်းတစ်ဦးစီတော့ ရှိကြပါတယ်။ ကျွန်တော်လည်း သူတို့အားလုံးကို သိပါတယ်။ ဒီထက်ပိုပြီး မကျော်လွန်သင့်ပါဘူး။ ဒီထက်ပိုပြီးတော့လည်း အများကြီးစဉ်းစားနေဖို့ မလိုပါဘူး”လို့ ပြောပါတယ်။

အခုသီတင်းပတ်၊ ဗျူနိုအေးရိစ်မှာကစားမယ့်ပွဲစဉ်က ရာဖင်ဟာအတွက် ၂၀၂၁ ခုနှစ်နောက်ပိုင်း အာဂျင်တီးနားနဲ့ပထမဆုံးအကြိမ်ပြန်လည်ရင်ဆိုင်ရမယ့် အခိုက်အတန့် ဖြစ်လာပါတယ်။ ဘရာဇီးက နောက်ဆုံးခြောက်နှစ်အတွင်း အာဂျင်တီးနားကို အနိုင်မရရှိခဲ့သလို အာဂျင်တီးနားမြေမှာကစားတဲ့ ပွဲစဉ်တွေမှာလည်း အနိုင်ရလဒ်မဖော်ဆောင်နိုင်တာ ၁၆ နှစ်အထိ ရှိနေပါပြီ။ လတ်တလောမှာ အာဂျင်တီးနားက တောင်အမေရိကဇုန်ကမ္ဘာ့ဖလားခြေစစ်ပွဲအမှတ်ပေးဇယားရဲ့ထိပ်ဆုံးနေရာမှာ ရမှတ် ၂၈ မှတ်ဖြင့် ရပ်တည်နေပြီး ဒုတိယနေရာရှိ အီကွေဒေါထက် ခြောက်မှတ်အသာ၊ တတိယနေရာရှိ ဘရာဇီးထက် ခုနစ်မှတ်အသာ ရရှိထားပါတယ်။

အမေရိကန်၊ မက္ကဆီကို၊ ကနေဒါတို့ ပူးတွဲအိမ်ရှင်အဖြစ် လက်ခံကျင်းပမယ့် ၂၀၂၆ ကမ္ဘာ့ဖလားပြိုင်ပွဲကို တောင်အမေရိကဇုန်ကိုယ်စားပြုအသင်းခြောက်ခု ပါဝင်ယှဉ်ပြိုင်ခွင့်ရရှိပါမယ်။