လီဗာပူးနည်းပြ အန်းစလော့က ဗုဒ္ဓဟူးနေ့နံနက်က ပီအက်စ်ဂျီကို ပင်နယ်တီအဆုံးအဖြတ်နဲ့ရှုံးနိမ့်ပြီး ချန်ပီယံလိဂ်ပြိုင်ပွဲကနေ ထွက်ခွာခဲ့ရတဲ့ပွဲစဉ်က သူ့ဘဝအတွက် အကောင်းဆုံးပွဲစဉ်ဖြစ်တယ်လို့ ပြောကြားလာခဲ့ပါတယ်။  ပထမအကျော့ပြင်သစ်မြေမှာ ဟာဗေးအီလီးယော့ရဲ့ နောက်ကျသွင်းဂိုးနဲ့ ပီအက်စ်ဂျီကို ၀-၁ နဲ့အနိုင်ယူခဲ့တဲ့ လီဗာပူးဟာ ဒုတိယအကျော့အိမ်ကွင်းမှာ အနိုင်ရလဒ်ကို ဆက်လက်ထိန်းသိမ်းနိုင်ခဲ့ခြင်းမရှိဘဲ ၀-၁ နဲ့ပြန်လည်အရေးနိမ့်ခဲ့တာကြောင့် အချိန်ပိုနဲ့ ပင်နယ်တီအဆုံးအဖြတ်အထိ ဆက်လက်ယှဉ်ပြိုင်ခဲ့ရပြီး ပင်နယ်တီမှာ ၁-၄ နဲ့ရှုံးနိမ့်ခဲ့ပါတယ်။ 

ယခုပွဲစဉ်မှာ ပီအက်စ်ဂျီအတွက် တစ်လုံးတည်းသော အနိုင်ဂိုးကိုခြေစွမ်းပြနေတဲ့ ဒမ်ဘီလီက ပွဲအစ ၁၂ မိနစ်မှာပဲ သွင်းယူပေးခဲ့တာဖြစ်ပါတယ်။ ပင်နယ်တီအဆုံးအဖြတ်မှာ လီဗာပူးတောင်ပံကစားသမား မိုဟာမက်ဆာလက်တစ်ယောက်ပဲ ဝင်အောင်ကန်သွင်းနိုင်ခဲ့ပြီး အခြားကစားသမားတွေဖြစ်တဲ့ ဒါဝင်နူနက်ဇ်နဲ့ ကာတစ်ဂျုံးစ်တို့ရဲ့ကန်ချက်တွေကိုတော့ ပီအက်စ်ဂျီဂိုးသမား ဒွန်နာရမ်မာက ကာကွယ်နိုင်ခဲ့ပါတယ်။ 

ချန်ပီယံလိဂ်ပြိုင်ပွဲကို ၁၆ သင်းအဆင့်မှာတင် လက်ပြနှုတ်ဆက်ခဲ့ရပေမယ့် ပွဲအပြီးမှာတော့ အန်းစလော့က အသင်းရဲ့စွမ်းဆောင်ရည်ကို ချီးကျူးခဲ့ပြီး သူ့ဘဝရဲ့ အကောင်းဆုံးပွဲစဉ်ဖြစ်ခဲ့တယ်လို့ ဆိုပါတယ်။ စလော့က "ဒီဘောလုံးပွဲက ကျွန်တော်ကိုယ်တိုင်ပါဝင်ပတ်သက်ရတဲ့ ဘဝရဲ့အကောင်းဆုံးပွဲပါပဲ။ ကျွန်တော်အရင်က လီဗာပူးမှာနည်းပြမလုပ်ခဲ့ဖူးတော့ ဒီထက်ကောင်းတဲ့ပွဲတွေမှာ ကျွန်တော်မပါဝင်ခဲ့ရပါဘူး။ ဒါပေမယ့် ဒီနေ့ပွဲကတော့ ကျွန်တော့်အတွက်အကောင်းဆုံးဖြစ်ခဲ့ပြီး ၂ သင်းစလုံးက အရမ်းကောင်းခဲ့ကြပါတယ်။ 

အထူးသဖြင့် ပွဲအစ ပထမပိုင်း ၂၅ မိနစ်အတွင်းမှာ ကျွန်တော်တို့ အရမ်းကောင်းခဲ့ပါတယ်။ အသင်းကအရမ်းကောင်းနေပေမယ့် ဂိုးရလဒ်ကိုကြည့်မိချိန်မှာတော့ ကျွန်တော်တို့ ၀-၁ နဲ့ရှုံးနိမ့်နေခဲ့တာပါ" "ပထမအကျော့မိနစ် ၉၀ အတွင်းမှာတော့ ကျွန်တော်တို့အနေနဲ့ ဒီပွဲကိုရှုံးနိမ့်ဖို့ မထိုက်တန်ဘူးလို့ ထင်ပါတယ်။ဒါပေမယ့် အခုဒုတိယအကျော့ မိနစ် ၁၈၀ အကျော်မှာတော့ ရှုံးနိမ့်သွားနိုင်တယ်လို့ ထင်ခဲ့ပါတယ်။ အချိန်ပိုမှာ ပီအက်စ်ဂျီက ကျွန်တော်တို့ထက် နည်းနည်းလေးပိုကောင်းခဲ့ပါတယ်။ ပြီးတော့ ပင်နယ်တီမှာတော့ ကျွန်တော်တို့ ရှုံးနိမ့်သွားခဲ့ပါတယ်" လို့ပြောကြားခဲ့ပါတယ်။ 

ဆက်လက်ပြီး စလော့က ယခုရာသီချန်ပီယံလိဂ်ပြိုင်ပွဲရဲ့ ပုံစံအသစ်ကို စိတ်ပျက်မိကြောင်း "ချန်ပီယံလိဂ်ပြိုင်ပွဲပုံစံအသစ်ကို စတွေ့ချိန်မှာ ကျွန်တော်ရှော့ခ်ရသွားပါတယ်။ ဒီရာသီမတိုင်ခင်က ကျွန်တော်တို့ ချန်ပီယံလိဂ်ဝင်ခွင့်မရခဲ့ပါဘူး။ လိဂ်မှာ အဆင့် ၁ ဖြစ်နေတဲ့ကျွန်တော်တို့က ဥရောပရဲ့အကောင်းဆုံးအသင်းတွေထဲကတစ်သင်းဖြစ်တဲ့ ပီအက်စ်ဂျီနဲ့ ထိပ်တိုက်တွေ့ဆုံခဲ့ရတာ ကံမကောင်းပါဘူး။ ဒါပေမယ့် ချန်ပီယံလိဂ်ရဲ့ ပုံစံအရ ထိပ်တိုက်တွေ့ခဲ့ရပါတယ်။ ဒါကိုလက်ခံပြီး နောက်ရာသီမှာ ပိုကောင်းတဲ့အခြေအနေနဲ့ ပြန်လာနိုင်ဖို့ကြိုးစားသွားပါမယ်" လို့ပြောကြားခဲ့ပါတယ်။ 

ဆုဖလား ၃ လုံးမျှော်လင့်ချက်နဲ့လွဲချော်ခဲ့တဲ့ လီဗာပူးဟာ ပရီးမီးယားလိဂ်ဖလားကို ဆွတ်ခူးနိုင်ဖို့ အတော်လေးအလားအလာကောင်းနေသလို လာမယ့် တနင်္ဂနွေနေ့မှာတော့ ကာရာဘောင်ဖလား ဗိုလ်လုပွဲစဉ်အဖြစ် နယူးကာဆယ်ကို ဝင်ဘလေကွင်းမှာ သွားရောက်ရင်ဆိုင်ရပါမယ်။