
အက်သလက်တီကိုမက်ဒရစ်ကိုအနိုင်ယူပြီး ကိုပါဒယ်ရေးဗိုလ်လုပွဲသို့တက်လှမ်းခဲ့တဲ့ ဘာစီလိုနာ
ကြာသပတေးနေ့နံနက်က ယှဉ်ပြိုင်ခဲ့တဲ့ စပိန်ကိုပါဒယ်ရေးဆီမီးဖိုင်နယ်ပွဲစဉ်မှာ ဘာစီလိုနာဟာ အက်သလက်တီကိုမက်ဒရစ်ကို အဝေးကွင်းမှာ ၀-၁ နဲ့အနိုင်ရခဲ့တာကြောင့် ဗိုလ်လုပွဲသို့တက်လှမ်းနိုင်ခဲ့ပြီး ရီးရဲလ်မက်ဒရစ်နဲ့ ယှဉ်ပြိုင်သွားရတော့မှာဖြစ်ပါတယ်။
ပထမအကျော့မှာ အက်သလက်တီကိုနဲ့ ဘာစီလိုနာတို့ဟာ သွင်းဂိုးတွေအပြန်အလှန်သွင်းခဲ့ကြပြီး ၄-၄ ဆိုတဲ့ရလဒ်ကို ပုံဖော်နိုင်ခဲ့ကြပေမယ့် ယခုအခါမှာတော့ သွင်းဂိုးတွေများများစားစားမြင်တွေ့ခဲ့ရခြင်းမရှိဘဲ ၀-၁ နဲ့သာ ပွဲပြီးဆုံးခဲ့တာဖြစ်ပါတယ်။ ဒါကြောင့် ဟန်ဆီဖလစ်ရဲ့အသင်းဟာ နှစ်ကျော့ပေါင်းရလဒ် ၄-၅ နဲ့အတူ ဗိုလ်လုပွဲသို့ တက်လှမ်းနိုင်ခဲ့ပြီး အက်သလက်တီကိုကတော့ ပြိုင်ပွဲကို လက်ပြနှုတ်ဆက်ခဲ့ရပါတယ်။
ယခုပွဲစဉ်မှာ ပွဲအစ ၅ မိနစ်အတွင်းမှာပဲ အက်သလက်တီကိုနောက်ခံလူ အက်ဇ်ပီလီကွစ်တာဟာ အနီကတ်ပြသခံရဖို့ နီးစပ်ခဲ့ပေမယ့် ကွင်းလယ်ဒိုင် လူးဝစ်မူနူရာက VAR နဲ့စစ်ဆေးပြီးနောက်မှာ အဝါကတ်ပြသဖို့သာ ဆုံးဖြတ်ခဲ့တာကြောင့် အက်သလက်တီကိုတို့ ပွဲပြီးဆုံးချိန်အထိ ကစားသမားအပြည့်အစုံနဲ့ ကစားခွင့်ရခဲ့ပါတယ်။
ဘာစီလိုနာကတော့ ပွဲအစမှာ အသားစီးကနေ ကစားနိုင်ခဲ့ပြီး အိမ်ရှင်အသင်းကို ထိန်းချုပ်ထားနိုင်ခဲ့တာဖြစ်ပါတယ်။ ဘာစီလိုနာအတွက် တစ်လုံးတည်းသောအနိုင်ဂိုးကိုတော့ တောင်ပံကစားသမားလေး လာမိုင်းယာမယ်လ်ရဲ့ ဖန်တီးပေးပို့မှုမှတစ်ဆင့် ဖာရန်းတောရက်စ်က ပွဲကစားချိန် ၂၇ မိနစ်မှာ သွင်းယူပေးခဲ့တာဖြစ်ပါတယ်။
ဂိုးရပြီးနောက်ပိုင်းမှာ ဘာစီလိုနာအနေနဲ့ ပွဲကို ထိန်းချုပ်ကစားဖို့သာ ကြိုးစားခဲ့တာကြောင့် တိုက်စစ်ဆင်မှုတွေ ထပ်မံမြင်တွေ့ခဲ့ရခြင်းမရှိပါဘူး။ ဒုတိယပိုင်းမှာ အက်သလက်တီကိုက ချေပဂိုးပြန်လည်ရရှိဖို့ တိုက်စစ်မြှင့်တင်ခဲ့ပေမယ့် ဘာစီလိုနာရဲ့နောက်တန်းကို ကျော်ဖြတ်နိုင်ခြင်းမရှိခဲ့လို့ ပထမပိုင်းက ရလဒ်အတိုင်းသာ ပွဲပြီးဆုံးခဲ့ပါတယ်။
ဒါကြောင့် ဗိုလ်လုပွဲသို့တက်ရောက်သွားနိုင်တဲ့ ဘာစီလိုနာဟာ တစ်ဘက်က ရီးရဲလ်ဆိုစီဒက်ကို နှစ်ကျော့ပေါင်းရလဒ် ၅-၄ နဲ့အနိုင်ရခဲ့တဲ့ ရီးရဲလ်မက်ဒရစ်နဲ့ တွေ့ဆုံသွားမှာဖြစ်ပါတယ်။ စပိန်စူပါဖလားဗိုလ်လုပွဲမှာ ရီးရဲလ်မက်ဒရစ်ကို ၅-၁ နဲ့ပြတ်ပြတ်သားသားအနိုင်ယူခဲ့တဲ့ ဘာစီလိုနာအနေနဲ့ ယခုတစ်ခေါက် အယ်လ်ကလက်စီကိုမှာလည်း နိုင်ပွဲထပ်မံဖော်ဆောင်သွားနိုင်မလားဆိုတာ ဗိုလ်လုပွဲမှာ ဆက်လက်စောင့်ကြည့်ရပါမယ်။