အီတလီနှင့်အတူ ယူရို ၂၀၂၀ တွင် ချန်ပီယံဖြစ်ခဲ့သူ ဂျော်ဂျင်ဟိုဟာ ဇန်နဝါရီအပြောင်းအရွှေ့ကာလအတွင်း အမ်မရိတ်မှ ထွက်ခွာဖို့အတွက် ချိတ်ဆက်မှုများရှိနေတာပါ။ သူရဲ့ စာချုပ်ဟာ လက်ရှိရာသီကုန်တွင် ကုန်ဆုံးမည်ဖြစ်ပြီး စာချုပ်သစ်တစ်ခု ကမ်းလှမ်းခံရနိုင်ခြေ နည်းပါးတာကြောင့် ဂျော်ဂျင်ဟိုဟာ ရွေးချယ်စရာများကို စဉ်းစားနေပြီး အာဆင်နယ်ကလည်း သူ့ကို အလွတ်ဖြင့် ထွက်ခွာခွင့်ပေးမည့်အစား ယခုအချိန်တွင် ရောင်းချရန် စဉ်းစားနေတာဖြစ်ပါတယ်။

ဂျော်ဂျင်ဟိုဟာ လက်ရှိရာသီတွင် ပရီးမီးယားလိဂ် ၆ ပွဲသာ စတင်ကစားခွင့်ရခဲ့ပြီး လာမယ့်ရာသီတွင် မာတင် ဇူဘီမန်ဒီ ကို ဝယ်ယူရန် အာဆင်နယ်က သဘောတူညီထားတယ်လို့လည်း သိရပါတယ်။ အာဆင်နယ်ဟာ ရီးရဲလ်ဆိုစီဒက်စ်မှ ဇူဘီမန်ဒီ ကို ဝယ်ယူရန် သဘောတူညီမှုရရှိထားပြီး မန်စီးတီး နှင့် လီဗာပူးတို့ကို ကျော်တက်ကာ နွေရာသီတွင် ကစားသမားကို ရရှိရန် ကြိုးစားနေတာဖြစ်ပါတယ်။

ဘရာဇီးကလပ် ဖလာမင်ဂိုဟာ ဇန်နဝါရီလကုန်တွင် ဂျော်ဂျင်ဟို ကို ဝယ်ယူရန် စိတ်ဝင်စားမှုရှိကြောင်း ဖော်ပြခဲ့ပြီး အာဆင်နယ်ဘုတ်အဖွဲ့နှင့် တွေ့ဆုံဆွေးနွေးခဲ့ပါတယ်။ သို့သော် ဖာဘရီဇီရို ရိုမန်နိုရဲ့အဆိုအရ အာဆင်နယ်ဟာ ဖလာမင်ဂိုရဲ့ကမ်းလှမ်းချက်ကို ချက်ချင်းငြင်းပယ်လိုက်ပြီး အာတီတာကတော့ အသင်းကို ပိုမိုအားနည်းစေရန် မလိုလားကြောင်း ဖော်ပြခဲ့ပါတယ်။

ထို့ကြောင့် ဖလာမင်ဂိုဟာ ဂျော်ဂျင်ဟို အား နွေရာသီရောက်မှသာ ဝယ်ယူရန် အာရုံပြောင်းလိုက်ပါတယ်။ ဖလာမင်ဂိုဟာ ပြီးခဲ့တဲ့ရာသီတုန်းက ဘရာဇီးလိဂ်တွင် တတိယနေရာ၌ ရပ်တည်ခဲ့တဲ့ အသင်းလည်း ဖြစ်ပါတယ်။ ဂျော်ဂျင်ဟိုဟာ ချဲလ်ဆီးမှ ပေါင် ၁၂ သန်းဖြင့် ပြောင်းရွှေ့လာပြီးနောက် အာဆင်နယ်အတွက် ပွဲပေါင်း ၇၂ ပွဲ ကစားထားပါတယ်။ ကွင်းလယ်ကစားသမားဟာ စတန်းဖို့ဒ်ဘရစ်ချ်တွင် ချန်ပီယံလိဂ်အပါအဝင် ဆုတံဆိပ်များစွာ ရရှိခဲ့သော်လည်း အာဆင်နယ်တွင် ထိုကဲ့သို့အောင်မြင်မှုမျိုးကို မရရှိထားပါဘူး။

သို့သော်လည်း အာဆင်နယ်ဟာ ယခုရာသီတွင် ပရီးမီးယားလိဂ်ဆုဖလားကို ရရှိနိုင်သေးတာဖြစ်ပါတယ်။ သို့သော်လည်း မန်စီးတီးနှင့် ရင်ဆိုင်ရမည့် ပွဲစဉ်မတိုင်မီ လီဗာပူးနှင့် ၉ မှတ်ကွာဟနေပါတယ်။ အာဆင်နယ်ရှိ သူရဲ့ အနာဂတ်နှင့်ပတ်သက်၍ မေးမြန်းသောအခါ ဂျော်ဂျင်ဟိုက သူဟာ ၂၀၂၄-၂၅ ရာသီအတွက်သာ အာရုံစိုက်ထားကြောင်း ပြောကြားခဲ့သော်လည်း ဘရာဇီးတွင် ကစားရန်ဆိုတာက အံ့သြစရာကောင်းတယ်လို့ ဝန်ခံခဲ့ပါတယ်။

"ကျွန်တော့်စာချုပ်က ဇွန်လမှာ ကုန်ဆုံးပါမယ် အခုကျွန်တော့်ရည်မှန်းချက်က နောက်ပွဲကို စဉ်းစားဖို့ပါ။ နောက်ပွဲက ၃ ရက်ပဲ လိုပါတော့တယ်။အများကြီး စဉ်းစားစရာတော့ မလိုပါဘူး" "ဘောလုံးမှာ အရာတွေက အရမ်းမြန်မြန် ဖြစ်ပျက်တတ်တယ်၊ တစ်ညအတွင်းမှာ အရာတွေ ပြောင်းလဲသွားနိုင်တယ်၊ ဒါပေမယ့် ကျွန်တော့်အာရုံက နောက်ပွဲပေါ်မှာပါ။"

"ဘောလုံးဆိုတာက အံ့သြစရာတွေနဲ့ ပြည့်နေတဲ့ သေတ္တာတစ်လုံးပါ။ ဒါကိုကျွန်တော်တို့ အားလုံးသိပါတယ် ဒါပေမယ့် ကျွန်တော့်ရည်မှန်းချက်က နောက်ပွဲအတွက် စဉ်းစားဖို့ပါ။ ကျွန်တော် ကြည့်တောင် မကြည့်ပါဘူး ဘာလို့လဲဆိုတော့ အမြဲတမ်း ဖြစ်နေတာကိုး" "အပြောင်းအရွှေ့တစ်ခု ဖွင့်လိုက်တိုင်း အမြဲတမ်း ရူးသွပ်စရာတွေနဲ့ ပြည့်နေတယ် သတင်းအများကြီး၊ အရာတွေအများကြီး၊ စကားတွေအများကြီးပါ"

"ဒါပေမယ့် သင်စဉ်းစားနေတဲ့ စကားတွေကို ရပ်လိုက်ရင် သင့်စွမ်းအင်တွေ အများကြီး ဖြုန်းတီးမိပြီး သင်ရောက်နေတဲ့နေရာမှာ သင့်အလုပ်ကို ထိခိုက်စေပါတယ်" "ဒါကြောင့် ကျွန်တော်ကတော့ အရင်က ပြောခဲ့သလိုပဲ ကျွန်တော့်ရည်မှန်းချက်က လက်ရှိရောက်နေတဲ့နေရာကို အာရုံစိုက်ဖို့ပါ ဒီနေ့ ဒီမှာပါ ဒါပါပဲ" လို့ ဂျော်ဂျင်ဟို က TNT Sport သို့ ပြောကြားခဲ့ပါတယ်။

ဘရာဇီးသို့ ပြောင်းရွှေ့ဖို့ အလားအလာရှိမရှိ မေးမြန်းသောအခါ ဂျော်ဂျင်ဟို က "အလားအလာရှိပါတယ်။ ဟုတ်ပါတယ် အနာဂတ်မှာ အလားအလာရှိပါတယ်" "ကျွန်တော် အရင်က ပြောခဲ့သလိုပဲ ကျွန်တော်ဟာ ဘရာဇီးက ပရော်ဖက်ရှင်နယ်အဆင့်မှာ မကစားဖူးသေးဘူး။ ဒါကြောင့် အဲ့ဒါက ကျွန်တော့်အတွက် အံ့သြစရာကောင်းတဲ့ အတွေ့အကြုံတစ်ခု ဖြစ်လာမှာပါ" "ဒါကြောင့် အဲ့ဒီအတွက်ကိုလည်း ဖွင့်ထားပါတယ် ဒါကတော့ ရှင်းနေတာပေါ့။ တံခါးအားလုံးကို ဖွင့်ထားပြီး အနာဂတ်မှာ ဘာလုပ်ရမလဲဆိုတာကို အေးအေးဆေးဆေး ဆုံးဖြတ်ပါမယ်" လို့ ပြန်ဖြေခဲ့ပါတယ်။