တော့တင်ဟမ်နည်းပြရော်ဘတ်တိုဒီဇာဘီက ရစ်ချာလီဆန်၊ ဒန်ဆိုနဲ့ ပါပေးဆားတို့ကိုယ်တိုင် နွေရာသီစျေးကွက်မပိတ်သိမ်းခင် အသင်းပြောင်းရွှေ့ဖို့အတွက် တောင်းဆိုထားတယ်လို့ ဖွင့်ဟခဲ့ပါတယ်။

ပြီးခဲ့တဲ့စနေနေ့၊ နယူးကာဆယ်ကို ၂-၀ ဂိုးဖြင့် ရှုံးနိမ့်ခဲ့တဲ့ အိမ်ကွင်းပွဲစဉ်မှာ ဒီကစားသမားသုံးဦး ပါဝင်နိုင်ခြင်းမရှိဘဲ ပါပေးဆားကတော့ ဒဏ်ရာပါ ရရှိနေခဲ့ပါတယ်။

သူတို့လွဲချော်ရခြင်းအကြောင်းရင်းကို မေးမြန်းရာမှာ ဒီဇာဘီက "ရစ်ချာလီဆန်ကိုတော့ ကျွန်တော် မသိပါဘူး။ သူက အသင်းမှ ထွက်ခွာချင်တယ်လို့ အကြိမ်အများအပြား ပြောခဲ့ဖူးပါတယ်။

ဒန်ဆိုကတော့ လွန်ခဲ့တဲ့နှစ်ရက်တုန်းက ကျွန်တော့်ဆီ လာပြီး အသင်းပြောင်းချင်တယ်လို့ ပြောပါတယ်။ ပါပေးဆားလည်း အတူတူပါပဲ၊ ဒါပေမဲ့ သူ့မှာ ဒဏ်ရာအနည်းငယ် ရရှိထားပါတယ်။ လေ့ကျင့်ခန်းဆင်းဖို့တော့ အဆင်သင့်ဖြစ်လုနီးပါပဲ။

ကျွန်တော် ဒီကစားသမားတွေကို သဘောကျသလို သူတို့က တကယ့် လူကောင်းတွေ ဖြစ်ကြပါတယ်။ ကျွန်တော်တို့ ကောင်းမွန်တဲ့ ဆက်ဆံရေး ရှိကြပါတယ်။ ဒါပေမဲ့ သူတို့ ထွက်ခွာချင်တယ်ဆိုရင်တော့ ကလပ်အသင်းအတွက် ငွေကြေးအရ အကျိုးရှိမယ့် ဖြေရှင်းချက်မျိုး ယူဆောင်လာပေးဖို့လိုအပ်ပြီး အဲဒီအခါကျမှ သူတို့ ထွက်ခွာနိုင်ဖို့ရှိသလို ကျွန်တော်တို့လည်း အခြားကစားသမားတွေ ရှာဖွေသွားရပါမယ်" လို့ ပြောကြားခဲ့ပါတယ်။

သတင်းရင်းမြစ်တွေရဲ့အဆိုအရ ပါပေးဆားကိုခေါ်ယူဖို့ ဂျူဗင်တပ်စ်အသင်း စိတ်ဝင်စားနေတယ်လို့ သိရပြီး ဒီဇာဘီကိုယ်တိုင်လည်း ဒီကစားသမားသုံးဦးကို ထွက်ခွာခွင့်ပေးဖို့ လမ်းဖွင့်ပေးထားပြန်ပါတယ်။ 

ရစ်ချာလီဆန်က ၂၀၂၂ ခုနှစ်အတွင်း အဲဗာတန်မှ တော့တင်ဟမ်ဆီ ပြောင်းရွှေ့လာခဲ့ပြီး ဒန်ဆိုကတော့ ပြီးခဲ့တဲ့နွေရာသီကာလမှာ လန်းစ်မှ အပြီးသတ်ပြောင်းရွှေ့ရောက်ရှိလာခဲ့ပါတယ်။

ပါပေးဆားကလည်း ၂၀၂၁ ခုနှစ်မှာ မက်ဇ်အသင်းမှ မြောက်လန်ဒန်အရပ်ဆီ ရောက်ရှိလာသူ ဖြစ်ပါတယ်။

ဒီဇာဘီက အခုနွေရာသီအပြောင်းအရွှေ့ကာလအတွင်း ကစားသမားသစ်ရှစ်ဦးအတွက် ပေါင်သန်း ၃၈၀ နီးပါး အသုံးပြုခဲ့ပေမဲ့ ရာသီအဖွင့်ပွဲစဉ်နှစ်ပွဲဆက် သွင်းဂိုးမဲ့ရှုံးနိမ့်ပြီးနောက် ပရိသတ်တွေ စိတ်အေးအေးထားကြဖို့ တိုက်တွန်းခဲ့ပါတယ်။