နိုင်ဂျီးရီးယားဂိုးသမားအိုကိုယီက ဂျူဗင်တပ်စ်၊ အင်တာမီလန်တို့နဲ့ သတင်းတွေ ထွက်ပေါ်ခဲ့ဖူးပေမဲ့ လက်ရှိကလပ်အသင်းအပေါ်မှာပဲ အပြည့်အဝအာရုံစိုက်ထားပြီး အူဒီးနီးစ်အသင်းအပေါ် သူ့ရဲ့သစ္စာစောင့်သိမှုကို ထပ်လောင်းအတည်ပြုခဲ့ပါတယ်။

အသက် ၂၆ နှစ်အရွယ်ဂိုးသမားက နွေရာသီအပြောင်းအရွှေ့ကောလာဟလတွေကို ငြင်းပယ်ခဲ့ပြီး သူ့အတွက် ပထမဦးစားပေးအဖြစ် စီးရီးအေကလပ်အသင်းရဲ့ရည်မှန်းချက်တွေ အောင်မြင်စေဖို့ ကူညီပေးချင်တယ်လို့ အလေးအနက် ပြောကြားခဲ့ပါတယ်။

ပါဒိုဗာအသင်းကို ၁-၀ ဂိုးဖြင့် အနိုင်ရရှိခဲ့တဲ့ ကိုပါအီတာလီယာပွဲစဉ်မှာ အိုကိုယီက ကွင်းတွင်း စိတ်လှုပ်ရှားဖွယ်ပုံစံကောင်းနဲ့အတူ ပြန်လည်ဝင်ရောက်လာပြီး ဂိုးမပေးရအောင် အကောင်းဆုံး စွမ်းဆောင်ပြခဲ့ပါတယ်။

"ကျွန်တော်တို့ အဆင်သင့် ဖြစ်နေပါပြီ။ ပြီးခဲ့တဲ့ရက်သတ္တပတ်အနည်းငယ်မှာ ကျွန်တော်တို့ အပြင်းအထန်ကြိုးစားခဲ့ကြပြီး ရာသီသစ်စတင်ဖို့အတွက် အားလုံးက စိတ်အားထက်သန်နေကြပါတယ်" လို့ အိုကိုယီက Tuttoudinese ဆီ ပြောကြားခဲ့ပါတယ်။

"ကျွန်တော်တို့မှာ ရည်မှန်းချက်တွေ ရှိကြပြီး အဲဒါတွေကို အောင်မြင်အောင် ကြိုးပမ်းသွားချင်ပါတယ်။ ကိုယ်ရေးကိုယ်တာအရ ကျွန်တော်က အူဒီးနီးစ်အသင်းအတွက်၊ အသင်းဖော်တွေနဲ့ ကျွန်တော်တို့ ပရိသတ်တွေအတွက် အရာရာ ပေးဆပ်သွားချင်ပါတယ်။

ဒီအရာတွေက ကျွန်တော့်ဘဝရဲ့အစိတ်အပိုင်းတစ်ခုဖြစ်သလို ကျွန်တော့်ရဲ့ ကိုယ်ပိုင်ပုံရိပ်အတွက်လည်း အရေးကြီးပါတယ်။ ဒါပေမဲ့ ကျွန်တော်က ဒီနှစ်ခုကို သီးခြားစီ ခွဲထားပါတယ်။

ဘောလုံးက တစ်ခု၊ ကွင်းပြင်ပမှာ ကျွန်တော် လုပ်ဆောင်တဲ့အရာတွေက အခြားတစ်ခု ဖြစ်ပါတယ်။ ကျွန်တော် ဒီကိုရောက်နေချိန်မှာ ကျွန်တော့်ရဲ့အလုပ်နဲ့ အူဒီးနီးစ်အသင်းအကြောင်းကိုပဲ စဉ်းစားပါတယ်။

ကျွန်တော်တို့ အားကိုးရမယ့် လက်တစ်စုံ ရှိနေပါသေးတယ်။ ပီယာနာက လူငယ်ဂိုးသမားတစ်ဦးဖြစ်ပြီး တကယ့်ကို ထူးချွန်တဲ့ အရည်အချင်းတွေ ရှိပါတယ်။

ဒါ့အပြင် ကျွန်တော်တို့ဆီမှာ အရည်အသွေးမြင့်မားပြီး အတွေ့အကြုံကြီးမားတဲ့ ပါဒယ်လီ ရှိပါသေးတယ်။ ကောင်လေးတွေ ဖွံ့ဖြိုးတိုးတက်လာမယ့်ပုံစံကို မြင်တွေ့ရဖို့ ကျွန်တော် စိတ်လှုပ်ရှားနေပါတယ်" လို့ ဆိုပါတယ်။