ရီးရဲလ်မက်ဒရစ်အသင်းနည်းပြဟိုဆေးမော်ရင်ဟိုက အခုနွေရာသီကာလအတွင်း အသင်းရဲ့ကမ်းလှမ်းမှုကို ဘာစီလိုနာကစားသမားသစ်ဖြစ်လာမယ့် ရိုဒရီကိုယ်တိုင် ဘယ်လိုငြင်းပယ်ခဲ့သလဲဆိုတာနဲ့ပတ်သက်လို့ ပြောကြားခဲ့ပါတယ်။

ရိုဒရီက မန်စီးတီးမှ အပြီးသတ်ထွက်ခွာကာ ဘာစီလိုနာမြို့ဆီ ရောက်ရှိလာပြီး ဘာစီလိုနာအသင်းမှာ ကစားခွင့်ရဖို့ဆိုတာ သူ့ရဲ့အိပ်မက်ဖြစ်တယ်လို့ ဝန်ခံခဲ့ပါတယ်။

ကမ္ဘာ့ဖလားနဲ့ ရွှေဘောလုံးဆုရှင်က အစောပိုင်းမှာ ရီးရဲလ်မက်ဒရစ်အသင်းနဲ့ ဆွေးနွေးခဲ့ပေမဲ့ နောက်ဆုံးမှာ ဆွေးနွေးမှုတွေ အံ့အားသင့်ဖွယ် ပျက်ပြယ်သွားခဲ့ပါတယ်။ နောက်ပိုင်းမှာတော့  သူက ကတ္တလန်ဒေသအခြေစိုက်ကလပ်အသင်းဆီ ပြောင်းရွှေ့ဖို့ ဆုံးဖြတ်ခဲ့ပါတယ်။

အသက် ၃၀ နှစ်အရွယ်ရိုဒရီက စပိန်ချန်ပီယံတွေနဲ့ လေးနှစ်စာချုပ်ချုပ်ဆိုဖို့ သဘောတူညီခဲ့ပါတယ်။ လတ်တလောမှာ ဘာစီလိုနာက ချန်ပီယံဆု ဆက်လက်ထိန်းသိမ်းထားနိုင်ဖို့ ရေပန်းစားနေပြီး ဒီလိုအခြေအနေတွေက ရီးရဲလ်မက်ဒရစ်အသင်းကို ပိုမိုစိတ်ပျက်စေပါလိမ့်မယ်။

ရိုဒရီရဲ့ငြင်းပယ်မှုအကြောင်း ပြောကြားရာမှာ မော်ရင်ဟိုက သံသယများပြားနေသူမျိုးကို သူ့အသင်းမှာ အလိုမရှိဘူးလို့ တုံ့ပြန်ခဲ့ပါတယ်။

"ရီးရဲလ်မက်ဒရစ်အသင်းအတွက် နှစ်ခါပြန်စဉ်းစားနေတဲ့ ကစားသမားမျိုးတွေ မလိုအပ်ပါဘူး။ ဖုန်းခေါ်ဆိုမှု ရရှိလိုက်တာနဲ့ ဘယ်အချိန်ရောက်လာရမလဲဆိုတဲ့ ကစားသမားမျိုးကိုပဲ  ထည့်သွင်းပြောရပါလိမ့်မယ်။

ရိုဒရီက ထူးချွန်တဲ့ ကစားသမားတစ်ဦးပါ။ ဒါပေမဲ့ ရီးရဲလ်မက်ဒရစ်ဆိုတာ အခြားကဏ္ဍတစ်ခု ဖြစ်ပါတယ်။ သူ့ရဲ့သံသယတွေက ကျွန်တော့်ဆီမှာပါ သံသယတွေ ဖြစ်ပေါ်စေခဲ့ပါတယ်။ 

ကျွန်တော်ကိုယ်တိုင် ရိုဒရီနဲ့ အကြိမ်အနည်းငယ် စကားပြောခဲ့ပါတယ်။ ရီးရဲလ်မက်ဒရစ်က သူ့ကို အရေးကြီးတဲ့ ကမ်းလှမ်းမှုတစ်ခု ပြုလုပ်ခဲ့ပါတယ်။

ဒါပေမဲ့ အဲဒီနောက်မှာတော့... ရိုဒရီမှာ သံသယတွေ ရှိလာခဲ့ပါတယ်။ သူ့ရဲ့ သံသယတွေက သူ့ကို ခေါ်ယူဖို့ ကြိုးစားနေတဲ့ ကျွန်တော့်ဆီမှာပါ သံသယတွေ ဖြစ်ပေါ်စေခဲ့ပါတယ်" လို့ မော်ရင်ဟိုက ဆိုပါတယ်။