လီဗာပူးဂိုးသမား အလစ်ဆန်က ငြင်းပယ်လိုက်တဲ့အတွက် အီတလီထိပ်သီး ဂျူဗင်တပ်စ်အသင်းဟာ အက်စတွန်ဗီလာဂိုးသမား အယ်မီမာတီနက်ဇ်ကို သူတို့ရဲ့ ဂိုးသမားသစ်ရှာဖွေရေးမှာ အဓိကဦးစားပေးပစ်မှတ်အဖြစ် အစားထိုးသတ်မှတ်လိုက်တယ်လို့ သတင်းတွေအရ သိရပါတယ်။

အီတလီကလပ်ကြီးဟာ ဘရာဇီးလ်နဲ့ လီဗာပူးဂိုးသမား အလစ်ဆန်ကို စီးရီးအေဆီ ပြန်လည်ခေါ်ဆောင်ဖို့ အလွန်စိတ်အားထက်သန်ခဲ့ပေမဲ့ သူကတော့ အန်းဖီးလ်မှာပဲ အနည်းဆုံး နောက်ထပ် တစ်ရာသီ ထပ်ရှိနေဖို့ ဆုံးဖြတ်လိုက်ပြီ ဖြစ်ပါတယ်။

နာမည်ကျော် သတင်းထောက် ဖာဘရီဇီယိုရိုမန်နိုရဲ့ ဖော်ပြချက်အရ ဂျူဗင်တပ်စ်ဟာ ဂိုးသမားသစ်တစ်ဦး ခေါ်ယူဖို့ ဆက်လက်ရှာဖွေနေဆဲဖြစ်ပြီး အခုအခါမှာတော့ အသက် ၃၃ နှစ်အရွယ် ဗီလာဂိုးသမား မာတီနက်ဇ်ဘက်ကို အာရုံလှည့်လာတာ ဖြစ်ပါတယ်။

လက်ရှိမှာ ဂျူဗင်တပ်စ်ဟာ အပြောင်းအရွှေ့ဖြစ်မြောက်နိုင်မယ့် အသေးစိတ်အချက်အလက်တွေကို စုံစမ်းဖို့အတွက် ဗီလာအသင်းရော၊ မာတီနက်ဇ်နဲ့ပါ ဆွေးနွေးမှုတွေ စတင်နေပြီ ဖြစ်ပါတယ်။

မာတီနက်ဇ်ရဲ့ လစာတောင်းဆိုမှု မြင့်မားတာဟာ ဂျူဗင်တပ်စ်အတွက် အခက်အခဲ မဖြစ်နိုင်ဘူးလို့ နားလည်ရပေမဲ့လည်း သူတို့ဟာ စပါးအသင်းက အသက် ၂၉ နှစ်အရွယ် ဂိုးသမား ဂူလီယယ်လ်မို ဗီကာရီယိုကိုလည်း အရန်ရွေးချယ်မှု တစ်ခုအနေနဲ့ အသင့်ပြင်ထားပါတယ်။