အန်ဒရီ အိုနာနာဟာ ထရက်ဘ်ဇွန်စပေါ်အသင်းမှာ အငှားသွားရောက်ကစားရာကနေ ပြန်လာတော့မှာဖြစ်ပြီး မန်ချက်စတာယူနိုက်တက်ရဲ့ ရာသီကြိုစခန်းကို ဝင်ရောက်ဖို့ ပြင်ဆင်နေပါတယ်။ စက်တင်ဘာလမှာ ရွိုင်ရယ်အန့်ဝပ်အသင်းကနေ ရောက်ရှိလာတဲ့ ဆင်းန် လမ်းမန်စ်ဟာ သူ့ရဲ့ ပထမဆုံးရာသီမှာတင် ပွဲထွက်ဂိုးသမားအဖြစ် နေရာခိုင်မာအောင် လုပ်နိုင်ခဲ့ပြီး နည်းပြဟောင်း ရူဘင် အမိုရင်ရဲ့ လက်အောက်မှာ အိုနာနာကို အသင်းလူစာရင်းကနေ ဖယ်ထုတ်နိုင်ခဲ့သူ ဖြစ်ပါတယ်။

တနင်္လာနေ့က ပရီမီယာလိဂ်ရဲ့ ရာသီအကောင်းဆုံးခေါ်ယူမှုအဖြစ် မဲပေးရွေးချယ်ခံခဲ့ရတဲ့ လမ်းမန်စ်ရဲ့ နေရာကို အိုနာနာနဲ့ အစားထိုးမှာ မဟုတ်ပေမဲ့ ဖာဘရီဇီယို ရိုမာနိုရဲ့ အဆိုအရ ကင်မရွန်းဂိုးသမား အိုနာနာဟာ ရာသီကြိုအတွက် အသင်းဆီ ပြန်လာမှာဖြစ်ပါတယ်။ "အန်ဒရီ အိုနာနာဟာ မန်ချက်စတာယူနိုက်တက်ကို ပြန်လာမှာဖြစ်ပြီး လောလောဆယ် အစီအစဉ်အရ မိုက်ကယ်ကားရစ်ရဲ့ လက်အောက်မှာ ရာသီကြိုလေ့ကျင့်ရေးတွေ ဆင်းသွားမှာပါ" လို့ သိရပါတယ်။ "ထရက်ဘ်ဇွန်စပေါ်အသင်းဟာ အိုနာနာကို ဆက်ထိန်းထားချင်နေဆဲဖြစ်ပြီး ၂၀၂၇ ခုနှစ် ဇွန်လအထိ အကျုံးဝင်မယ့် အငှားစာချုပ်သစ်အတွက် ထပ်မံဆွေးနွေးချင်နေတယ်လို့ နားလည်ထားပါတယ်။ မန်ယူအသင်းနဲ့ အိုနာနာရဲ့ အကျိုးဆောင်တွေကြားမှာလည်း ဆွေးနွေးမှုတွေ ဆက်လုပ်သွားမှာပါ" လို့လည်း ဆိုပါတယ်။

အိုနာနာဟာ ပြီးခဲ့တဲ့လက အငှားကစားခဲ့တဲ့ ထရက်ဘ်ဇွန်စပေါ်အသင်းနဲ့အတူ တူရကီဖလား ချန်ပီယံဆုကို အောင်ပွဲခံခဲ့ပါတယ်။ ဒီအောင်မြင်မှုကြောင့်ပဲ အဆိုပါကလပ်အသင်းက သူတို့ရဲ့ ဂိုးသမားကို နောက်ထပ်တစ်နှစ် ဆက်ထားဖို့ ဆုံးဖြတ်ချက် ခိုင်မာသွားခဲ့တာ ဖြစ်ပါတယ်။ ဒါပေမဲ့ နွေရာသီမှာ အသင်းအတွက် ရင်းနှီးမြှုပ်နှံမှုတွေလုပ်နိုင်ဖို့ ငွေထုတ်ချင်နေတဲ့ မန်ယူအသင်းကတော့ ၂၀၂၃ ဇူလိုင်လတုန်းက အိုနာနာအတွက် ပေးချေခဲ့ရတဲ့ ပေါင် ၄၆ သန်းကို ပြန်ရချင်နေတာကြောင့် အငှားချဖို့ဆိုတာ မဖြစ်နိုင်သလောက်ပါပဲ။ အိုနာနာဟာ ယူနိုက်တက်အတွက် ၁၀၂ ပွဲအထိ ကစားပေးခဲ့ဖူးသူပါ။ ခြေစွမ်းညံ့ဖျင်းမှုတွေရှိခဲ့ပြီး အခြားအသင်းဆီ အငှားချခံခဲ့ရပေမဲ့ မန်ယူအသင်း ချန်ပီယံလိဂ်ဝင်ခွင့် ရခဲ့တာကြောင့် အသင်းရဲ့ ကျန်တဲ့ကစားသမားတွေနည်းတူ အိုနာနာရဲ့ လစာဟာလည်း ဒီနွေရာသီမှာ တိုးလာဖို့ ရှိနေပါတယ်။