လီဝန်ဒေါစကီးနဲ့ စတုန်းစ်တို့က ချဲလ်ဆီးအတွက် အသင့်တော်ဆုံးဖြစ်ပြီး အသင်းကို အများကြီး ကူညီပေးနိုင်လိမ့်မယ်လို့ ဂျိုးကိုးလ် ပြောကြား
ဝါရင့်ကစားသမားတွေရဲ့ အတွေ့အကြုံက အဓိကကျတယ်လို့ ယူဆထားတဲ့ ချဲလ်ဆီးဂန္ထဝင် ဂျိုးကိုးလ်က အသင်းရဲ့ အပြောင်းအရွှေ့ အလားအလာတွေနဲ့ ပတ်သက်ပြီး ထုတ်ဖော်ပြောကြားလာပါတယ်။ ပြီးခဲ့တဲ့ တနင်္ဂနွေနေ့က ဆန်းဒါးလန်းကို ၂ ဂိုး ၁ ဂိုးနဲ့ ရှုံးနိမ့်ခဲ့တာကြောင့် ချဲလ်ဆီးအသင်းဟာ ၂၀၂၆-၂၇ ရာသီအတွက် ဥရောပဝင်ခွင့် လွဲချော်ခဲ့ရပြီး ဒါဟာ နွေရာသီ အပြောင်းအရွှေ့ အစီအစဉ်တွေအပေါ် အကြီးအကျယ် ထိခိုက်စေခဲ့ပါတယ်။
နည်းပြသစ် ရှာဘီအလွန်ဆိုဟာ ဒီရာသီမှာ လုံးဝကျရှုံးခဲ့တဲ့ အသင်းကို တာဝန်ယူရမှာဖြစ်ပြီး ရာသီသစ်မတိုင်ခင် အသင်းကို အဆင့်မြှင့်တင်ဖို့ ကြိုးစားသွားမှာပါ။ အန်ဇိုဖာနန်ဒက်စ်နဲ့ ဂျာအိုပက်ဒရိုတို့ အသင်းကနေ ထွက်ခွာတော့မယ်ဆိုတဲ့ သတင်းတွေ ထွက်ပေါ်နေချိန်မှာပဲ ချဲလ်ဆီးအနေနဲ့ အသင်းကို အောင်မြင်မှုဆီ ဦးဆောင်ပေးနိုင်မယ့် အတွေ့အကြုံရှိ ထိပ်တန်းကစားသမားတွေကို ခေါ်ယူဖို့ အကောင်းဆုံးဖြစ်မယ်လို့ ဂျိုးကိုးလ်က ယူဆနေပါတယ်။ အသင်းကို အလုံးစုံ ပြောင်းလဲပစ်ဖို့ မလိုဘဲ ဘာကြောင့် အတွေ့အကြုံက အရေးကြီးတာလဲဆိုတာကိုလည်း သူက အခုလို ရှင်းပြခဲ့ပါတယ်။
“ဂျွန်စတုန်းစ်တို့၊ လီဝန်ဒေါစကီးတို့လို ကစားသမားမျိုးတွေကို အလွတ်ပြောင်းရွှေ့ကြေးနဲ့ ခေါ်ယူရပါမယ်။ သူတို့က ပွဲတိုင်းမှာ မိနစ်တိုင်း ပါဝင်ကစားပေးဖို့ မလိုပေမဲ့ ဘယ်လိုအနိုင်ယူရမလဲဆိုတာ သိတယ်၊ အသင်းရဲ့ ယဉ်ကျေးမှုကို နားလည်တယ်၊ ပြီးတော့ ကွင်းထဲမှာလည်း အစွမ်းပြပြီး အသင်းကို ကူညီပေးနိုင်ပါသေးတယ်။ လက်ရှိကစားသမားတွေအတွက် အဲဒါမျိုး လိုအပ်ပါတယ်။ ဒါဟာ အသင်းထဲမှာတင် ရှိနေရမှာဖြစ်ပြီး နည်းပြတွေဆီကပဲ အမြဲတမ်း လာလို့မရပါဘူး။ အသင်းကောင်းတိုင်းဟာ သူတို့ရဲ့ ဝတ်လဲခန်းထဲကနေ လမ်းညွှန်မှုတွေ ရှိနေတတ်သလို နှစ်ပေါင်းများစွာကတည်းက လက်ဆင့်ကမ်းလာတဲ့ ဗဟုသုတနဲ့ အတွေ့အကြုံတွေလည်း ရှိကြပါတယ်။ လူတွေက ဒါကို ဘာလို့ နားမလည်ကြတာလဲဆိုတာ ကျွန်တော် တကယ်ကို အံ့ဩမိပါတယ်။ ချယ်လ်ဆီးပိုင်ရှင်တွေအနေနဲ့ ဒါကို သဘောပေါက်ပြီး ဒီလမ်းစဉ်အတိုင်း သွားကြလိမ့်မယ်လို့ မျှော်လင့်ပါတယ်။ အဲဒီလိုမှ မဟုတ်ရင်တော့ အရင်အတိုင်းပဲ ဖြစ်နေမှာပါ။ နောက်နှစ်မှာ ချယ်လ်ဆီးက ပိုကောင်းလာနိုင်ပြီး အခြေအနေ ပြန်ကောင်းလာပြီလို့ ပြောနိုင်ပေမဲ့ ထိပ်ဆုံးကို ပြန်တက်ဖို့ ကြိုးစားတဲ့အခါ ကန့်သတ်ချက်တွေနဲ့ပဲ ပြန်တိုးနေဦးမှာပါ။ ထိပ်တန်းအဆင့်ကို ရောက်ဖို့ဆိုရင် အတွေ့အကြုံ၊ အမြော်အမြင်နဲ့ အရည်အသွေးတွေ လိုအပ်ပါတယ်” လို့ ၎င်းက ဆိုပါတယ်။
လာမယ့်ရာသီအတွက် ဥရောပဝင်ခွင့်ကရမယ့် ဝင်ငွေတွေ လွဲချော်ခဲ့တာကြောင့် ချဲလ်ဆီးဟာ အသင်းရဲ့ အကောင်းဆုံး ကစားသမားတချို့ကို ရောင်းထုတ်ဖို့ ဖိအားပေးခံရနိုင်ပါတယ်။ ဒါပေမဲ့ စတုန်းစ်နဲ့ လီဝန်ဒေါစကီးတို့ဟာ အလွတ်ပြောင်းရွှေ့ကြေးနဲ့ ရရှိနိုင်တာကြောင့် ကွင်းထဲမှာ ခေါင်းဆောင်မှုပိုင်း လိုအပ်နေတဲ့ ချယ်လ်ဆီးအတွက်တော့ အလားအလာကောင်းတဲ့ ခေါ်ယူမှုတွေ ဖြစ်လာနိုင်ပါတယ်။
