ပင်နယ်တီအခွင့်အရေးငြင်းပယ်ခံရပြီးနောက် ဒိုင်လူကြီးတွေ ကြောက်ရွံ့နေကြတယ်လို့ ဝေဖန်လိုက်တဲ့ တော့တင်ဟမ်ကြယ်ပွင့် မက်ဒီဆင်
လိဒ်ယူနိုက်တက်နဲ့ တစ်ဖက်တစ်ဂိုးစီသရေကျခဲ့တဲ့ တနင်္လာနေ့၊ ပရီးမီးယားလိဂ်ပွဲစဉ်အပြီး တော့တင်ဟမ်ကွင်းလယ်လူဂျိမ်းစ်မက်ဒီဆင်က ဒိုင်လူကြီးတွေကို လူမှုကွန်ရက်မှတဆင့် ဝေဖန်ပြစ်တင်ခဲ့ပါတယ်။
အသက် ၂၉ နှစ်အရွယ်ကစားသမားက ဒဏ်ရာကြောင့် ကာလရှည်အနားယူခဲ့ပြီးနောက် လိဒ်နဲ့ပွဲစဉ်ကို ပါဝင်ကစားချိန် နာကျင်အချိန်ပိုမှာ အသင်းအတွက် ချက်ချင်းဆိုသလို အကျိုးပြုနိုင်မယ့် အခွင့်အရေး ရရှိခဲ့ပါတယ်။
လိဒ်စ်ရဲ့ ဂိုးဧရိယာအတွင်း အမ်မီချာရဲ့ ဖျက်ထုတ်မှုကြောင့် မက်ဒီဆင်လဲကျသွားခဲ့ပေမဲ့ ကွင်းလယ်ဒိုင်ဂျာရက်ဂဲလက်ကတော့ ပင်နယ်တီပေးဖို့ ငြင်းဆန်ခဲ့ပါတယ်။ ဒီဖြစ်ရပ်ကို VAR ဖြင့် အသေအချာပြန်လည်စစ်ဆေးခဲ့ပေမဲ့ ကွင်းလယ်ဒိုင်ရဲ့ဆုံးဖြတ်ချက်ကိုပဲ အတည်ပြုခဲ့လို့ ပွဲပြီးဆုံးချိန် တစ်ဖက်တစ်ဂိုးစီ သရေရလဒ်ပဲ ထွက်ပေါ်ခဲ့ပါတယ်။
ဒီဆုံးဖြတ်ချက်နဲ့ပတ်သက်လို့ မက်ဒီဆင်က သူ့ရဲ့ Instagram မှာအခုလို ရေးသားခဲ့ပါတယ်။ "ရှင်းရှင်းလင်းလင်း သိရအောင် ပြောရရင်... ဘောလုံးလမ်းကြောင်းပြောင်းသွားအောင် ထိလိုက်တာ အမ်မီချာမဟုတ်ဘဲ ကျွန်တော့်ရဲ့ ညာခြေအပြင်ဘက်ပိုင်းပဲ ဖြစ်ပါတယ်။ အဲဒါကို ဒိုင်လူကြီးဆီ ကျွန်တော် ပြောခဲ့ပေမဲ့ စစ်ဆေးမှုက စက္ကန့် ၂၀ အတွင်းမှာတင် ပြီးစီးသွားခဲ့ပါတယ်။ အခုဆိုရင် ဒိုင်လူကြီးတွေဟာ VAR ရှိနေလို့ ကွင်းထဲမှာ ဆုံးဖြတ်ချက်ချဖို့ကို သေလောက်အောင် ကြောက်နေကြပါပြီ။ ကျွန်တော်တို့ ဆက်ပြီး တိုက်ပွဲဝင်သွားပါမယ်" လို့ သူက ဆိုပါတယ်။
